Jójis 18 - Bokyi Bible

Máka ne Banet ḿbé ba/fím ké Kyikû-Dǎn

¹ Otu o/mû o*fí ké Ézerel ké nkéré ámu*. Ké nkéré ámu, banet ḿbé ba/fím ké kyikû-Dǎn ba/mû mbe ba-kyé ng esí nyí badakoo ba-kyú, ké nǎ, mbé ba/mû ba*da/koo ne esí nyí ebe ké burwám-byikû-banet-Ézerel*.

² Mbé ba-cá kâng banet ashí atánge ḿbé [ba/kwárê,] ké kángkáng byikû-banet-Dǎn ba-twóm kámbé ba-dim ké eshê nyí Zóra ne nyí Eshítwal, ba-sét kámbé ba/fu, bada-kyé kyikû kyi-kim ne esí. Nkéré mú ba/firi ké esí nyí Éferem nyí eku éku, ba/nung ké kyise-Máka.

³ Ńdyí mbe ányi, ba/cêe ejá-kyisat ánkyi mú onet-Lyíva, ba-dim kâng ba-da-bí ǎ ba/fu, wo amu a-chi i ebóng nyín. Yeě o/kpî ǒ o-bâ ne wo kwán.

⁴ Nyǐ o-faa kámbé o/fu, me n/tóbê ne Máka mú mu o-kyâ mě akpuga n-chi i ǎ bǎmkpóngé wǎ nchi kyifen emen.

⁵ Mbé ba-faa ǎ ba/fu, kamgbe, bí Osówo â bucen eten bu/chi bu-nwa.

⁶ Nyǐ o-faa kámbé o/fu, *da n̂g ekérê nang chwǒm kyibónge*. Óburúkpâbí mu o-bám m běn ké bucen enen ḿbún.

⁷ Banet ámbe ashí atánge ba-dim kâng ányi ba-wâa Láshi. Ba-ri eringe nyí banet ámbe mbe ba-kyú u áku kanong kanong wǎ banet-Sádon. [Mbé ba/mû banet-bunyîn-dyityém ḿbé baa*chi byiraa* ḿbé baa*shwôn ne onet nang obónge*. Ne mbe to ne kángkáng byěm ḿbyí mbe ba-kyé ng.] Mbé ba/tíbî ne banet-Sádon, ne ba*fí ne chwǒm nang kyibónge ne banet bakíri*.

⁸ Nkéré mú banet ámbe ba/bwa esim ba-fyi ké Zóra ne Eshítwal, banet-oshê ebe ba-bí kámbé ńkyí mbé ba/ri.

⁹ Mbé ba-sét kámbé ba/fu, bâ n̂g byi-dim byi-da-kye Láshi bunwa. Be byi/ri esí nyi e-nwa ng kanong kanong. *Da n̂g ekyú nyín dyikáá*. Chi n̂g babap. Ca n̂g ké esí ányi ba-da-koo kányí.

¹⁰ Â ba/ribi áku, ben ba/chi ba-nyît ba/fu, banet ámbe ba*fí ne okabe ké dyityém kyi-kim ne chwǒm nang kyibónge*. Oshê ámu o/rêe kanong kanong. Mu to ne nang ebóng chwǒm ńkyí onet mu o-kyé ng, ne Osówo oo/yip oshê ámu o-kye běn.

¹¹ Égot-banet echât ḿbé ba/fím ké kyikû-Dǎn ba-dim kâng ké Zóra ne Eshítwal, ba-kpá byiko-byití enwa.

¹² Ba-yú eku ba-da-bi bampyep-byití ebe ké kyicê ńkyí esû edaríbî e-jâ, ké oshê mú Kyíryat-Jérim, ké esí nyí Júda. Éné nké tete kurún ba/tôong ba-kó ng kyikit ánkyi Bampyep ḿbé Dǎn.

¹³ Ba-zûu ányi ba-da-ribi ké kyise ńkyí Máka, ké esí nyí Éferem nyí eku éku.

¹⁴ Banet ámbe ashí atánge, ḿbé ba/mû ba/ce kyikû edakyé kyi-kim ne eshê nyí e/fárâng ne Láshi, ba-bí kâng barî ba/fu, ben bamu ba-nyît ng ba/fu, ké burwám-byise ḿbyín, kyise kyibónge nkyi ányi ne orím-bukye mú ba/sím ké kyichí ba-mwane kámú ne syílyíba dí. Erím-bakye ekíri to nyi ányi ne chwǒm to ńkyí badasô epé. Ben ba/kabe ba/fu, byichi nǎ.

¹⁵ Ba-kpû kâng ké kyise-Máka, kyikit-wǎn-kyisat ámu mú onet-Lyíva mu o-kyú u, ba-bí wǎn ámu eringe dyikpen ndyi dyi-câ kashú.

