Jójis 15 - Bokyi Bible

¹ Ka-chîrí, Sámsin o-dim o-wâa onyi emen edari ké nkéré mú badabóng esang-byichí, o-yip kyisu-ebû ńkyí oda ǎ ekye. O-raa ne bonchí-onyi emen o/fu, me mu n-ryuu ng n/fu, n-nung ng ké nfût mú onyi ejí. Nké bonchí-onyi emen o*da/bángê o/fu, onung*.

² O-sét Sámsin o/fu, me n/kabe ké ntûntû n/fu, mú mǔ mu o-sa ng ǒ kafâ, ne ké bubwô ámbu, nn/yip ǎ n-kye ocín eyên. Nké nche emen to mu o-nwa ng o-shwôm ǎ. A-man n ǎ ebé a-mîng mú áku.

³ Sámsin o-faa o/fu, ntáng mún ńkyí n/chi n-chi banet-Fyilíta, kii*ba/chi kyi-tû mě me ké dyishí*.

⁴ O-dim kâng o-da-kám égot-enyam-dyikán ebónge ne kyicê, nyí edakyú wǎ kabyî. O-níbî ecî ebe o-bwá ne barî efee efee. O-yip baka o-fé kányí ké aziri ányi.

⁵ O-mee kâng okwâ o-fé ké baka ámbe, o-zú kányí abwô e-dim e-wâa ké byifát ḿbyí banet-Fyilíta. Ké bukwóp ḿbún, nyǐ o*da/shí byiryíng ḿbyí ba/mû baa/fuu nké nke* nké o/shí to cibicibi ne byiryíng ḿbyí byi/mû byi/tôong ké byifát, ne akán-byichí to ḿbyí badakó ólif.

⁶ Nkéré mú banet-Fyilíta ba/bí ba/fu, yeě o/chi ńkyín, ba-sét kámbé ba/fu, Sámsin nké o/chi éné, ké nǎ, bonchí-onyi emen mú o/fím Tyímina oo/yip onyi-Sámsin o-kye ocín-Sámsin. Banet-Fyilíta ba-dim kâng [ba-da-shí onyinyi ámu, ba-shí to kyise-bonchí emen.]

⁷ Sámsin o-sét kámbé o/fu, éné nké ben bamu dí. Me n/ryí ocím n/fu, me mm*ba/chi m-mîng* tete n-só běn ewa.

⁸ O-kye kámbé bunwa ḿbú boo*nwa eri* o-ju bujê-banet ebe. O-bwa kâng esim o-kûkyú ké bucim, ké kiǐmbém, ké esí nyí Étam.

Sámsin o/kpógê Banet-Fyilíta

⁹ Banet-Fyilíta ba/dim ba-ba-bi bampyep-byití ebe ké esí nyí Júda, ba-kye kâng oshê mú Léhyi bunwa.

¹⁰ Banet-Júda ba-bí kámbé ba/fu, ebóng ńkyí ba/kye bě bunwa. Mbé ba-faa ba/fu, be byi/bê ebakúng Sámsin wǎ onet-mgbokobá byi-dim ne nyǐ, byi-chi ǎ wǎ eringe nyǐ o/chi bě.

¹¹ Égot-banet-Júda onyiryiká ba-dim kâng ba-ca ké bucim ámbu, ḿbú ké kiǐmbém, ké Étam, ba-bí Sámsin ba/fu, wo a*fí a-nyît ng a/fu, be byimu ké bubwô ḿbú banet-Fyilíta dí*. Kûri kâng ńkyí aa/chi bě. Sámsin o-faa kámbé o/fu, me n/chi kámbé ńkyí mbé ba/chi mě me to.

¹² Mbé ba-faa ǎ ba/fu, be byi/bê ǒ ebabwá, eringe nyí byida ǒ ekúng byi-da-kye kámbé. Sámsin o-faa kámbé o/fu, ryí n̂g ocím ba/fu, ben baa*ba/chi ba-ju mě*.

¹³ Mbé ba-faa ǎ ba/fu, nkyi kanong, kyi*da/shwôm byi-bwá ng ǒ obwáng byi-da-kye kámbé*. Be bii*ba/chi byi-ju ǒ*. Ba-yip kâng erí nyí efyîfî efee ba-bwá ǎ, ba-kpî ǎ ké bucim ba-bwa esim ne nyǐ.

¹⁴ Nkéré mú o/ribi ké Léhyi, banet-Fyilíta ba-dim ba-zóngê e ba-bâ ǎ ké byiko, ba-wonge e ǎ ké kyikû. Busa ḿbú Óburúkpâbí bu-waa bu-chi ǎ o-shwane, o-két erí ányi nyí ba/mû ba/bwá ǎ ké abwô, wǎ eringe badakét bucat.

¹⁵ O-rángê e kyikúú-dyijâ-kaanyam-atû ńké ka/kpú kyi*da/rí ne*. O-siring kyísí o-bwóp kánkyí, o-ju égot-banet-Fyilíta etánge ké nkyí.

¹⁶ Sámsin o-kwán kâng okwan mún o/fu, ne kyikúú-kaanyam-atû, me n/ju égot-banet etánge, ne kyikúú-kaanyam-atû, me n/zû kámbé azu azu.

¹⁷ Nkéré mú ńkyí ányi kii/shwôm, o-twóp kyikúú ánkyi kú. Kyikit ńkyí chwǒm ńkyín kyi/chi, ba/fé kánkyí dyizîn Rímat-Léhyi.

¹⁸ Omu o-kpet ejê kâng Sámsin kanong kanong, o-raa kâng o-kó Óburúkpâbí o/fu, wo nké a/chi mě ne m-kpógê dyikpóge ńdyín ńdyí dii*nwa esét*. Kántîk kâng, me mkpú kyijé-omu dí, banshâng bakye-banet ḿbén bakám mě dí.

¹⁹ Osówo o-chi kâng mbwo kyísí, ányi ké Léhyi, omu o-byí ányi. Sámsin o-jwáp, enyam-byiko emen e-kpet ebwa esim. Ba-fé kyikit ánkyi kâng dyizîn, Hákóre, kyi/tôong áku ké Léhyi.

²⁰ Sámsin o/kyú onet-dyishí mú Ézerel ké aje bujam, ńdyí mbé ba/mû ké abwô nyí banet-Fyilíta.