JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 18 - Bokyi Bible

Ejá nyí Byíladat o/faa

¹ Byíladat mú o/fím Shwâ o-faa o/fu,

² Jôp, banet wǎ wo ba-man n ecíbî pyêp? Â a/cíbî pyêp eringe adafwôo atông, be byi/chi byi-sét ǒ byěm.

³ Ebóng ńkyí nkyi kyi-chi i ǒ ne a-kûkabe a/fu, be byimu enyam.

⁴ Wo oyén nké amu a-chi i ka-sa ǒ ké kafâ eyên esa. Osówo o/chi o-fîm kángkáng banet ké ejíí ké bubwô eyên dí. Osówo o/chi o-zú eku eringe kyida ǒ enyîn dí.

⁵ Okwâ mú mbên dyityém ba-man ba-rîp kámú, oo*mang to ne banyá*.

⁶ Otyuryíkáng mú ké kyise emen o/chi o-bírî kyifip.

⁷ Byiká emen byi/mû kyísí shwanshwan, nké kántîk, byěm emen ḿbyí mu o-nam m byi-kú byi-chi i ǎ o-kpán o-myii nyǐ oyén.

⁸ Ké nǎ, kaǎsém kaa/lángê ǎ ké byiká, ne mu o-wâa ng ké dyibíng eróng,

⁹ kaǎtám ka-kám m ǎ ké bankut ka-fé kyísí.

¹⁰ Baa/chi dyígep ba-tî ǎ kyísí, baa/kuu kaǎtám ba-tî ǎ ké kiǐfáng.

¹¹ Bushî mbu bu-wâng ng ǎ byicê byimúmú, ne mbu ne nyǐ ké kyikû nang o-ca nyá.

¹² O/mû ne akpuga chwóó, nké kántîk o/firi esong ésong. Afaníkong nyi a-bwom m a-bám m ǎ ké bukô-kyikpút.

¹³ Kyibî-orwôm kyi/nung ǎ ké byiko ńkyí kyi/chi abwô ne byiká emen byi-fwoo.

¹⁴ Ba/kám ǎ ba-fîm ǎ ké kyise emen ńkyí o/mû o/tî dyityém, ne ba/tut ǎ o-da-bwom ké bushú ḿbú bukyû ḿbú budachi bushî bu-shwôm. [

¹⁵ Kántîk, nang yeě o-man n ekyú ké kyise emen ánkyi] ké nkéré baa/pwó bukye ké nkyí.

¹⁶ Eriri emen ne byire emen bii/jwóm.

¹⁷ Dyizîn emen dii/man ké byise ne kyíjí. Onet o*fí to mú mu o-chî ng ezîim kyi-kim ne nyǐ*.

¹⁸ Ba/chi ba-ró ǎ o-byí ké ejíí. Ba-ró ǎ ké kiinwángé o-jâ ké kyifip.

¹⁹ O*fí ne bwǎn* nang kyikû-banet*.

²⁰ Kángkáng banet, kyi-fím ké kyicê ńkyí esû nyi e-byí i kyi-byí ké ńkyí nyi e-ríbî ng, ba/chi ba-jwo bukyû emen, ba-tím banê ké bushî.

²¹ Ányi bukyû ḿbú byibî-banet, ḿbú banet ḿbé baa*nyît Osówo*.