JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 39 - Bokyi Bible

¹ Wo amu a-nyît ng nkéré mú badafwon ebû-dyikán? Wo aa/ri ké enyam-dyikán wǎ etong e-kú e-fwon n wǎn?

² Wo amu a-nyît ng nkéré mú dyifít ebe dyidarí? Amu a-nyît ng nkéré mú bufwon ebe?

³ Wo amu a-nyît ng nkéré mú e/chi e-tím arông kyísí e-fwon wǎn e-tî ké ejíí?

⁴ Bwǎn ebe ba-kán n ké kafâ-dyikán ne bushwane. Ba-dim, esim baa*bwa to*.

⁵ Yeě o/chi boonyam-atû ḿbú ké dyikán bu-kyú ké byiko ebe. Yeě o/mîng kámbú abwô bu-kûyêe ké byikit.

⁶ Me n/kye kámbú dyikán n/fu, dyikyú byise ebe, ne m/mîng kámbú bu-kûkyú ké esí-bano.

⁷ Boo*kyú fáráng ne kyicoge ńkyí eshê* ne onet o*fí mú odaman echi kámbú bu-firi byitú* o-chi kámbú bu-chi bǎmkpóngé*.

⁸ Eku nké nyi byikit ḿbyí budaryí baryî, ne ḿbyí budakyé eshǎan nyí budaryí.

⁹ Nkóngé o-chi i ǒ bǎmkpóngé? o-bángê o-rí dyicí dyi-cé ké mpyep-byitú eyên?

¹⁰ A-man n eníbî obónge ké orí o-kpang ǒ kyifát? a-chi nang kámú o-tû ǒ byěm ké kyifát eyên?

¹¹ Wo a-man n etî dyityém eyên ké kiǐtí-busa emen, o-chi ǒ bǎmkpóngé ḿbé baryên?

¹² Wo amu a-tî ng achi a/fu, otû esang-byichí eyên o-bâ ǒ ne nyǐ ké kyikit ńkyí amu a-kim m kányí? [

¹³ Kanurung ńké badakó ósitirik ka-díp ng abyibabang emen ochéé óchee. Nké ka*fí ńké kadaman ebyí wǎ kanurung ńké badakó sitôk*.]

¹⁴ Ósitirik mu o-mîng ng ácě emen ké ecing eringe nyí kiinsóngé ńkyí nkyi kyi-fím m ké ecing kyidachi kányí a-waa ne busông.

¹⁵ Oo*nyît o/fu, enyam e-man n ecím kányí e-sé*.

¹⁶ O-chi i éné wǎ ácě, *chí nyí emen* ne o*fí o-kérê ng o/fu, busa emen bu-waa ng kyísí dyikáá*.

¹⁷ Me n/chi ǎ o-róng enyam, ne n*da ǎ ekye bubong*.

¹⁸ Nké ké nkéré [o-kú o-zóngê e ochéé,] o-man n ejwó nyû kabyî-orá nang orá ne kabyî-orá emen.

¹⁹ Wo, ǎ Jôp, nké a/chi bubyî-orá bu-kyú ne busa? Wo nké a/kye kámbú byíchwan?

²⁰ Wo nké a/chi kámbú bu-kûnyíp wǎ agurubí? Wo nké a/chi kámbú bu-kûtut bufú ké ozóng bu-fé banet bushî?

²¹ Bu-sím m esí ké owo ne bu-kpû ng dyishí ké byití ne busa ebe kángkáng.

²² Mbú boo*nyît kyi-kim ne bushî* ne kashwám ka*fí ńké kadachi kámbú bu-pín esim*.

²³ Byiyám ḿbyí banet ḿbé ba/yú ké mbú byi-murung ng ne barî byi-kédê ng kasabang ké óbyísû.

²⁴ Bubyî-orá bu-zóngê e bu-câ kashú bu-tím m banê ké byiko, ké nkéré ba-kú ba-jwá ng biintán, boo*man to ebwom kyikit kyibónge*.

²⁵ Nang nkéré orá nké ba/jwá ntán, mbú bu-tut ozóng. Bu-man n ejwo kyinung-byití ne bu-fárâng kámbyí, ne bu-jwo ng ké banet-ashí-basúja mbe ba-nyán n byití.

²⁶ Wo a-tángê e kakô eringe nyí kadabyí? ké nkéré kaa/paam abyibabang ka-bírî busyísen?

²⁷ Kiinkwa kyi-bám m ǒ a-kye busa ne kyi-chi dyiju emen kyíbóng-eku?

²⁸ Nkyí nkyi kyi-chi i dyiju ké aká nyí a/nyâam a-shwôm, kyi-chi kyikit ńkyí baa*man eyú* kyikit-dyirem emen.

²⁹ Ké kyikit ánkyi nké kyidakpúrî byikit ḿbyí fáráng ne ḿbyí tete ké chwǒm ńkyí kyidaju kyi-ryí.

³⁰ Biinkwa mbyi byi-zû ng ké byikwóm-enyam, bwǎn ebe ba-zíp ng baróng.