JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 7 - Bokyi Bible

¹ Dyikpen-onet ndyi wǎ bǎmkpóngé-súja ḿbé batíríng, ne ndyi wǎ dyikpen ńdyí bǎmkpóngé ḿbé mbe ba-sóng ng,

² ne ndyi wǎ ósóng mú mu o-kyé ng kyikit ńkyí chee, ne ndyi to wǎ nchi bǎmkpóngé mú mu o-bám m akpuga-bǎmkpóngé emen.

³ Otukáku ne otukáku me mu m-kpen n dyikáá. Buchú ne buchú mbu bu-bâ mě ne bafip.

⁴ Ké nkéré nn/rí sáre n-raa ng n/fu, me n-jwóbê ng nkéré orá. Me mu m-bínê e buchú bumúmú ne n-ryuu ng n/fu, dyicí dyicé.

⁵ Enyam-byiko ejí ee/sú ne banyabang. Biintíngene-byibáp bii/cít kányí. Bafyí mbe ba-byí i mě ké byibáp.

⁶ Ací ejí nyi a-shwôm m okabe mú ndanyange o*fí*. Nyi a-shwôm m babap a-shwôm ága nyí nyi a-zim m byídí.

⁷ Ô Osówo, zîim a/fu, dyikpen ejí dyi*fí dyi-byí i chwǒm*. Bunyîn-dyityém ejí boo/man.

⁸ Wo amu a-ri ng mě kántîk, nké aa*ri mě to ne banyá*. Â a-kú a-kyé ng mě, ányi me nn/dim.

^9-10 Onet mu o-kpú u oo*bwa to esim ne banyá* wǎ ófíbí mú mu o-rím m o-dim. Kángkáng banet ḿbé ba/mû ba-nyît ng onet ámu ba-ráp ng ǎ.

¹¹ Aa*wááng*. Mm*man ecíbî pyêp*. Nkyi kyi-sa ng mě, ne nkyi kyi-ruu ng mě. M-man n-raa.

¹² Ebóng ńkyí amu a-bám m mě wǎ onet-mgbokobá. Wo amu a-kabe ng a/fu, me n-chi i kiǐnyám-baya?

¹³ Me mu n-rí i sáre n-kan n/fu, n-jáng, n-kyé ng n/fu, bubân ejí buchee.

¹⁴ Nké wo amu a-chi i mě n-shî ké barê eri. A-chi mě n-shî ké byěm eri ké burê.

¹⁵ Ké bubwô ámbu, kyi-chi i mě ńkyí ndabángê dyishwân kyi-shwôm ńkyí ndakpen ké dyizong-bafip ḿbén ḿbé mbe mě ké byiko.

¹⁶ Me nn/zú dyityém. Me nn/kyee ne dyikpen. Zú mě abwô kâng. Dyikpen ejí dyi*fí dyi-byí i chwǒm*.

¹⁷ Ebóng ńkyí onet mu ǒ kiǐtí. Ebóng ńkyí amu a-fwôo ng atông ké byěm ḿbyí nyǐ mu o-chi i.

¹⁸ Wo amu a-kpúrî ng ǎ kángkáng dyicófóróng a-kan n ǎ kángkáng nkéré.

¹⁹ Wo aa*bírî kashú kú ka-bwon*? eringe nyí me ndamyii akorong ejí*?

²⁰ Kiinfê banet mgbokobá, byibî ejí bii/némê ǒ? Ebóng ńkyí wo aa/chi mě n-firi kyikit ńkyí adakan etím abán eyên. Me n-chi i ǒ dyitû ńdyí ndyi dyi-ró ng ǒ dyi-shwôm?

²¹ Wo aa*man mě epwoo byibî*? ne ké kyibî-chwǒm ńkyí mu n-chi i*? Me n/firi ké ocím-dyikun ejí, ne me mm*ba/chi n-chîkyú* ké nkéré a-kú a-kyé ng mě.