JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 41 - Bokyi Bible

¹ Wo a-man n ekám kiǐnyám-baya wǎ mgbalíp ké byílôp? a-bwá nang kabyíbabang emen ké orí?

² A-man n efé orí ké ozóng emen? a-fé kámú nang byílôp ké ocím?

³ O-tîm m ǒ arông o/fu, wo azú kámú abwô? O-tîm m ǒ arông o/fu, wo ari kámú bafip?

⁴ O-bángê e ne wo, o-ryí ǒ ocím o/fu, mǔ o-kyú u ǒ ḿgbán kángkáng nkéré?

⁵ Wo a-bwá ng kámú a-tî wǎ kanurung ńké acáá echi? a-tî wǎ chwǒm ńkyí bǎmgbán eyên ḿbé banyinyi badakûjwó?

⁶ Bankâm ekworê ba/chi ba-raa kasî ńké badaré kámú? Bancen kasî ba-két ng kámú byikim ba-shee dí.

⁷ Wo a-man n etím kámú byíbye ké enyam-byiko nang ké dyishí dí.

⁸ Ta kámú kabónge ne aa*ba/chi a-chîkan*. Aa*ba/chi a-ráp bunwa ámbu*.

⁹ Nang yeě nké o/ri mgbalíp ámu asa a-man n ǎ, o-myii kyísí.

¹⁰ Ké nkéré kii/buu kámú, o-kûchi bushî, onet o*fí mú odacíp o-bwom kámú ké bushú*. [

¹¹ Yeě mú odarim bunwa ne mǔ ne o-fem. Onet o*fí ké ejíí emúmú*.]

¹² Mîng mě n-sét ǒ kyi-kim ne byiká ḿbyí mgbalíp ámu ne eringe nyí o/rêe ne busa ḿbú mu ne mbú.

¹³ Onet o*fí mu odaman eját kiintaa-esim emen* o-rim nang [nkyû-byití] mú o/fé*.

¹⁴ Yeě odaman echi kámú o-bâa byibî-ocím emen ḿbyí byibî-asháng ámbyi bii/sú ké mbyí. [

¹⁵ Esim] emen ba/chi kányí ne etáng-édem nyí ba/bwá kányí kyikit kyibónge, ne e-shwane e wǎ buká.

¹⁶ Édem nang erá ba/sît kányí ne nnyinyěng kanong kanong. Nang onyin-bufú oo*man eshwôm ké nyǐ*.

¹⁷ Ba/bwá kányí kángkáng e-shwane kanong kanong mú chwǒm nang kyibónge kii*man epii kányí kyi-tî cát*.

¹⁸ Kiinwángé kyi-san n ké nkéré oo/jâa éjâa, ne achi emen a-san n wǎ óbyísû-dyicófóróng.

¹⁹ Bumang-okwâ ne esat byi-byí i kámú ké ocím.

²⁰ Erúkwâ e-byí i kámú ké ozóng wǎ erúkwâ nyí nyi e-fím m ké biǐbyâa ḿbyí mbe ba-shí i ké kyikû-katí.

²¹ Kiǐnjáng ńkyí mgbalíp ámu kyi-chi i okwâ o-kpet emang, ne bumang-okwâ bu-byí i kámú ké ocím.

²² Kyitông emen kyi/jê busa kanong kanong ḿbú mbu bu-chi i kángkáng banet ḿbé badakwárê ne mǔ ba-kûshî.

²³ Kyikit kyi*fí nang kyibónge ké enyam-byiko emen ńkyí nkyi degedege*. Nang kyirá nkyi kyi-shwane e, ne kii*nwa eta* wǎ kiǐré.

²⁴ Dyityém emen ńdyí ndyi wǎ buká dii*shî chwǒm*. Dyi-shwane e, ne dii*nwa eta* wǎ buká-byěm ekwa.

²⁵ Ké nkéré oo/bûu nensang nang banet ḿbé [mbe ne busa ba-shwôm] ba-shî ng, baa*man to echwáp byiko ebe*.

²⁶ Kashwám ka*fí* nang kyíbye* nang dyibán* nang mpyi* ḿbyí byidaman enémê kámú*.

²⁷ Kiǐré nkyi kámú degedege wǎ kyiká-kiǐbyâa ne wǎ kyikwón ńkyí kyi/fwoo.

²⁸ Dyibán dyi*fí ńdyí dyidachi kámú o-chêe*. Aká nyí mbe ba-tím m kámú nyi kámú wǎ byiká-biǐbyâa.

²⁹ Kyikim-ochí nkyi kámú wǎ kyiká-kiǐbyâa, ne o-jwó ng éjwô ké nkéré banet ba-kú ba-tím m kámú byíbye.

³⁰ Biǐfágé ḿbyí mbyi kámú ké dyifít mbyi wǎ biǐcíncáng. Mbyí byi-ját ng esí nyí nyi biǐntóng biintong wǎ biǐré ḿbyí byidaját esí.

³¹ O-buu ng baya ḿbé baryên wǎ omu mú mu o-fyí i, ne mu o-chi i kámbé biimpún wǎ bakút ḿbé mbe ba-fyí i.

³² Kiǐfáng ńkyí ragerage kyi-byí i kámú ké esim kyi-câ, ne mu o-chi i baya ḿbé baryên ba-firi ne biǐnfyiryî ḿbyí kpárádádát.

³³ Chwǒm kyi*fí ké ejíí* ńkyí badakan ne mǔ*. Mǔ o-chi i enyam nyí e*fí ne bushî*.

³⁴ Oo*kúng enyam nang nyí edatông byiko e-shwôm wǎ chwǒm*. Nkyí nké mu otu mú kángkáng enyam-dyikán.