Jójis 13 - Bokyi Bible

Ba/fwon Sámsin

¹ Banet-Ézerel ba/chîchi kyibî ké bushú ḿbú Óburúkpâbí, o-mîng kámbé ba-firi ké abwô nyí banet-Fyilíta ké bajam-aje bafee.

² Ké nkéré ámu, onyinchéng obónge o/mû kô mú odabángê Mánwa, mú o/fím Zóra. Nyǐ o/mû o/fím ké kyikû-banet ńkyí Dǎn. Onyi emen o/mû o*fí ne wǎn nang obónge*.

³ Orím mú onong mú Óburúkpâbí o-byí o-kâm ǎ, o-raa ne nyǐ o/fu, wo a*da/fwon ne wǎn nang obónge* nké wo a/chi a-koo dyifít abeabe a-fwon wǎn-onyinchéng.

⁴ Kûbám byiko eringe aa*ba/chi a-jwáp bato nang babónge* a-ryí to byiryíng-ociring nang byibónge*.

⁵ Ne ké nkéré mú aa/fwon wǎn ámu, *dachi a-kwárê ǎ dyishí ne banyá* ké nǎ, kyi-fím ké dyicí ńdyí ada ǎ efwon, ba/chi ba-kúng ǎ ba-kye Osówo ké ocím eryí mú byěm eciring. Nyǐ o/chi o-kpet echi bǎmkpóngé ḿbé odachi banet-Ézerel ba-fem ké abwô nyí banet-Fyilíta.

⁶ Onyinyi ámu o-dim o-da-sét otyép emen kâng o/fu, onet-Osówo oo/bê o-kâm mě, nyǐ o-chi i bushî wǎ [orím mú Osówo.] Me n*da ǎ ebí kyikit ńkyí nyǐ o/fím* ne nyǐ to o*da mě esét dyizîn emen*.

⁷ Nké nyǐ o/sét mě o/fu, me n/chi n-koo dyifít n-fwon wǎn-onyinchéng. O-sét mě to o/fu, me n*dachi n-jwáp bato nang babónge* n-ryí nang byiryíng ḿbyí badaciring* ké nǎ, wǎn ámu o/já Osówo wǎ onet mú odaciring byěm, kángkáng nkéré ké dyikpen emen.

⁸ Mánwa o-fé nshwam kâng o-kye Óburúkpâbí o/fu, kamgbe, ǎ Óburúkpâbí, mîng onet eyên ámu mú a/twóm o-bwa esim o-kâm bě, o-sét bě ńkyí be byidachi ne wǎn ámu, ké nkéré mú baa/fwon ǎ.

⁹ Osówo o/chi ńkyí Mánwa o/bí ǎ. Ne orím emen o/bwa esim o-kâm mú onyinyi ámu, nkéré mú nyǐ o/kyú me ké kyifát. Otyép emen Mánwa o/mû o*fí ányi ne nyǐ*.

¹⁰ O-zóngê kâng babap o-ba-sét ǎ o/fu, dǐi, onyinchéng ámu mú o/mû o/bê o-kâm mě dyicí ándyi oo/chîbyí o-kâm mě.

¹¹ Mánwa o-bûu nensang o-dim ne onyi emen ké kyikû. O-da-kâm onyinchéng ámu, o-bí ǎ o/fu, wo nké a/mû amu a-raa ng ne onyi ejí dí. Onyinchéng ámu o-faa ǎ o/fu, âa, nkyi éné.

¹² Mánwa o-bí ǎ kâng o/fu, ké nkéré mú ejá eyên ee/chi ké ntûntû, wǎn ámu ochi nǎ. Nyǐ otông ebóng dyizong-dyikpen.

¹³ Orím ámu o-faa ǎ o/fu, onyi eyên o-man o-chi kángkáng byěm ḿbyí me nn/sét ǎ.

¹⁴ Nyǐ o*dachi o-ryí chwǒm nang kyibónge ńkyí kyi/fím ké kyichí ńkyí badakó gerêp*. Nyǐ o*dachi o-jwáp bato nang babónge* o-ryí to byiryíng-ociring nang byibónge*. Nyǐ o-man o-chi kángkáng byěm ḿbyí me nn/sét ǎ.

^15-16 Mánwa o/mû o*da/nyît o/fu, mú mǔ o-chi i orím mú Óburúkpâbí* o-raa kâng ne nyǐ o/fu, kamgbe, *dachi a-dim*. Mîng bě byi-ju ǒ kyisu-ebû. Nké orím ámu o/faa ǎ o/fu, â nang n*da/dim* me mm*ba/chi n-ryí byiryíng eyên*. Nké â amu a-ryuu ng a-rám kámbyí, yip kámbyí a-shí wǎ eyáré a-kye Óburúkpâbí.

¹⁷ Mánwa o-faa o/fu, sét bě dyizîn eyên, eringe byida ǒ ekye ofê ké nkéré mú ejá eyên ee/chi eringe a/sét.

¹⁸ Orím ámu o-bí ǎ o/fu, ebóng amu a-ryuu ng a-nyît dyizîn ejí. Ndyí dyi-chi i [dyizîn-akat.]

¹⁹ Mánwa o-yip kâng kyisu-ebû ne esang-byichí o-twôom ké buká ḿbú badachi kyifen ba-kye Óburúkpâbí [mú odachi akat.]

^20-21 Nkéré erúkwâ nyi e-byí i e-jâ kyíbóng ké kyikit-kyifen echi ánkyi, Mánwa ne onyi emen ba/ri orím ámu o-yú u o-câ kyíbóng ké erúkwâ ányi. Mánwa o-nyît kâng o/fu, onyinchéng ámu o-chi i orím mú Óburúkpâbí, nyǐ ne onyi emen ba-fé kâng bushú kyísí. Mbé ba*da/chîri orím ámu*.

²² Mánwa o-raa ne onyi emen o/fu, byi-man byi-kpú ké ntûntû, ké nǎ, be bii/ri Osówo.

²³ Nké onyi emen o/faa ǎ o/fu, â Óburúkpâbí o/mû o/fu, nyǐ o-ju ng bě, nyǐ o/mû oo*ba/chi o-koo eyáré eten*. Nyǐ o/mû oo*ba/chi o-tông bě kángkáng byěm ḿbyín* o-sét bě nang byěm ḿbyín kántîk*.

²⁴ Onyinyi ámu o-ba-fwon wǎn-onyinchéng, o-fé ǎ dyizîn, Sámsin. Wǎn ámu o-ba-kán, Óburúkpâbí o-jware ǎ.

²⁵ Busa ḿbú Óburúkpâbí bu-chi ǎ o-firi shwaneshwane ńdyí nyǐ o/mû ké otyém ne otyém mú eshê nyí Zóra ne Eshítwal, ké bampyep ḿbé banet-Dǎn, ḿbé ba/bi ké kyídí.