JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 9 - Bokyi Bible

Ejá nyí Jôp o/faa

¹ Jôp o/faa kâng o/fu,

² ntûntû, me mu n-nyît ng n/fu, nkyi éné. Nké onet o-cen n nǎ ne o-kpógê Osówo ké mpan.

³ Onet o-kán n ké dyishí ne nyǐ nǎ. [Nyǐ o-man n ebí égot-bǎmbím ḿbé onet obónge oo*man efaa*.]

⁴ Osówo mu ne bubong ne busa o-shwôm. Onet o*fí mú odaman ebwom ne nyǐ*.

⁵ Nyǐ mu o-bú ng eku nang ekpu bii*tî* ne mu o-bên n kányí ké kafâ esa emen.

⁶ Osówo mu o-náng ng esí, o-ninge e byikwap ḿbyí mbyi byi-níbî ng kányí.

⁷ Nyǐ o-man n ekye busa óbyísû o-mîng ebyí, ne ékpére to e-mîng esan ne buchú.

⁸ Onet o*fí mú o/chwáp Osówo o-tát bubóng* o-cím nang kiǐnyám-baya ké esim*.

⁹ Osówo o/kpong ékpére ké bubóng, azu-ékpére nyí badakó Kyibî-Enyam ne Nryuu Dyikán ne Bwǎn-Banyinyi Ashí Káchâtkányi ne ékpére-busyísen.

¹⁰ Be bii*nyît kyikû-biǐtí-byěm ḿbyí mu o-chi i* ne biǐtí-akat emen byi*fí ne nkuli kyikû*.

¹¹ Osówo mu o-shwôm m mě ké bushú, nké mm*man ǎ eri*.

¹² Nyǐ mu o-kúng ng ńkyí mu o-ryuu ng, onet o*fí mú oda ǎ eku*. Onet o*fí mú odakan o/fu, nyǐ o-bí ng ǎ o/fu, amu a-chi i ebóng*.

¹³ Kafâ esa ńké Osówo kaa*man* ne o/shiryi banet-bushwôn emen ḿbé ba/chwáp Ráhap mú o/mû kiǐnyám-baya ńkyí kyi/kye ǎ bunwa.

¹⁴ Ké bubwô ámbu, me n-cen n nǎ ne n-já ejá nyí ndafaa Osówo.

¹⁵ Nang n*da/chi chwǒm* ńkyí ndaman echi kyi*da/shwôm n-tîm Osówo mú oda mě epan mpan arông n/fu, ori mě bafip*.

¹⁶ Nang nkyi éné, â o/mîng mě n-raa, mm*man ebángê n/fu, o-fwôo ng atông o-jwo mě*.

¹⁷ Ké nǎ, nyǐ mu o-shiryi ng mě ké afú nyí aryên, ne mu o-némê e mě o-fâ, ńkyí n/chi n*fí n-nyît ng*.

¹⁸ Oo*mîng mě n-shû kiǐnjáng*. Oo/fé mě busa-dyityém ké byiko.

¹⁹ Nkan busa ne Osówo dí. Nfé ǎ ké esuk? Yeě [o/chi o-chi ǎ ne o-ca.]

²⁰ Me n*da/chi chwǒm* ne n/fé dyityém ne Osówo, nké ejá ejí nyi e-raa ng wǎ n/chi kyibî, ne kángkáng byěm ḿbyí mu n-sét ng mbyi wǎ mbyi byi-két ng mpan o-bên mě.

^21-22 Me n*da/chi chwǒm* nké n*fí to n-kérê ng*. Dyikpen ejí dyi*fí to dyi-nyîn n mě*. Chwǒm kyi*fí*. Nang byi*da/chi chwǒm* nang byi/chi, Osówo o-ju ng bě.

²³ Â onet mú o*da/chi chwǒm* o/kpú kiǐmút, Osówo o-jwó ng.

²⁴ Osówo o/chi ejíí o-kye bambên atyém, o-sé kángkáng bankêt bampan achi. Â *chí Osówo nké o/chi kánkyí* yeě o/chi kâng.

²⁵ Ací ejí nyi a-shwôm m babap, dyi*fí nang dyibónge ńdyí ndyi kanong*.

²⁶ Dyikpen ejí ndyi dyi-shwôm m wǎ ókpǐ mú odakwáng o-shwôm, wǎ kiinkwa ńkyí nkyi kyi-róng ng enyam ekám kyísí.

^27-28 Â n/nyet éjwô n-kan eráp bubân ejí, afaníkong ejí kángkáng nyi a-bwa ng esim a-kyé ng mě a-bâ. Me mu n-nyît ng n/fu, Osówo o/két mpan o-bên mě.

²⁹ Ne ké bubwô ámbu kâng, ebóng ńkyí me ndachîkérê.

³⁰ Nsôp o*fí mú odaman esoo byibî ejí*.

³¹ Osówo mu o-twóp ng mě ké dyibíng ńdyí ndyi ne biǐbyém-byiryíng, ne nang byídí ejí éshwân e-kú e-chi i kámbyí eringe nyí byida mě echîcít.

³² Â Osówo o/mû onet, m/mû n-faa ng ǎ ojá. Byi/mû byi-man ece esuk byi-da-tóbê bushwôn eten.

³³ Nké onet o*fí mú oda bě ebwom ké otyém*. Onet o*fí mú oda mě epan mpan ne Osówo*.

³⁴ Osówo, mîng mě busông ekye. *Da mě echîchi n-shî ǒ*.

³⁵ Me n*fí n-shî ng*. N-kú m-bâ eraa, ké nǎ, mu n-nyît ng dyityém ejí.