¹⁶ Ké nkéré ámu, égot-basúja ányi echât ḿbé Dǎn, ḿbé baa/kpá byiko-byití, ba/mû ké dyifyi-oshê cip.

¹⁷ Banet-boǒfêp-esí ámbe ashí atánge ba-nung onǔng ké kyise-Máka ba-da-kúng orím-bukye ámu ne erím-bakye nyí áku ne chwǒm ánkyi ńkyí epé esô, ányi nchi kyifen-Osówo ámu mu to kwán ké dyifyi-oshê ne ḿbé basúja.

¹⁸ Nkéré mú banet ámbe ba/nung ké kyise-Máka ba-da-kúng byěm-ociring ámbyi, mú wǎn-kyisat, mú nchi kyifen-Osówo ámu, o/bí kámbé o/fu, bamu ba-chi i éné ebóng.

¹⁹ Mbé ba-sét ǎ ba/fu, cíbî pyêp, *dafaa ojá*. Bâ ne be ké kyikû, a-firi bě nkye bacê ne nchi kyifen. Wo kii*nyîn ǒ ńkyí adakyú nchi kyifen-Osówo mú kyikû-banet-Ézerel kyimúmú*? kyi-shwôm ńkyí adakyú nchi kyifen-Osówo mú onet obónge*?

²⁰ Ńkyín kyi/chi ǎ o-firi ké bunyîn-dyityém, o-yip kâng byěm-ociring ámbyi o-dim ne mbé ké kyikû.

²¹ Ba-pín kâng esim ba-kpet ecen ba-câ, bwǎn ebe ne byitú ebe ne byěm ebe byi-câ kámbé kashú.

²² Mbé ba/cen ba-tíbî kanong kanong kyi-fím ké kyise-Máka, ńdyí Máka o/kó barî-banet emen ba-byí o/fu, bada-nwa byití ne mbé. Ba-da-kâm banet-Dǎn,

²³ ba-wonge kámbé ké kyikû. Banet-Dǎn ba-bírî achi ké esim, ba-bí Máka ba/fu, ebóng. Bujê-banet ḿbén kâng.

²⁴ Máka o-faa kámbé o/fu, kyi/byí nǎ, ńkyí ben bamu ba-bí ng mě ba/fu, ebóng. Ben ba/kúng nchi kyifen-Osówo ejí ne bakye ḿbé mbe ba-bám m mě, ḿbé n/chi, ba-dim ne mbé. Kántîk, me n/waa ne ebóng.

²⁵ Banet-Dǎn ba-faa ǎ ba/fu, kyi/mû kyi/chi kyi-nwa ńkyí adawaa pyêppyêp, éné â amu a-ryuu ng a/fu, kafâ kasa banet ḿbén ba-kye běn bunwa. Kyi-fím ányi kâng, wo ne kyikû-banet eyên kángkáng ba/chi ba-kpú.

²⁶ Ba-dim kâng ba-kpet ecen ba-câ. Máka o/nyît o/fu, ḿbé ámbe mbe ba-jang ng eshwane ba-shwôm ǎ, o-bírî kâng kashú o-bwa esim dyijê.

^27-28 Nkéré mú banet-Dǎn baa/kúng mú nchi kyifen-Osówo ámu ne byěm ḿbyí Máka o/chi, ba-shwôm ba-da-kye Láshi bunwa, oshê ámu mú bunyîn-dyityém, ḿbé baa*kyé byiraa* ḿbé ba/mû to ké owo mú Bét-Réhop. Ba-ju banet-oshê ámu, ba-shí to oshê. Onet o/mû o*fí mú odanyii kámbé* ké nǎ, oshê ámu o/jang etíbî ne Sádon, ne mbé ba/mû ba*fí ba-chi i byěm ne banet bakíri*. Banet ḿbé ba/fím ké kyikû-Dǎn ba-bwât oshê ámu ba-bi, ba-kûkyú ányi.

²⁹ Ba-yángê kámú dyizîn ńdyí o/mû o-bángê e Láshi, o-kûbángê Dǎn, ba/fé kámú dyizîn ándyi dyi-tím ne Dǎn mú bonchí ebe mú kpákpá, mú wǎn-Jekôp.

³⁰ Banet-Dǎn ámbe ba-tî orím-bukye ámu, mú bada ǎ ekûkye ofê, ne Jónátan mú wǎn-Géshom, mú wǎn-wǎn-[Músis,] o-firi wǎ nchi kyifen-Osówo mú kyikû-banet ńkyí Dǎn, ne banet ḿbé ba/fím ké kyikû emen ba-firi kámbé wǎ banchi kyifen-Osówo tete ba-ba-yip kámbé ba-jâ ne mbé wǎ básóng.

³¹ Orím-bukye mú Máka o/waa ányi kángkáng nkéré mú mpyep-kyifen-Osówo echi o/mû ké Shílo.