Jójis 11 - Bokyi Bible

¹ Jéfata o/mû nkân byití, nyǐ o/mû o/fím Gyílet, boné emen o-chi i onyinyi-akpara. Bonchí emen, Gyílet

² o/mû ne bwǎn-banyinchéng bakíri ḿbé o/fwon ne onyi emen. Ne ké nkéré mú mbé baa/kán, ba/chi Jéfata ké busa ba/fu, omîng oshê ebe. Ba-raa ne nyǐ ba/fu, wo aa*ba/chi a-ryí bukyû ké chwǒm-bonchí eten nang kyibónge* wo a-chi i wǎn mú onyinyi okíri.

³ Jéfata o-chêe bwǎn-bané emen, o-kûkyú ké esí nyí Tôp. O-kûnyîn bujê-enyam-banet bakíri ányi ké dyityém, ba-kûcen ne nyǐ ba-bam m banet byěm ba-koo ng.

⁴ Nkéré mú ńkyín kii/shwôm nké banet-Ámon ba/dim ba-wâa edanwa byití ne banet-Ézerel.

⁵ Nkéré mú ńkyín kyi/chi, banet-ashí-Gyílet ba/dim ba-wâa edakpî Jéfata ké esí nyí Tôp.

⁶ Ba-sét ǎ ba/fu, bâ a-ba-bwóp bě kashú byi-da-nwa ne banet-Ámon.

⁷ Nké Jéfata o/faa kámbé o/fu, me m/mû n-sa ng běn kafâ kanong kanong mú ba/chi mě ké busa n-dim m-mîng kyise-bonchí ejí. Kyi/cen nǎ ne ben ba-bâ ba-kâm mě kántîk mú ba/firi ké busông.

⁸ Mbé ba-faa ǎ ba/fu, be bii/bírî byi-kâm ǒ kántîk, ké nǎ, byimu byi-ryuu ng byi/fu, ca ne be ké kyikû byi-da-nwa ne banet-Ámon, a-firi kâng onet-dyishí mú kángkáng banet-Gyílet.

⁹ Jéfata o-faa kámbé o/fu, â ba/kpî mě byi-bwa esim dyijê byi-da-nwa ne banet-Ámon, nké Óburúkpâbí o/chi bě byi-kpógê kámbé, me n-firi ng onet-dyishí enen.

¹⁰ Mbé ba-faa ǎ ba/fu, be byi/bángê. Óburúkpâbí o-chi i ntûesé eten.

¹¹ Jéfata o-dim kâng ne banet-ashí-banet-Gyílet, ba-chi ǎ o-firi onet-dyishí ebe. Jéfata o/sét ńkyí nyǐ mu o-ryuu ng ké bushú ḿbú Óburúkpâbí, ké Myízipa.

¹² O-twóm kâng banet o/fu, bada-sét otu-Ámon ba/fu, be byimu byi-shwôn n ebóng bushwôn ne wo. Ebóng aa/kúng byití a-nung ne mbyí ké oshê eten.

¹³ Otu-Ámon o-faa banet-kyitwóm ámbe o/fu, nkéré mú banet-Ézerel ba/byí ké Éjip, ba/koo mě esí kyi-fím ké kace ńké Ánon tete kyi-ribi ké kace ńké Jábok ne kace ńké Jódan to. A-man a-bwa ne esí ányi a-kye mě kántîk ne bunyîn-dyityém.

¹⁴ Jéfata o-chîtwóm banet ba-ca kyikit-otu-Ámon

¹⁵ o/fu, basét ǎ ba/fu, kyi*fí ntûntû něen kyi/fu, banet-Ézerel ba/koo esí nyí Mówep nang nyí Ámon*.

¹⁶ Něen nké kyi/cen, nkéré mú banet-Ézerel ba/byí ké Éjip, mbé ba/cen ké kyikim-dyikán ba-ribi ké dyiga ńdyí Ákwaba ne ba-da-ribi ké Kádyishi.

