JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 2 - Bokyi Bible

Sátan o/chîkan Jôp

¹ Ké nkéré dyicí ńdyí barím ḿbé banong badabwom ké bushú ḿbú Óburúkpâbí dyi/chîfyi, Sátan o/mû ké burwám ebe to.

² Óburúkpâbí o/bí Sátan o/fu, wo a/mû nyá. Sátan o/faa o/fu, me mu n-cen n n-jâ nyín n-jâ nyín, n-yêe ng byikit byimúmú ké ejíí.

³ Óburúkpâbí o-bí Sátan o/fu, kántîk, wo a/kabe nǎ kyi-kim ne Jôp mú ḿgbán ejí. Onet o*fí nang obónge ké ejíí* mú o/fé dyityém ne me* ne mú mu kanong wǎ nyǐ*. Nyǐ mu o-shî ng mě, ne mu o-bám m byiko emen eringe nyí nyǐ oo*chi chwǒm ńkyí nkyi kyibî*. Wo a/tírîng mě n-rim bunwa ne nyǐ dyikáá, nké Jôp o/tôong o-fâ dyityém emen ne me o-câ kashú.

⁴ Sátan o/faa o/fu, onet o-man n ekye kángkáng byěm ḿbyí nyǐ mu ne mbyí eringe nyǐ odakpen.

⁵ Nké kántîk, ta enyam-byiko emen a-ri. Nyǐ o/chi o-bwom ké bushú eyên o-shú ǒ.

⁶ Óburúkpâbí o-sét kâng Sátan o/fu, kyi/kwárê. Nyǐ o/firi ké bubwô eyên, nké *da ǎ eju*.

⁷ Sátan kâng o-dim ké bushú ḿbú Óburúkpâbí, o-chi byibáp byi-byí Jôp ké byiko byimúmú.

⁸ Jôp o-dim o-da-byak ké bukô-dyizu-biǐbyém, o-yip kaǎcê-kiǐcíncáng ńké odapwát byibáp emen.

⁹ Onyi emen o-raa ne nyǐ o/fu, wo a/tôong a-fâ dyityém eyên ké Osówo a-câ kashú? Ebóng ńkyí aa*cábê Osówo a-kpú*.

¹⁰ Jôp o-faa o/fu, wo amu a-raa ng wǎn enyam-onyinyi. Ké nkéré Osówo o/twóm bě chwǒm ńkyí kyinong, be byi/koo kánkyí ne bunyîn-dyityém. Be byi-cen n nǎ kâng ne byi-kûraa ne nyǐ, â o/twóm bě afaníkong. Nang ké kángkáng byěm ḿbyí Jôp o/ri busông, Jôp o*da/raa kyibî ne Osówo*.

Bacín-Jôp ba/bê

¹¹ Bacín-Jôp ashí achât ba/mû Elyífaz mú o/fím oshê mú Táman ne Byíladat mú o/fím esí nyí Shwâ ne Zófa mú o/fím esí nyí Náma. Ké nkéré mbé baa/jwo afaníkong nyí Jôp mu o-ri ng, mbé ba-fé dyicí ba/fu, mbé ba-câ ba-da-fé ǎ dyityém.

¹² Mbé ba/ri Jôp ké nkéré mbé ba/tôong bucen tete, nké mbé ba*da ǎ ecêe*. Ké nkéré mbé ba/cêe ǎ, ba/tii kanong kanong, ba-ját byídí ebe ké byiko ké bafip, ba-pwó édúkǎndú kyíbóng ne ké ashí ebe.

¹³ Ne mbé kâng ba-byak ányi kyísí ne nyǐ ké bafip ké ací káchâtkányi. Onet mú o/faa ojá ne nyǐ o*fí* ké nǎ, mbé ba/ri eringe nyí busông emen bu/jê.