JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 22 - Bokyi Bible

Bǎmpém ké Kachât

¹ Elyífaz mú o/fím Táman o-faa kâng o/fu,

² onet mu kô mú mu ne bubong o-shwôm, mú odachwáp Osówo?

³ Kanong eyên echi nke ka-byí i Osówo ebóng. Nang kanong eyên ekyú nke ka-chwáp ng ǎ nang onyin dí.

⁴ *Chí ké bubwô ḿbú amu a-shî ng Osówo nké mu o-raa ng ne wo* o-bâ ne wo ké mpan*.

⁵ Aa*wááng*. Nkyi ké bubwô ḿbú aa/chi byibî a-shwôm. Nkyi ké bubwô ḿbú kángkáng byibî-byěm ḿbyí aa/chi.

⁶ Eringe nyí a/chi a-chi wǎn-boné eyên o-só ǒ akpuga nyí o/ryí ǒ, wo a/koo ǎ byídí a-mîng ǎ osíndyíbang.

⁷ Wo a/né banet ḿbé ba/mû baa/kyee omu ekye ba-jwáp, ne a/né banet ḿbé esong e/mû e-nwa ng kámbé byiryíng ekye.

⁸ Wo a/kúng busa ne kakyúng eyên a-koo esí kángkáng.

⁹ Wo a*da/né banyǐnkú nké nke echwáp* nké a/bam to byěm ḿbyí bwǎn-byibén a-koo, ne a/bên kámbé bútûp.

¹⁰ Ké bubwô ámbu, abíng a/wâng ǒ kerékeré, ne bushî boo/byí ǒ kiǐmút ké byiko.

¹¹ Bushî eyên boo/jê bu-shwôm kyifip eringe nyí aa*man to eri* ne kace ńké kaa/sú ka-kú ka-cít ng ǒ.

¹² Osówo o*fí o-kyú u kyíbóng kyíbóng o-tún kyísí o-ri ékpére nang ké nyǐ nyi kyíbóng dí.

¹³ Nang ké nkyi éné, wo amu a-bí ng a/fu, Osówo mu o-nyît ng ebóng. A/fu, éfíbí e/cít ǎ bushú, o-cen n nǎ ne o-pan bě mpan.

¹⁴ Wo amu a-kabe ng a/fu, biigbogbot-éfíbí byi-chi i ǎ oo*ri* ké nkéré o-kú o-cen n ké bakô-ejíí?

¹⁵ Wo amu a-tigi ng a/fu, a-cen n ké kiǐfáng ńkyí byibî-banet mbe ba-cen n kángkáng nkéré?

¹⁶ Kiǐsúsú-kace kyi-kpî ng kámbé ba-jâ ne nkéré ebe o-kûfyi.

¹⁷ Nyín banet ḿbé ba/né Osówo, ne ba/bángê ba/fu, oo*man echi kámbé chwǒm*.

¹⁸ Nang ké nkyi éné, Osówo nké o/chi kámbé ba-firi ne byěm ḿbyí byinong. Me mm*man enyît ekabe nyí bambên atyém*.

¹⁹ Banet ḿbé banong mbe ba-jêe ng, ne banet to ḿbé ba*da/chi chwǒm* ba-jwó ng ké nkéré ba/ri ba-kú ba-kyâ bambên atyém busông.

²⁰ Ba-bên n kángkáng byěm ḿbyí bambên atyém mbe ne mbyí, ne okwâ o-shí i nang ebóng ńkyí kyi/waa.

²¹ Kántîk kâng, ǎ Jôp, chi kyikwáré ne Osówo, ne o/chi o-jware ǒ.

²² Koo byěm ḿbyí nyǐ mu o-tángê e, a-tî byiraa emen ké dyityém eyên. [

²³ Bwa ne byiko eyên kyísí] a-bwa esim a-kâm Osówo, a-man kángkáng byibî ḿbyí mbyi ké kyise eyên.

²⁴ Pwó esang eyên. Zû esang eyên nyí enong enong ké kace ńké kaa/núng.

²⁵ Mîng Osówo mú o/rêe o-shwôm o-kyú ǒ esang eyên. Mîng ǎ o-kyú ǒ akpuga nyí baa/zû dyizu ba-tî ǒ.

²⁶ Ké bubwô ámbu kâng, wo a/chi a-tî dyityém ké Osówo kángkáng nkéré, ne wo a/chi a-ri a/fu, bunyîn-dyityém eyên mbu bu-fím m ne nyǐ.

²⁷ Â a/fé nshwam, nyǐ o/chi o-faa ǒ ojá, ne wo a/chi a-tî ocím eyên mú a/ryí.

²⁸ Kyi/chi kyi-nwa kyi-kye ǒ ké kángkáng ḿbyí amu a-chi i, ne kiinwángé kyi/chi kyi-tông ké kiǐfáng eyên.

²⁹ Osówo mu o-bwa ng ne [bantông byiko] kyísí, o-nyii ng banet ḿbé mbe degere. [

³⁰ O/chi o-nyii ǒ â wo a*da/chi chwǒm* â ńkyí amu a-chi i nkyi kanong.]