¹⁷ Ne ba-twóm kâng banet ba-da-sét otu mú Édom ba/fu, omîng kámbé ba-cen ba-shwôm ké esí emen. Nké otu-Édom o*da/bángê kámbé ba-shwôm*. Ba-bí to otu mú Mówep, nké nang nyǐ to o*da/bángê o/fu, bashwôm ké esí emen*. Banet-Ézerel ba-waa ányi kâng ké Kádyishi.

¹⁸ Ba-cen kâng ké kyikim-dyikán, ba-wáp ng ba-câ ké esí-Édom ne nyí Mówep, tete ba-da-ribi ké kyicê ńkyí esû nyi e-byí i ké Mówep, ké kyicê-kace ńké Ánon ńkyí áku. Ba-bi bampyep ebe ányi ḿbé badabi ké kyídí, nké mbé ba*da/nyáng kace ńké Ánon* ké nǎ, nké ka/mû buti ḿbú banet-Mówep.

¹⁹ Banet-Ézerel ba-twóm kâng banet ba-ca kyikit-Otu Síhon mú otu-Ámórit, mú o/mû o-kyú u ké Héshibon, ba-bí ǎ ba/fu, omîng kámbé ba-shwôm ké oshê emen ba-jâ ké esí nyí ebe.

²⁰ Nké Otu Síhon o*da/bángê banet-Ézerel ba-chi éné*. O-kpî basúja emen nang kaacincing ka*da/waa* ba-ba-cibi, ba-bi bampyep-byití ebe ké esí nyí Jáhaz, ba-kye banet-Ézerel bunwa.

²¹ Nké Óburúkpâbí mú Osówo-Ézerel o/chi banet-Ézerel ba-kpógê Otu Síhon ne basúja emen. Banet-Ézerel ba-koo kâng esí emúmú nyí banet-Ámórit ḿbé ba/mû ba-kyú u ányi.

²² Ba-káng ké esí-banet-Ámórit emúmú kyi-fím ké Ánon ké kyicê ńkyí busyísen ba-ribi ké Jábok, ké kyicê ńkyí bushûyû, ne kyi-fím to ké kyikim-dyikán ké kyicê ńkyí esû edabyí ba-ribi ké kace ńké Jódan, ké kyicê ńkyí esû edaríbî e-jâ.

²³ Kyi/mû Óburúkpâbí mú Osówo-Ézerel nké o/ró banet-Ámórit ké bubwô-banet emen, ányi kyi/byí, banet-Ézerel.

²⁴ Wo amu a-ryuu ng kántîk a/fu, wo a-kan n eringe adachîkoo kányí dí. Wo a-man n ewaa ne ńkyí Kémos mú orím-bukye eyên oo/kye ǒ. Nké be to byi-waa ng ne nang ebóng chwǒm ńkyí Óburúkpâbí mú Osówo eten oo/kye bě.

²⁵ Wo a/kabe a/fu, wo a/rêe a-shwôm Otu Bálek mú wǎn-Zípo? mú otu-Mówep? Nyǐ o*da/tigi o-kyé banet-Ézerel byiraa*? Nyǐ o/nwa byití ne banet-Ézerel nang kampén kabónge dí.

²⁶ Banet-Ézerel baa/kyú ké Héshibon ne Áro ne ké eshê nyí nyi ányi fáráng ne mbé, ne ké kángkáng eshê ké bakô-kace ńké Ánon, ké égot-aje ebónge ne bajam-aje batánge. Ebóng ne wo a*da/koo ne esí ányi* tete kurún.

²⁷ Aa*wááng* me n*da ǒ echi ne kyibî*. Wo amu a-chi i kyibî ké byití ḿbyí amu a-nwa ng ne me. Óburúkpâbí nké odakét mpan mún. Nyǐ o/chi o-két mpan kurún kyi-kim ne banet-Ézerel ne ḿbé Ámon.

