Jójis 17 - Bokyi Bible

Erím-Bakye nyí Máka

¹ Onyinchéng obónge o/mû kô mú odabángê Máka, mú o/mû o-kyú u ké esí nyí Éferem nyí eku éku.

² Nyǐ o/sét boné emen o/fu, nkéré mú ba/jii ǒ égot-byikim-basyílyíba etánge ne kyicê, wo a/fé kyibî-nshwam a-kye onet ámu. Me n/jwo ǒ nkéré mú a/fé. Kûtún, akpuga ányi nyi ne me. Me nké n/kúng kányí. Boné emen o-faa o/fu, kyi/bát Óburúkpâbí ojware ǒ, ǎ wǎn ejí.

³ O-bwa ne akpuga ányi o-kye boné. Boné o-faa o/fu, eringe nyí ndachi ne kyibî-nshwam ńkyín kii*ta wǎn ejí* n-kúng ng kányí n-kye Óburúkpâbí. Ba-kúng ng kányí ba-sím orím-bukye ké kyichí ba-yip kányí ba-mwane ké mǔ. Kántîk, n-kú m-bwa ng ne nyǐ n-kye ǒ, ǎ Óburúkpâbí.

⁴ O-bwa ne akpuga ányi kâng o-kye boné. Boné emen o-yip kányí o-kye mmee byěm mú o/sím orím-bukye ké kyichí o-yip syílyíba ámu o-mwane ké mǔ. Ba-yip ba-tî ké kyise-Máka.

⁵ Máka o/mû ne kyikit ńkyí emen ńkyí odafé Osówo. Nyǐ o/chi barím-bakye ne chwǒm-epé esô, o-cá wǎn emen mú onyinchéng o-tî o/fu, okyú wǎ nchi kyifen-Osówo.

⁶ Otu o/mû o*fí ké Ézerel ké nkéré ámu*. Nang yeě nang yeě o/mû mu o-chi i eringe kyi/nyîn ǎ.

⁷ Ké nkéré ámu to, wǎn-kyisat o/mû kô mú onet-Lyíva, mú o/mû mu o-kyú u ké oshê-Bételehêm, ké esí nyí Júda.

⁸ Nyǐ o/dim ké Bételehêm mu o-kyé ng kyikit kyikíri ńkyí odakûkyú. Nkéré mú mu o-cen n o-câ, o/daribi ké kyise ńkyí Máka, ké esí nyí Éferem nyí eku éku.

⁹ Máka o-bí ǎ o/fu, wo a/fím nyá. Nyǐ o-faa o/fu, me n-chi i onet-Lyíva, me n/fím Bételehêm, ké esí nyí Júda. Me mu n-kyé ng kyikit ńkyí ndakûkyú.

¹⁰ Máka o-faa o/fu, kûkyú ne me. A-firi mě nkye bacê ne nchi kyifen-Osówo. Ne n/chi n-kû ǒ ekye byikim-syílyíba diǐkpú kángkáng dyije, ne byídí ne byiryíng.

¹¹ Onet-Lyíva ámu o-bángê ekyú ne Máka, o-firi ǎ wǎ wǎn.

¹² Máka o-tî ǎ wǎ nchi kyifen-Osówo emen, o-kûkyú to ne nyǐ.

¹³ Máka o-raa o/fu, kántîk mú n/firi ne onet-Lyíva wǎ nchi kyifen-Osówo mú ejí, me mu n-nyît ng n/fu, Óburúkpâbí o/chi o-chi byěm byi-kû mě ece kashú kanong.