Jójis 1 - Bokyi Bible

Banet ḿbé ba/fím ké Kyikû-Júda ne ḿbé Syímyon ba/kpógê Otu Adónyibézek

¹ Ké nkéré mú Jóshwa oo/kpú, banet-Ézerel ba/bí Óburúkpâbí ba/fu, kyikû-banet eten kyirá kyidabwóp kashú kyi-da-kye banet-Kínan bunwa.

² Óburúkpâbí o-faa kámbé o/fu, banet ḿbé ba/fím ké kyikû ńkyí Júda babwóp kashú ba-ca. Me mu n-fâ kámbé esí ányi ké abwô.

³ Banet-Júda ba-raa ne banet-Syímyon kâng ba/fu, bâ n̂g ne be ké kyikû byi-ca ké esí nyí ba/kye bě. Ne byi/chi byi-fé abwô byi-nwa ne banet-Kínan. Byi/chi byi-dim ne ben kâng byi-nung ké esí nyí ba/kye běn. Banet ḿbé ba/fím ké kyikû-Syímyon

⁴ ne ḿbé ba/fím ké kyikû ńkyí Júda ba-fé kâng abwô ké byití enwa ashí amúmú. Óburúkpâbí o-chi kámbé ba-kpógê banet-Kínan ne ḿbé Périzit. Ba-kpógê égot-banet bujam esim etánge ké Bézek.

⁵ Ba-ri Otu Adónyibézek ányi, ba-nwa ne nyǐ,

⁶ o-chêe. Nké ba/rim ne nyǐ ké kyikû, ba-kám ǎ, ba-két ǎ batyép-efwa-abwô ne nyí byiká.

⁷ Otu Adónyibézek o-raa o/fu, me nn/két bajam-batu ḿbé baa*nwa epan* batyép-efwa-abwô ne nyí byiká, ne mbé baa/bwóp ekén-byiryíng ké dyifít-ókpákpúrúk ejí. Kántîk, Osówo oo/chi mě ńkyí m/mû n/chi kámbé. Ba-kpî ǎ ba-bâ ne nyǐ Jerúsélem, o-waa ányi o-kpú.

Banet ḿbé ba/fím ké Kyikû-Júda ba/kpógê Jerúsélem ne Héboron

⁸ Banet-Júda ba-kye Jerúsélem bunwa, ba-koo kámú. Ba-ju banet ḿbé ba/mû ányi. Ba-bwóp okwâ ba-fé ké oshê.

⁹ Ké nkéré mú ńkyín kii/shwôm, ba-dim ba-wâa edanwa ne banet-Kínan ḿbé mbe ba-kyú u ké esí nyí eku éku ne ḿbé mbe ba-kyú u ké byikû-eku ne ḿbé mbe ba-kyú u ké kyikim-dyikán, ké kyicê ńkyí busyísen.

¹⁰ Ba-kye banet-Kínan bunwa ḿbé ba/mû mbe ba-kyú u ké oshê-Héboron. Oshê ámu ba/mû ba-kó ng kámú Kyíryat-Ába. Ba-kpógê banet ányi ḿbé ba/fím ké kyikû-kyikim-banet ḿbé badabángê Shésha ne Ahíman ne Tamyâ.

Otenyêl o/kpógê Oshê-Dyíbyi

¹¹ Fím ányi banet-Júda ba-kye oshê-Dyíbyi bunwa. Ké nkéré ámu, oshê ámu o/mû o-bángê e Kyíryat-Séfe.

¹² Onet-Júda obónge, mú o/mû o-bángê e Kálep, o-raa o/fu, nang yeě nké o/man ekoo oshê mú Kyíryat-Séfe, n-kyâ ǎ wǎn ejí mú onyinyi, mú odabángê Akyísa o-bé.

¹³ Otenyêl mú wǎn-nche-Kálep, mú odabángê Kénaz, o-koo oshê ámu. Kálep o-kye ǎ kâng Akyísa mú wǎn emen o-bé.

¹⁴ Ké dyicí-dyibé, [Otenyêl o-sét Akyísa] o/fu, osét bonchí emen o-kye ǎ kyifát. O-fím kyíbóng-kaanyam-atû emen o-shû kyísí. Bonchí emen Kálep o-bí ǎ ńkyí mu o-kyé ng.

¹⁵ Nyǐ o-faa ǎ o/fu, mu n-ryuu ng n/fu, kye mě byikit ḿbyí mbyi ne omu. Esí nyí a/kye mě nyi jwómjwóm. Kálep o-kye ǎ kâng buce ḿbú budabyí ké bambwo, ḿbú kyicê ńkyí bushûyû ne busyísen.

Dyikpóge ńdyí Banet-Júda ne ḿbé Běnjámin ba/kpógê

¹⁶ Banet ḿbé ba/fím ké kyikû-bonchí-onyi-Músis, ḿbé badabángê Kên, ba-dim ne banet-Júda ké kyikû fím ké Jéríku, oshê mú bayêp báyep, ba-da-nung ké kyikim-dyikán ké kyicê-busyísen-oshê mú badakó Árat, mú mu ké esí nyí Júda. Ba-kûkyú ányi ne [banet-Amálek.]

¹⁷ Banet-Júda ba-dim ne banet-Syímyon ké kyikû. Ba-cibi abwô ba-kpógê banet-Kínan ḿbé ba/mû ba-kyú u ké oshê mú Zéfat. Ba-fé kyibî-nshwam ba-kye oshê ámu, ba-bên kámú, ba-fé kámú dyizîn ńdyí badakó Hóma.

