Jójis 16 - Bokyi Bible

Sámsin o/ce Gáza

¹ Dyicí dyibónge, Sámsin o/dim o-ca oshê-Fyilíta mú badakó Gáza. Nyǐ o/kâm onyinyi-akpara obónge ányi o-dim o-da-rí ne nyǐ.

² Banet-Gáza ba-jwo ba/fu, Sámsin mu ányi. Ba-da-wâng kyikit ánkyi ba-fé ké kafâ, mbe ba-bám m ǎ ké dyifyi ńdyí ké dyishí-bukwóp, tete dyicí dyi-cé. Mbé ba*da/faa ojá ké buchú ámbu bumúmú* mbe ba-kabe ng ké atyém ebe ba/fu, byi-bám m tete dyicí dyi-cé, fím ányi kâng byi/chi byi-ju ǎ.

³ Nké Sámsin o/waa ké karíng sáre tete kyirê kyi-kán. O-dim kâng nensang o-níbî dyifyi ńdyí ké dyishí-bukwóp o-zú ne byikwap ne byikwap ne kángkáng byěm. O-yip o-twôom ké byikem, o-dim ne ndyí tete o-yú kyíbóng-kaku ńké ka/bírî kashú ne oshê mú Héboron.

Sámsin ne Dyilíla

⁴ Nkéré mú ńkyí ánkyi kii/shwôm, kyijé kyi/róng Sámsin ne onyinyi obónge mú odabángê Dyilíla, mú mu o-kyú u ké esí nyí ndege ńdege, nyí Sórek.

⁵ Batu-ashí batánge ḿbé ba/fím Fyilíta ba-dim ba-kâm onyinyi ámu. Ba-sét ǎ ba/fu, nîm Sámsin o-sét ǒ ńkyí nyǐ mu o-shwane e éné, eringe nyí be byida ǎ eman ekpógê, byi-bwá ǎ, byi-chi ǎ busa bu-man ǎ. Nang yeě ké burwám eten o-kyâ ǒ égot-byikim-syílyíba etánge ne bajam batánge.

⁶ Dyilíla o-raa kâng ne Sámsin o/fu, kamgbe, sét mě ńkyí nkyi kyi-chi i ǒ ne amu a-jang ng eshwane éné. Â onet o/fu, nyǐ o-bwá ng ǒ o-chi ǒ a-waa éné, o-cen n nǎ ne o-chi.

⁷ Sámsin o-faa ǎ o/fu, â ba/yip bankut ḿbé bafyîfî káchâtkányi, ḿbé ba*da/jwóm ne* ba-bwá mě, n-firi ng kyeekyee wǎ nang yeě nang yeě.

⁸ Batu-Fyilíta ba-yip kâng bankut káchâtkányi, ḿbé ba/tôong bafyîfî, ḿbé ba*da/jwóm ne* ba-ba-kye Dyilíla, o-yip o-bwá Sámsin.

⁹ Banet ba/mû ányi ké nfût obónge ba-bám m. O-wonge kâng o/fu, Sámsin, banet-Fyilíta mbe ba-bâ. Nké Sámsin o/két bankut ámbe wǎ eringe bucat budashí â bu/ta okwâ. Ké bubwô ámbu, mbé ba*da/nyît kyikû-busa emen*.

¹⁰ Dyilíla o-raa ne Sámsin o/fu, ké ntûntû, wo amu a-nîm m mě oním, a*fí a-sét ng mě ntûntû*. Kamgbe, sét mě eringe onet odacen ne o-bwá ǒ.

¹¹ Sámsin o-faa ǎ o/fu, â ba/yip erí nyí efyîfî, nyí ba*da/chi ne chwǒm ké nyǐ* ba-bwá mě, n-firi ng kyeekyee wǎ nang yeě nang yeě.

¹² Dyilíla o-ryuu kâng erí nyí efyîfî, o-bwá ǎ. O-wonge kâng o/fu, Sámsin, banet-Fyilíta mbe ba-bâ. Banet ámbe ba/mû mbe ba-bám m ké nfût okíri. Nké nyǐ o/két erí ányi ké abwô wǎ eringe badakét bucat.

¹³ Dyilíla o-raa ne Sámsin o/fu, a/tôong o-jwó ng mě ojwóng, a*fí a-sét ng mě ntûntû*. Sét mě eringe onet odacen ne o-bwá ǒ. Sámsin o-faa ǎ o/fu, â a/yip biǐntíp-eji ejí ḿbyín káchâtkányi, a-tím ké kiǐré ńkyí badatím byídí, [a-yip ochí a-bwá ké mbyí kanong kanong, n-firi ng kyeekyee wǎ nang yeě nang yeě.

¹⁴ Dyilíla o-só ǎ kâng o-róng ké burê, o-yip biǐntíp-eji emen ámbyi káchâtkányi o-tím ké kiǐré ńkyí badatím byídí,] o-yip ochí o-bwá ké mbyí. O-wonge o/fu, Sámsin, banet-Fyilíta mbe ba-bâ. Nké Sámsin o/jwóbê, o-tut eji emen e-firi ké kiǐré ánkyi.

¹⁵ Dyilíla o-raa kâng ne nyǐ o/fu, wo a-cen n nǎ ne a-sét mě a/fu, me mu n-jê ng ǒ, mú wo a*fí a-sét ng mě ntûntû*. Wo aa/jwó mě kampén ka/firi kachât, ne a/tôong a*da mě esét ne chwǒm ńkyí nkyi kyi-chi i ǒ ne amu a-jang ng eshwane*.

