Jójis 12 - Bokyi Bible

Jéfata ne Banet ḿbé ba/fím ké Kyikû-Éferem

¹ Banet ḿbé ba/fím ké kyikû-Éferem ba/bakpá byiko-byití. Ba-nyáng kace ńké Jódan ba-dim ba-wâa Záfon, ba-bí Jéfata ba/fu, ebóng a/nyáng buti a-da-nwa ne banet-Ámon a*da bě ekó byi-ca ne wo*. Byi-shí i ǒ cibicibi ne kyise eyên.

² Nké Jéfata o/faa kámbé o/fu, me ne banet ejí byi/mû ne kiimbâng-bushwôn ne banet-Ámon. Me n/kó běn, nké ben ba*da mě ebángê enyii ké abwô ebe*.

³ Ńdyí me n/ri n/fu, ben baa*ba/chi ba-chwáp mě* me m/bángê bukyû n-nyáng buti n-dim edanwa ne mbé, ne Óburúkpâbí o/chi mě m-kpógê kámbé. Ebóng kâng ńkyí ben bamu ba-bâ ebanwa ne me kántîk.

⁴ Jéfata o-kpî kâng kángkáng banet-Gyílet ba-byí ba-ba-nwa ne banet-Éferem ba-kpógê kámbé. Banet-Éferem ba/mû ba/raa ba/fu, ben banet-Gyílet ḿbé ba/fím ké kyikû ńkyí Éferem ne kyikû-Manáse baa/né bě be, be banet-Éferem.

⁵ Eringe nyí banet-Gyílet badachi ne banet-Éferem baa*chêe* mbé ba/koo byikit-Jódan ḿbyí onet odaman enyáng. Nang nkéré orá nké onet-Éferem mú mu o-kan n echêe o/bí o/fu, bamîng ǎ nyǐ o-nyáng kace, banet-Gyílet ba-bí ng onet ámu ba/fu, wo a-chi i onet-Éferem dí. Â nyǐ o/faa o/fu, aa*wááng*

⁶ mbé ba-sét ng ǎ ba/fu, mú mǔ ofu, shíbólet. Nké nyǐ o-fu ng, síbólet, ké nǎ, nyǐ oo*man efu éné kanong kanong*. Mbé ba-kám ǎ kâng ányi ba-ju ké kyikit ńkyí o/mû mu o-bâ ebanyáng. Ké nkéré ámu, mbé ba/ju égot-banet-Éferam etánge etánge ké bajam-byikit bafee esim byifee.

⁷ Jéfata o/kyú onet-dyishí-banet-Ézerel ké aje nyâchât. O-kpú kâng ba-ryii ǎ [ké oshê emen] mú mu ké esí nyí Gyílet.

Ébizan ne Élon ne Ábidon

⁸ Nkéré mú Jéfata oo/kpú, Ébizan mú o/fím Bételehêm o-firi onet-dyishí-Ézerel.

⁹ Nyǐ o/mû ne bwǎn-banyinchéng ashí bujam esim diǐkpú ne bwǎn-banyinyi to ashí bujam esim diǐkpú. O-yip bwǎn emen ámbe o-kye banet ḿbé ba/fím eshê ekíri, banet ámbe ba-kye ǎ bwǎn-banyinyi to ashí bujam esim diǐkpú, ḿbé o/kye bwǎn emen ḿbé banyinchéng ba-kûbé. Ébizan o/kyú onet-dyishí-Ézerel ké aje káchâtkányi,

¹⁰ o-kpú kâng ba-ryii ǎ ké Bételehêm.

¹¹ Nkéré mú Ébizan oo/kpú, Élon mú o/fím Zébélon o-firi onet-dyishí-Ézerel ké aje diǐkpú.

¹² O-ba-kpú kâng ba-ryii ǎ ké Ájalon, ké esí nyí Zébélon.

¹³ Nkéré mú Élon oo/kpú, Ábidon mú wǎn-Hyílel, mú o/fím Pyiráton o-firi onet-dyishí-Ézerel.

¹⁴ Nyǐ o/mû ne bajam-bwǎn-banyinchéng bafee, ne bwǎn-bwǎn emen to ḿbé banyinchéng ashí bujam esim diǐkpú, ḿbé ba/mû ba-yú u boonyam-atû to bajam bachât esim diǐkpú. Ábidon o/kyú onet-dyishí-Ézerel ké aje nyíryinyi,

¹⁵ o-kpú kâng ba-ryii ǎ ké Pyiráton, ké esí nyí Éferem nyí esí nyí eku éku.