JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 5 - Bokyi Bible

¹ Jôp, kó onet. Onet mu kô mú oda ǒ efaa ojá? Orím mú onong orá mú wo a/chi a-bírî a-kâm kámú.

² Ké ntûntû, kiikuku kyi-ju ng enyam-onet, ne orêm o-ju ng onet mú o*fí o-nyît ng chwǒm*.

³ Me nn/ri enyam-banet ḿbé mbe wǎ ka/nwa kámbé, nké ba/fé kiǐmút-kyibî-nshwam kyi-kim ne byise ebe.

⁴ Bwǎn ebe ḿbé banyinchéng baa*ri kyikit ńkyí mbé ba/chi ba-fem ne banyá*. Onet o*fí mú o/chi o-bwom kámbé ké esim ké esuk*.

⁵ Banet-esong ba/chi ba-ryí byíkwôn ḿbyí enyam-onet. Mbé ba/chi ba-ryí [nang esang-byichí nyí nyi e-kán n cibicibi ne byiwong,] ne orêm o/chi o-chi banet ḿbé omu mu o-jê ng kámbé ké efang nyí enyam-onet.

⁶ Ké nǎ, byibî byi*fí byi-byí i ké ecing* nang afaníkong a*fí a-byí i ké esí*.

⁷ Nké ba-fwon n onet ba-tî ké afaníkong wǎ eringe nyí [bamkpát-okwâ mbe ba-byí i ba-jâ kyíbóng.]

⁸ Â me, me m/mû m-bírî ng n-kâm Osówo, n-sét ng ǎ mpan ejí.

⁹ Be bii*nyît kyikû-biǐtí-byěm ḿbyí nyǐ mu o-chi i* ne biǐtí-akat emen bii*nwa epan*.

¹⁰ Nyǐ mu o-chi i omu o-na ké ejíí, o-pwó ng omu ké byifát.

¹¹ Ké ntûntû, Osówo nké mu o-bêem m onet mú mu kyísí, ne mu o-kyâ banet ḿbé mbe ké bafip bunyîn-dyityém.

^12-13 Nyǐ mu o-bên n okabe mú banet-boǒjwám, ne mu o-kám m banet-byinyídíng ké ekabe ebe, eringe nyí mbé baa*ri bukwóp* ké nang ebóng ńkyí mbé mbe ba-chi i*.

¹⁴ Mbé mbe ké kyifip nang ne esû.

¹⁵ Nké Osówo mu o-nyii ng [banet-kyikpu] ké bukyû, ne mu o-nyii ng banet ḿbé ba*fí ne chwǒm* ké abwô nyí biǐtí-banet.

¹⁶ Nyǐ mu o-chi i banet-kyikpu ba-kyú ne okabe mú ba/chi ba-já chwǒm, ne mu o-cít ng ecím nyí bambên atyém.

¹⁷ Bunyîn-dyityém mbu ne onet mú Osówo mu o-tángê e ǎ dyishí. Ké bubwô ámbu, *dané Osówo mú o/rêe o-shwôm ké nkéré nyǐ o-kú o-raa ng ne wo*.

¹⁸ Osówo mu o-némê e banet, nké nyǐ mu o-bwá ng byinêm ámbyi. Nyǐ mu o-díp ng banet, nké abwô emen nyi a-man n bubân.

¹⁹ Nyǐ o-nyii ng ǒ kampén kampén ké afaníkong.

²⁰ Nyǐ o-tî ng ǒ okpó ké nkéré esong, ne o-ku ng ǒ ké bukyû ké nkéré-byití.

²¹ Osówo o-nyii ng ǒ ké byibî byiraa, ne o-nyii ng ǒ ké nkéré bukyû bu-kú bu-bâ.

²² Wo a/chi a-jwó ké nkéré bukyû ne esong, ne aa*ba/chi a-shî byibî-enyam*.

²³ Aká aa*ba/chi a-chi ké byifát eyên ḿbyí amu a-chi i*. Byibî-enyam bii*ba/chi byi-nwa ne wo*.

²⁴ Wo kâng a/chi a-kyú ké bunyîn-dyityém ké kyise eyên. Ké nkéré mú aa/kpúrî ebû eyên, a-ri ng kányí kerededet.

²⁵ Wo a/chi a-kyú ne bwǎn chwóó wǎ byiká-biǐbyâa ḿbyí mbyi ké aro.

²⁶ Wo a/chi a-kpen a-wu wǎ esang-byichí nyí edakán e-bwon tete nkéré mú badabóng kányí.

²⁷ Jôp, be bii/kyé kyikû ké nkyí, nkyi ntûntû. Ké bubwô ámbu, kántîk, bángê ké nkyí.