JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 6 - Bokyi Bible

Ejá nyí Jôp o/faa

¹ Jôp o/faa kâng o/fu,

² â ba/mû ba/kan afaníkong ejí ne bafip ejí ké érúmá,

³ burô ebe bu-jê ng bu-shwôm ḿbú éshíshě nyí nyi ké baya. Ké bubwô ámbu, byibî-ejá ejí byi*da běn ekyú chwǒm-akat*.

⁴ Osówo mú o/rêe o-shwôm oo/ché mě abán, ne dyífa-abán ányi ndyi dyi-káng ng mě ké byiko. Osówo oo/wuri bushî wǎ etáng-basúja o-tî mě.

⁵ Kaanyam-atû ne mpong bii*faa ojá ké nkéré byi-kú byi-ryí i biǐbyâa*.

⁶ Nké yeě odaman eryí byiryíng ḿbyí bii*nyîn* ne byi*fí ne bano*. Ebóng bunyîn mbu ké kyikit-dyícě-ekwa ńkyí nkyi kpárádádát.

⁷ Me ocím oo*nyîn mě ké azong-byiryíng ányi* ne kángkáng byěm ḿbyí mu n-ryí i mbyi byi-chi i mě [n-rwôm m.]

⁸ Ebóng ńkyí Osówo o*fí o-kyâ mě ńkyí mu m-bí ng*. Ebóng ńkyí o*fí o-faa ng mě ojá ké nshwam ejí*.

⁹ Kyi/mû kyi/chi kyi-nwa ńkyí oda mě eju ojǔng.

¹⁰ Â m/mû n-nyît ng n/fu, o-ju ng mě, me m/mû m-pyiryi ng kyíbóng ké bunyîn-dyityém, nang bubân ejí bu/jê nǎ! Me mu n-nyît ng n/fu, Osówo mu kanong. Me n*da/né ne ńkyí nyǐ mu o-sét ng o/fu, bachi*.

¹¹ Ebóng busa ḿbú me mu ne mbú ḿbú ndakpen n-ca kashú. Ebóng ńkyí me ndakpen n-ca kashú, chwǒm ńkyí me ndatî achi kyi*fí mě*.

¹² Ba/chi mě me ké buká? Enyam-byiko ejí e-chi i kiǐré?

¹³ Me n*fí to ne busa ḿbú ndanyii byiko ejí*. Kyikit kyi*fí ńkyí ndabírî n-kyé ochwâp*. [

¹⁴ Me mu n-ryuu ng bacín ḿbé ba/cángê dyityém ké afaníkong wǎ ńnyín, nang nn/né Osówo mú o/rêe o-shwôm, nang n*da/né*.]

¹⁵ Nké ben, bacín ejí, bamu ba-nîm m mě wǎ buce ḿbú budanúng ké nkéré omu o*fí o-na ng*.

¹⁶ Buce boo/sú ne abíp,

¹⁷ nké ké nsísóngé, abíp ányi a-rím m, ne buce bu-núng bu-firi kafâ dyikáá.

¹⁸ Bancen ne boonyam-atû mbe ba-tánê e ké omu ekyé. Mbe ba-yêe ng ké kyikim-dyikán ba-kpú u.

¹⁹ Banet-bucen ḿbé Shéba ne Téma mbe ba-tî ng achi,

²⁰ nké achi ebe etî a*fí a-byí i kámbé chwǒm* ké bukô-buce ḿbú boo/núng*. [

²¹ Ben bamu mě wǎ buce ámbu.] Ben bamu ba-ri ng bukyû ejí ba-king ng ba-bwa ng ké esim ké bushî.

²² Me mm/bí běn n/fu, kye n̂g mě eyáré? m-bí běn n/fu, kye n̂g nang onet ngu ké bubwô ejí?

²³ m-bí běn nang n/fu, nyii n̂g mě ké abwô nyí onet-bushwôn ejí? nang ké nyí onet mú mu o-cít ng mě?

²⁴ Kyi/kwárê, tángê ê mě, ba-sét mě byibî ejí. Me n-cíbî ng pyêp n-jwo běn.

²⁵ Byiraa ḿbyí ntûntû mbyi ne busa, nké ben bamu ba-raa ng byiraa ḿbyí byi*da/byí chwǒm*.

²⁶ Ben bamu ba-kabe ng ba/fu, me n*fí n-raa ng chwǒm* kyi-cibi ne byisédéng*. Ebóng kâng ńkyí ben bamu ba-faa ng byiraa ejí ḿbyí nn/zú okabe.

²⁷ Ben ba-man n etwóp nang ámám ké bwǎn-byibén, ba-chi esang ba-kye byiko enen ba-shee bacín-dyityém enen.

²⁸ Tún n̂ mě achi ké bushú, me nn*sét byisédéng*.

²⁹ Mîng n̂g kpá. Mîng n̂g acît eryí. *Da n̂g ekét mpan o-bên mě*. Me n*da/chi kyibî*.

³⁰ Nké ben bamu ba-kabe ng ba/fu, me mu n-sét ng byisédéng. Bamu ba-kabe ng ba/fu, me nn*nyît ńkyí nkyi ntûntû ne ńkyí kyi*fí ntûntû*.