Jójis 14 - Bokyi Bible

Sámsin ne Wǎn-Onyinyi mú o/fím Tyímina

¹ Dyicí dyibónge, Sámsin o/dim o-ca Tyímina, o-ri wǎn-onyinyi ányi obónge mú o/fím Fyilíta.

² O-bwa esim dyijê o-da-sét bonchí ne boné o/fu, wǎn-onyinyi mu áku ké Tyímina, mú o/fím Fyilíta, mú o/jê mě kanong kanong. Bé n̂g ǎ ba-kye mě, mu n-ryuu ng m-bé ǎ.

³ Nké bonchí ne boné ba/bí ǎ ba/fu, ebóng ńkyí amu a-ryuu ng a-ca kyikit-banet-Fyilíta ámbe ḿbé ba/bángê ké bakye esháng, a/fu, a-da ng ebé onyi. Wo aa*ryuu onyi ké kyikim-banet ńkyí eten dí, ké burwám-banet ḿbé eten*? Nké nyǐ o/faa bonchí o/fu, mú mǔ nké me mu n-ryuu ng n/fu, bé a-kye mě. Nyǐ nké mu o-jê ng mě.

⁴ Banet-Sámsin ba/mû ba*fí ba-nyît ng ba/fu, Óburúkpâbí nké mu o-tông ng Sámsin bukwóp o/fu, ochi éné* ké nǎ, Óburúkpâbí o/mû mu o-kyé ng bukwóp ḿbú nyǐ odanwa ne banet-Fyilíta. Ké nkéré ámu, banet-Ézerel ba/mû ké abwô-banet-Fyilíta.

⁵ Sámsin ba-dim kâng ba-ca Tyímina ne bonchí ne boné emen. Nkéré mú mbe ba-shwôm m byifát ba-câ, nyǐ o/jwo ké kyisu-ekpang nkyi kyi-fém m.

⁶ Busa ḿbú Óburúkpâbí bu-waa bu-chi Sámsin o-shwane, o-níbî ekpang ányi ké abwô o-ját byicê byicê wǎ eringe badaját wǎn-ebû. Nké nyǐ o*da/sét banet emen ńkyí nyǐ o/chi*.

⁷ O-dim kâng o-da-pem ne wǎn-onyinyi ámu, ne wǎn ámu o/mû ǎ ké dyityém kanong kanong.

⁸ Ací a*da/jang erí* Sámsin o-bwa esim o-wâa wǎn ámu edabé. Nkéré mú mu o-cen n o-câ ké bukwóp, o-ján o-wâa ekpang ányi edakpúrî nyí o/mû o/ju. Ne kyi/chi ǎ chwǒm-akat eringe nyí o/ri kiǐsâ-bakwan ne bakút-bukwan to ké kafâ-dyifít-ekpang ányi.

⁹ O-kwám bakút-bukwan ámbe o-fé ké etyém-akwâ o-kûryí o-cen n o-câ. O-dim kâng o-da-kye bonchí ne boné kyicê. Ba-koo ba-ryí, nké Sámsin o*da/sét kámbé o/fu, nyǐ o/yip bakút ámbe ké kyikwóm-ekpang*.

¹⁰ Bonchí emen o-dim o-ca kyikit-wǎn-onyinyi ámu, Sámsin o-chi dyijî áku. Éné nké byisat byi/mû byi-chi i ké édúú ebe.

¹¹ Nkéré mú banet-Fyilíta ba/ri ǎ, ba-twóm byisat bujam esim diǐkpú ba/fu, baba-kyú ne nyǐ.

^12-13 Sámsin o-raa ne mbé o/fu, mîng n̂g n-tím běn kiǐshwô. N-kyâ nang yeě ké burwám enen kyicê-okpówo ńkyí kyinong kyinong ne byídí-dyijî â ba/man mě esét dyishí emen ne ací ńnyín káchâtkányi nyí dyijî-dyibé a-kûman. Mbé ba-faa ǎ ba/fu, tím bě kiǐshwô eyên ánkyi. Mîng n̂g byi-jwo kánkyí.

¹⁴ Nyǐ o-faa o/fu, ké abwô nyí nryî byěm nké chwǒm kyi/byí ńkyí badaryí. Ne ké abwô to nyí chwǒm ńkyí kyidashwane nké chwǒm kyi/byí ńkyí gbelegbele. Ací a-ba-man achât, mbé ba*da/man epét kiǐshwô ánkyi*.

¹⁵ Ké ací [anyii,] ba-sét onyi-Sámsin ba/fu, nîm otyép eyên eringe oda bě esét dyishí-kiǐshwô emen ńkyí o/tím. Â a*da/chi éné* [byi-fâ okwâ ké kyise-bonchí eyên byi-shí ǒ ányi cibicibi ne nkyí.] Ben ashí afee ba/kó bě ba/fu, byibâ eringe bada bě ekoo byěm, *chí éné dí*.

¹⁶ Onyi-Sámsin o-dim kâng o-tii ng o-câ o-da-kâm ǎ, o-raa ne nyǐ o/fu, me n*fí n-jê ng ǒ*. Me mu n-sa ng ǒ kafâ. Wo a/tím banet ejí kiǐshwô, nké a*da mě esét dyishí-kiǐshwô ánkyi*. Sámsin o-faa ǎ o/fu, ké ntûntû, me n*da/sét ne nang bonchí ne boné ejí*. Me n-cen n nǎ ne n-sét ǒ wo.

¹⁷ Wǎn-onyinyi ámu o-tii kyi-kim ne nkyí ké ací ányi jangjang káchâtkányi nyí dyijî. Nké ké ací káchâtkányi, nyǐ o/sét ǎ eringe kiǐshwô ánkyi kyi/byí, ké nǎ, mú mǔ o/tii kyi-kim ne nkyí kanong kanong. O-yip kâng o-sét banet-Fyilíta.

¹⁸ Ké dyicí ńdyí ací káchâtkányi kâng, ne Sámsin o-kûnung ké [nfût mú badarí sáre,] banet-oshê ba/sét ǎ ba/fu, ebóng chwǒm kyidanyîn kyi-shwôm bakút-bukwan. Ebóng chwǒm to kyidashwane kyi-shwôm ekpang. Sámsin o-faa kámbé o/fu, â ben ba/mû ba*da/kyé kyikû ne mpong ejí* ben ba/mû baa*ba/chi ba-nyît kyikû emen nang kántîk*.

¹⁹ Busa ḿbú Óburúkpâbí bu-waa bu-chi Sámsin o-shwane. O-dim o-wâa Áshíkelon, o-ju banet ányi bujam esim diǐkpú, o-pii kámbé banínǒng-byídí ké byiko o-kye banet ḿbé ba/pét kiǐshwô emen ńkyí o/tím. Nkéré mú ńkyí ánkyi kii/shwôm, o-bwa esim dyijê ké oshê emen, ne busa-dyityém ḿbú chwǒm ńkyí kyi/chi,

²⁰ ba-yip onyi emen ba-kye ocín-dyityém emen ké nkéré mbe ba-chi i dyibé.