^18-19 Óburúkpâbí o-chwáp banet-Júda, ba-koo esí nyí eku éku. [Nké mbé ba*da/koo] Gáza* ne Áshíkelon* nang Ékoron* ne esí nyí e/wáp kámbé e-fé ké kafâ*. Banet ámbe, ḿbé ba/mû ba-kyú u ké bukô-baya ḿbé Medeterényan, ba/mû ne bamútu ḿbé bubyî-orá budatut, ḿbé ba/chi ké biǐré. Ne ké bubwô ámbu, banet-Júda ba*da/man eró kámbé*.

²⁰ Wǎ eringe nyí Músis o/mû o/sét, ba/kúng Héboron ba-kye Kálep mú o/ró byikû-banet byichât, ḿbyí byi/fím ké kyikû ńkyí Ának ba-byí ké oshê ámu.

²¹ Nké banet ḿbé ba/fím ké kyikû-Běnjámin ba*da/ró banet-Jébus ḿbé ba/mû ba-kyú u ké Jerúsélem*. Ne banet ḿbén ba/waa mbe ba-kyú u ányi ne banet-Běnjámin tete kurún.

Banet-Éferem ne ḿbé Manáse ba/kpógê Bétel

^22-23 Banet-Éferem ne ḿbé Manáse ba/dim ba-wâa oshê mú Bétel bunwa ekye. Ké nkéré ámu, oshê ámu o/mû o-bángê e Lûz. Óburúkpâbí o-chwáp kámbé. Ba-twóm banet-boǒfêp-esí ba-ca ké mǔ. Banet ámbe ba-ri

²⁴ onet mú o/mû o-kú o-byí i o-dim, ba-raa ne nyǐ ba/fu, tông bě eringe nyí byidacen ne byi-nung ké oshê mún, ne be bii*ba/chi byi-némê ǒ*.

²⁵ Onyinchéng ámu o-tông kámbé kâng eringe nyí badacen. Banet-Éferem ne ḿbé Manáse ba-ju kángkáng banet ḿbé ba/mû ké oshê ámu, kyi*da/shwôm onyinchéng ámu ne kyikû-banet emen nké ba/waa*.

²⁶ Onyinchéng ámu o-dim o-jâ ké esí nyí banet-Hyítat, o-bi oshê ányi. O-fé kámú dyizîn, Lûz, ńdyí dyi/tôong éné.

Banet ḿbé Banet-Ézerel ba*da/ró Kámbé*

²⁷ Banet-Manáse ba*da/ró banet ḿbé ba/mû ba-kyú u ké eshê ńnyín* Bét-Shân ne Tának ne Dôo ne Ébyam ne Megído ne boǒshê to ḿbú bu/mû ányi ne mbé fáráng. Banet-Kínan ḿbén ba/waa ányi.

²⁸ Ké nkéré mú banet-Ézerel ba-kú ba-shwane e ba-shwôm kámbé, ba/chi banet ámbe ké busa ba-kûchi bǎmkpóngé ba-kyâ kámbé, nké ba*da/man eró kámbé kángkáng*.

²⁹ Banet-Éferem ba*da/ró banet-Kínan ḿbé ba/mû ba-kyú u ké Géze*. Ké bubwô ámbu, mbé ba/waa ányi ne mbé.

³⁰ Banet-Zébélon ba*da/ró banet ḿbé ba/mû ba-kyú u ké eshê ńnyín* Kyítoron ne Nahálal. Ne ké bubwô ámbu, banet-Kínan ámbe ba/waa mbe ba-kyú u ányi ne banet-Ézerel ḿbé ba/chi kámbé ké busa ba-kûchi bǎmkpóngé ba-kyâ kámbé.

³¹ Banet-Ásha ba*da/ró banet ḿbé ba/mû ba-kyú u ké eshê ńnyín* Áko ne Sádon ne Álap ne Ákyizip ne Héba ne Áfek ne Réhop.

³² Banet-Ásha ba/waa ányi ba-kûkyú ne banet-Kínan ḿbé ba/mû bayén-esí, ké nǎ, mbé ba*da/ró kámbé*.

³³ Banet-Nafatályi ba*da/ró banet ḿbé ba/mû ba-kyú u ké eshê ńnyín* Bét-Shémes ne Bétánat. Banet-Nafatályi ba/waa ányi ne mbé. Nké ba/chi kámbé ké busa ba-kûchi bǎmkpóngé ba-kyâ kámbé.

³⁴ Banet-Ámórit ba/chi banet ḿbé ba/fím ké kyikû-Dǎn ké busa ba-yú ba-jâ ké esí nyí eku éku, ba*da/bángê kámbé ba-shû ba-bâ ké ndege*.

³⁵ Banet-Ámórit ba-waa ányi mbe ba-kyú u ké Ájalon ne Shábim ne ké kaku ńké badakó Héres, nké banet-Éferem ne ḿbé Manáse ba/chi kámbé ba-firi ké bubwô ebe, ba-chi to kámbé ba-kûchi bǎmkpóngé ba-kyâ kámbé.

³⁶ Ké bushûyû-Séla, buti ḿbú [Édom] bu/cen ké kiǐfáng-kaku ńkyí Ákábim.