JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 4 - Bokyi Bible

Mbwôp Kashú-Bǎmpém

¹ Elyífaz mú o/fím oshê mú Táman o-faa o/fu,

² kyi-sa ng ǒ, ǎ Jôp, â me n/faa ojá? Me mm*man to ecíbî pyêp*.

³ Wo aa/tángê banet chwóó, a-chi banet ḿbé abwô degedege ba-firi ne busa.

⁴ Ejá eyên e-chi i onet mú mu kyeekyee ne o-kú o-bâ emyii o-shwane dyityém.

⁵ Nké kántîk, kii/bê kyi-kâm ǒ, wo a*fí to a-man n eryí ofit*.

⁶ Wo a/mû a-kyâ Osówo ofê, ne dyikpen eyên dyi/mû dyi*fí ne ébîn* ké bubwô ámbu, tî dyityém eyên ne okabe eyên ké Osówo.

⁷ Kabe kpá. Bún nkéré obónge mú onet mú mu o-chi i kanong oo/kpú.

⁸ Me nn/ri banet ba-kpang byibî wǎ byifát, ba-kwón atyém ebên wǎ esang-byichí. Kántîk, mbé ba-fuu ng atyém ebên ne byibî.

⁹ Osówo, ké kafâ esa, mu o-man n ne mbé wǎ bufú ḿbú buryên.

¹⁰ Bambên atyém mbe ba-fém m ba-pám m bakân wǎ ekpang. Nké Osówo mu o-cít ng kámbé ocím o-zóngê kámbé asháng.

¹¹ Mbé mbe ba-kpú u wǎ ekpang nyí e*fí ne chwǒm ńkyí edaju e-ryí* ne bwǎn ebe kángkáng ba/firi byiryibyiryi.

¹² Nkéré obónge, kyitwóm kyi/bê kajii kájii ńkyí kyi/sóng mě ejwo.

¹³ Kyi*da mě ebángê n-rê burê* ké nǎ, kyi/mû mě wǎ m/mû n-ri ng kyibî-burê.

¹⁴ N/tím banê, byiko ejí kángkáng byi-náng ne bushî.

¹⁵ Bufú bu-ta mě ké bushú, ne eji ejí e-dim mě nyaang ne bushî.

¹⁶ N-ri chwǒm áku cip. N-tún kánkyí achi, nké n*da/cêe kánkyí*. Ne n-jwo ejá ké kyikit ńkyí kyi/mû pyêp nyí e/fu, [

¹⁷ onet o-man echi kanong ké bushú ḿbú] Osówo? [o-kyú nang kpárám ké bushú ḿbú] nyǐ mú o/mee ǎ?

¹⁸ Osówo oo*fé dyityém ké bǎmgbán emen ḿbé kyíbóng*. Nyǐ o/bángê o/fu, nang barím emen ḿbé banong mbe ba-chi i kyibî.

¹⁹ Wo a/kabe kâng a/fu, nyǐ o-fâ dyityém ké chwǒm ńkyí ba/kúng ecing ba-chi? ńkyí badaman eshiryi wǎ kiinkyúrunkyû?

²⁰ Onet o-man n ekyú okpó ké dyicófóróng, nké o-man n ekpú baa*nyît* ne dyikurúku dyi-kûfyi.

²¹ Ba-kúng ng kángkáng byěm ḿbyí nyǐ mu ne mbyí ba-dim ne mbyí. Nyǐ o-kpú u bubong oo*kyú ne mbú*.