²⁸ Nké otu-Ámon o*da/fwôo atông ké kyitwóm ńkyín ńkyí Jéfata o/twóm ba-sét ǎ*.

²⁹ Busa ḿbú Busun-Óburúkpâbí bu-nung kâng Jéfata ké byiko. O-dim o-shwôm ké Gyílet ne Manáse, o-bwa esim ké Myízipa mú mu ké esí nyí Gyílet, o-shwôm o-ribi Ámon.

³⁰ Jéfata o-ryí Óburúkpâbí ocím o/fu, â a/chi mě m-kpógê banet-Ámon,

³¹ me n-yip ng onet nang orá mú o/chi o-bwóp kashú o-byí ké kyise ejí o-bâ mě ebakâm, n-shí wǎ eyáré n-kye ǒ, ké nkéré nn/fím ké byití ḿbyí m/kpógê n-fyi. N-kyâ ǒ onet ámu wǎ kyifen echi.

³² Jéfata o-nyáng kâng kace o-bâ ebanwa ne banet-Ámon, nké Óburúkpâbí o/chi ǎ o-kpógê byití.

³³ O/kpet eju kámbé ké Áro tete ba-ribi ké kyikit ńkyí nkyi fáráng ne Myínit, eshê jangjang bujam, tete ba-ribi Ébel-Kerámim. Banet ḿbé o/ju baa*nwa eri* ne banet-Ézerel ba-kpógê kâng banet-Ámon.

Wǎn-Jéfata mú Onyinyi

³⁴ Nkéré mú Jéfata o/bwa esim dyijê ké Myízipa, wǎn emen mú onyinyi o-byí obyíng o-bâ ǎ ebakâm, o-ne ng ane o-bâ, o-só ng kyícícágé to o-bâ. Wǎn ámu o/mû ncen-wǎn emen.

³⁵ Nkéré mú nyǐ o/ri ǎ, o-ját byídí ké byiko, ké bafip, o-wonge o/fu, ííí! wǎn mú ejí, wo amu a-két ng mě dyityém. Kyi/cen nǎ ne kyi-kyú wo nké ada mě echi kyi-ta mě ké dyityém. Me nn/ryí Óburúkpâbí ocím kanong kanong, ne me mm*man echîné*.

³⁶ Wǎn emen o-faa ǎ o/fu, â wo aa/ryí Óburúkpâbí ocím, chi ńkyí a/fu, a-chi i a-kye ǎ, eringe nyí nyǐ oo/chi ǒ éné a-só banet-bushwôn eyên ewa, banet-Ámon.

³⁷ Nké nyǐ o/bí bonchí emen o/fu, ochi ǎ chwǒm něen kyibónge. O/fu, mîng mě abwô ké etukáku efee, eringe nyí ndace ne bacín ejí byi-da-yêe ké eku, byi-ta dyikán byi/fu, me m-man m-kpú onyinchéng n*da/nyît*.

³⁸ Bonchí o-sét ǎ o/fu, oca, o-twóm ǎ o-dim ké etukáku efee. Nyǐ ne bacín emen ba-yú ba-jâ kyíbóng-eku, ba-ta dyikán, ké nǎ, mú mǔ mu o-bâ ebakpú otyép o*da/bé* wǎn to o*da/fwon*.

³⁹ Nkéré mú etukáku ee/bashwôm efee, o-bwa esim o-kâm bonchí emen. Bonchí o-chi kâng ńkyí nyǐ o/mû o/ryí Óburúkpâbí ocím, mú mǔ o-kpú onyinchéng o*da/nyît*. Něen nké édúú nyí banet-Ézerel nyí kpákpá e/sét

⁴⁰ e/fu, wǎsíng-onyinyi o-man n edim ké ací anyii kángkáng dyije eringe nyí odata dyikán ké dyishí-wǎn-Jéfta mú o/fím Gyílet.