JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 23 - Bokyi Bible

Ejá nyí Jôp o/chîfaa

¹ Jôp o-chîfaa kâng o/fu,

² me n/tôong m-bwom m bunwa ne Osówo n-sét ng ǎ ńkyí nkyi mě ké kafâ. Mm*man to ekâm byiko ké bafip ejí*.

³ Kyi/mû kyi/chi kyi-nyîn mě kanong kanong â m/mû n-nyît ng kyikit ńkyí nda ǎ eri, ne â m/mû n-nyît ng eringe nyí ndace ké kakyúng-butu emen.

⁴ Me n/chi n-sét mpan ejí ké bushú emen n-sét byěm kángkáng ḿbyí byida mě echwáp.

⁵ Me mu n-ryuu ng n-nyît ńkyí o/chi o-sét, ne eringe nyí o/chi o-faa mě.

⁶ Osówo o-yip ng busa emen kángkáng o-nwa ne me dí. Aa*wááng*. O-jwo ng ké nkéré n-kú n-raa ng.

⁷ O/mû o/chi o-jwo byiraa ejí o-nyît o/fu, me mu n-sét ng ntûntû, [o-két mpan mú o/chi o-nwa mě] ne banyá.

⁸ Me nn/kyé ké kyicê ńkyí óbyísû mu o-byí i, nké Osówo o*fí ányi*. N*da ǎ eri ké nkéré n/kyé ǎ ké kyicê ńkyí óbyísû mu o-ríbî ng*.

⁹ Osówo o/mû mu o-chi i bǎmkpóngé ké kyicê ńkyí bushûyû ne ńkyí busyísen, nké nang ké nkyi éné, n*da ǎ eri ne*.

¹⁰ Nké Osówo mu o-nyît ng kyiká-bucen ejí nang kyirá. Â nyǐ o/kan mě, o-ri ng mě kpárám.

¹¹ Me mu n-fâ dyityém n-cen n ké bukwóp ḿbú nyǐ o/cá. N*fí n-yêe ng n-jâ kyicê kyikíri ne banyá*.

¹² Me kángkáng nkéré mu n-chi i ńkyí Osówo mu o-sét ng. Me mu n-chi i ńkyí mu o-ryuu ng, *chí ńkyí me mu n-ryuu ng*.

¹³ Nyǐ oo*yángê ne banyá*. Onet o*fí mú odaman ebwom bunwa ne nyǐ* o-chi ǎ o-mîng nang omîng ńkyí mu o-ryuu ng o/fu, nyǐ o-chi i*.

¹⁴ Nyǐ o/chi o-chi ńkyí nyǐ oo/kabe o-tî mě. Okabe ámu mu obónge ké burwám-ekabe chwóó nyí mu ne nyǐ.

¹⁵ Me mu n-tím m banê ké bushú emen.

^16-17 Osówo mú o/rêe o-shwôm oo/man ne busa ejí. Osówo nké mu o-chi i mě n-shî, *chí kyifip* nang ké kyifip kii/chi mě n*fí to n-rángê e*.