¹⁶ O/wâa mu o-bí ng Sámsin chwǒm ánkyi o-câ kángkáng dyicí. Sámsin o-kyee ké byiko, o-firi káryúryú káryuryu ké afaníkong nyí Dyilíla mu o-kyâ ǎ kyi-kim ne nkyí,

¹⁷ o-ba-sét ntûntû emen ké nkuli kyikû. O/fu, me ba*da mě ekwárê ne dyishí ne banyá*. Me nn/kúng byiko ejí n-kye Osówo ké ocím eryí mú byěm eciring kyi-fím ké nkéré mú ba/fwon mě. Â ba/kwárê mě eji, busa ejí bu-man n-firi kyeekyee wǎ nang yeě nang yeě.

¹⁸ Nkéré mú Dyilíla o/nyît o/fu, Sámsin oo/sét ǎ ntûntû, o-twóm kyitwóm ba-sét batu-Fyilíta ba/fu, chî n̂g ebê ké nkuli kyikû. Nyǐ oo/sét mě ntûntû emen. Ba-bâ kâng ne akpuga ányi.

¹⁹ Dyilíla o-só Sámsin o-twôom ǎ dyishí ké bunam o-kûrê, o-kó kâng onyinchéng obónge [mú o/kwárê] Sámsin biǐntíp-eji emen ámbyi káchâtkányi. O-kpet ǎ ekye kâng busông, ké nǎ, busa emen boo/man.

²⁰ O-wonge kâng o/fu, Sámsin, banet-Fyilíta mbe ba-bâ. Sámsin o-bûu nensang ne okabe o/fu, n-fem m nang chwǒm kii*chi mě* wǎ eringe mu n-chi i kángkáng nkéré. Nyǐ o*da/nyît o/fu, busa ḿbú Óburúkpâbí boo/byí ǎ ké byiko*.

²¹ Banet-Fyilíta ba-kám ǎ, ba-fuu ǎ achi. Ba-kpî ǎ ba-dim ne nyǐ Gáza, ba-yip bamgbokobá ḿbé biǐré ba-fé ǎ, ba-tî ǎ ké kyibám-mgbokobá o-kûchi bǎmkpóngé ḿbé byěm ekwa ké kiǐchwóm-byěm ekwa.

²² Nké eji emen e/chîkpet ekán.

Bukyû ḿbú Sámsin

²³ Batu-Fyilíta ba/bacibi barî eringe nyí badachi dyijî ba-chi to kiimbâng-kyifen ba-kye bukye ebe ḿbú budabángê Dágon. Ba-kpet ekwan ba/fu, bukye eten boo/chi bě byi-kpógê Sámsin mú onet-bushwôn eten.

^24-25 Mbé ba/mû ké bunyîn-dyityém, ba-raa kâng ba/fu, kó n̂g Sámsin [o-ba-chi bě byěm-éjwô.] Nkéré mú ba/dakpî Sámsin ké kyibám-mgbokobá, [ba/chi ǎ o-kûchi kámbé byěm-éjwô,] ba-chi ǎ o-bwom ké otyém ne otyém mú byikwap. Nkéré mú banet ba/ri ǎ, ba-kpet ekwán ekwan ba-kpee ng bukye ebe, ba/fu, bukye eten boo/chi bě byi-kpógê onet-bushwôn eten mú o/chi esí eten e-waa kafâ dyikáá, o-ju to bujê-banet eten.

²⁶ Sámsin o-sét mú wǎsíng-onyinchéng mú o/mû o/níbî ǎ ké bubwô mu o-tông ng ǎ bukwóp o/fu, chi mě n-ta byikwap ḿbyí byi/níbî kyise ńkyín. Mu n-ryuu ng n-jêem ké mbyí.

²⁷ Banyinchéng ne banyinyi ba/mû baa/sú ké kyise ánkyi pwat. Batu-Fyilíta ashí atánge ba/mû to ányi. Ne égot-banet, banyinchéng ne banyinyi, e-byí i nang onyiryiká ḿbé ba/mû kyíbóng-kyise ánkyi ba-ri ng Sámsin [ba-chi i ǎ o-chi i kámbé byěm-éjwô.]

²⁸ Sámsin o-fé kâng nshwam o/fu, Óburúkpâbí mú mu Otu Kyítá, zîim mě, kamgbe. Chî mě ekye-busa ejí kampén kabónge nké nke, ǎ Osówo, eringe nyí ké ocím-okwâ mún obónge, ndaman esó banet-Fyilíta ewa nang ké achi ejí nyí ba/fuu mě.

²⁹ Sámsin o-níbî kâng byikwap ḿbyí otyém ne otyém byifee, ḿbyí byi/níbî kyise ánkyi. O-fîm bubwô o-tím ké ńkyín, o-fîm ḿbú bubónge o-tím ké ńkyí áku, o-tírîng kámbyí,

³⁰ o-wonge o/fu, mîng mě m-kpú ne banet-Fyilíta. O-tírîng ne kángkáng busa emen, kyise ánkyi kyi-myii kyi-cít batu ámbe batánge ne kángkáng banet ḿbé ba/mû ányi. Sámsin o/ju banet dyicí o/kpú ba-jê ba-shwôm ḿbé o/mû oo/ju ké dyikpen emen.

³¹ Bwǎn-bané emen ḿbé banyinchéng ne kángkáng banet-kyikû emen ba-dim ba-bâ kyikwóm-enyam-byiko emen ekúng. Ba-kúng ǎ ba-bwa ne nyǐ dyijê, ba-ryii ǎ ké otyém ne otyém mú Zóra ne Eshítwal, ké dyikun-bonchí emen Mánwa. Nyǐ o/kyú onet-dyishí-Ézerel ké aje bujam.