Jójis 10 - Bokyi Bible

Tóla

¹ Ké nkéré mú Abyímélek oo/kpú, Tóla mú wǎn-Pwâ, mú bonchí-bonchí emen o/mû o-bángê e Dódo, o/banyii banet-Ézerel. Nyǐ o/mû o/fím ké kyikû-banet ńkyí Ézaka. O/mû o-kyú u ké oshê mú Shámyi, ké esí nyí Éferem, nyí eku éku.

² Nyǐ o/mû onet-dyishí mú banet-Ézerel ké aje bujam esim achât. O-kpú, ba-ryii ǎ ké Shámyi.

Jáyi

³ Nkéré mú Tóla oo/kpú, Jáyi o-ba-twôom, mú o/fím Gyílet. Nyǐ o/kyú onet-dyishí-banet-Ézerel ké aje bujam esim afee.

⁴ O/mû ne bwǎn-banyinchéng ashí bujam esim diǐkpú, ḿbé ba/mû ba-yú u to ké boonyam-atû bujam esim diǐkpú. Mbé ba/mû ne eshê bujam esim diǐkpú, ké esí nyí Gyílet, nyí ba/tôong ba-kó ng kányí eshê nyí Jáyi.

⁵ Jáyi o/kpú ba-ryii ǎ ké Kámon.

Jéfata

⁶ Banet-Ézerel ba/chîchi kyibî ké bushú ḿbú Óburúkpâbí, ké ofê mú ba/kye erím-bakye nyí badakó Bâl, ne nyí badakó Asatáte, erím-bakye to nyí Syírya ne nyí Sádon ne nyí Mówep ne nyí Ámon ne nyí Fyilíta. Ba/né Óburúkpâbí, ba-mîng ǎ to ofê ekye.

⁷ Kafâ ka-sa kâng Óburúkpâbí ne banet-Ézerel, ne o-mîng banet-Fyilíta ne ḿbé Ámon ba-kpógê kámbé.

⁸ Ké aje onyiryiká ne achât, mbé ba/cít kángkáng banet-Ézerel ḿbé ba/mû ba-kyú u ké esí-banet-Ámon, ké kyicê-Jódan ńkyí esû nyi e-byí i, ké esí nyí Gyílet, ba-kye to kámbé busông.

⁹ Banet-Ámon ba-nyáng ne kace ńké Jódan ba-ba-nwa ne byikû-banet ḿbé ba/fím ké kyikû ńkyí Júda ne Běnjámin ne Éferem. Banet-Ézerel ba/mû ké bafip ḿbé baa*nwa eri*.

¹⁰ Banet-Ézerel ba-tii káng ba-kó Óburúkpâbí ba/fu, be bii/chi kyibî ké bushú ḿbú eyên, ké nǎ, be byi/né ǒ wo Osówo eten, byi-kye erím-bakye nyí badakó Bâl ofê.

¹¹ Óburúkpâbí o-faa kámbé něen o/fu, banet-Éjip ne ḿbé Ámórit ne ḿbé Ámon ne ḿbé Fyilíta

¹² ne ḿbé Sádon ne ḿbé Amálek ne ḿbé Máwon ba/mû ba/cít běn ké nkéré mú o/shwôm ké esim, ba-tii ba-kó mě, me n*da běn enyii ké abwô ebe dí*.

¹³ Nké ben ba/né mě ba-kpet ekye erím-bakye ofê. Ne ké bubwô ámbu, me mm*ba/chi n-chî běn enyii*.

¹⁴ Ca n̂g ba-da-tii ba-kó esówo ányi nyí ben baa/cá. Mîng n̂g kányí e-nyii běn â ba/nung ké busông.

¹⁵ Nké banet-Ézerel ba/faa Óburúkpâbí ba/fu, be bii/chi kyibî. Chi nang ebóng chwǒm ńkyí kyi/nyîn ǒ, nké kamgbe, nyii bě kurún.

¹⁶ Ba-pwó kâng erím-bakye ányi, ba-kpet ekye Óburúkpâbí ofê. Kyi-bán ǎ kâng ké dyityém kyi-kim ne bafip ḿbé banet-Ézerel mbe ba-ri ng.

¹⁷ Basúja-Ámon ba-kpá kâng byiko-byití, ba-ba-bi bampyep-byití ebe ké esí nyí Gyílet. Banet-Ézerel ba-ba-cibi barî ba-bi to bampyep ḿbé ebe ké Myízipa, ké esí nyí Gyílet.

¹⁸ Kyikû-banet-Ézerel ne banet-ashí-banet-Ézerel ba-kpet ebí barî kâng ányi ba/fu, yeě o/chi o-bwóp bě kashú byi-da-nwa ne banet-Ámon. Nang yeě nké o/bwóp bě kashú, nyǐ o-firi ng onet-dyishí mú nang yeě nang yeě mú mu ké Gyílet.