JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 16 - Bokyi Bible

Ejá nyí Jôp o/chîfaa

¹ Jôp o-chîfaa kâng o/fu,

² me m/mû nn/jwo azong-byiraa ányi. Ben ba-chi i byibî-banfê atyém.

³ Ben baa*ba/chi ba-mîng kyiraa eraa ne banyá*? Ben nké ba/chi ba-raa ba-kúlî kángkáng?

⁴ Â ben nké ba/mû me, ne â me nké m/mû ben, me m/mû m-man eraa kángkáng byěm ḿbyí bamu ba-raa ng. M/mû m-me ng dyishí wǎ onet-bubong n-kye běn, n-fé běn byiraa ké byiko chwóó.

⁵ M/mû n/chi n-fé běn busa ké bacê, ne m/mû n-fâ běn dyityém ké byiraa eraa n-ca kashú.

⁶ Nké chwǒm ńkyí mu n-raa ng nang kyibónge kyi*fí ńkyí nkyi kyi-chwáp ng* ne pyêp ecíbî o*fí o-chi i bubân ejí bu-chee*. [

⁷ Osówo, wo aa/chi mě n-kyee. Wo aa/mîng ba-ju kyikû-banet ejí.

⁸ Wo aa/kám mě. Wo a-chi i onet-bushwôn ejí. Me nn/jwóm ké byiko n-firi byikúú byíkuu, ne banet ba-kú ba-kúng ng kánkyí wǎ me n/chi kyibî ntûntû.]

⁹ Osówo ké kafâ esa oo/jâa mě ké byirî ké byirî. Nyǐ mu o-tún n mě achi ne kafâ esa.

¹⁰ Banet mbe ba-fát ng mě kiikuku. Mbe ba-wâng ng mě ba-díp ng mě akwâ ké bushú.

¹¹ Osówo oo/kúng mě o-kye byibî-banet.

¹² Me m/mû mu n-kyú u ké bunyîn-dyityém, nké Osówo o/kám mě ké omiríng, o-díp mě o-shiryi mě. Osówo mu o-kúng ng mě wǎ kyikit ńkyí odakan etím abán emen,

¹³ ne mu o-châ mě abán nyí nyi a-rim m mě a-némê e mě byicê byimúmú. Nang ké nkyi éné, byiko byi*fí byi-kpú u ǎ ne me*.

¹⁴ Nyǐ mu o-chî ng mě enémê o-fâ. O-nwa ng ne me wǎ súja mú nke ka-sa ng ǎ ka-shwôm.

¹⁵ Me mu n-ta ng dyikán n-fâ ekâa-byídí, ne mu m-byak ng ké édúkǎndú, asa a*fí mě to*.

¹⁶ Me nn/tii tete achi ejí aa/bwam mě ké bushú, ne aa/mut a/firi kyifip kyífip.

¹⁷ Nké me n*fí ne abwô ké bunwa nang bubónge* ne nshwam mú mu n-fâ n-kyâ Osówo mu ntûntû.

¹⁸ Ô esí, *dacít baróng ejí*. *Damîng ba-cít dyikô ejí ńdyí mpan mú acît a*fí*.

¹⁹ Ntûesé ejí mu kô kyíbóng.

²⁰ Bacín ejí mbe ba-cábê ng mě. Achi ejí nyi a-sen n batíí a-kyâ Osówo.

²¹ Me mu n-ryuu ng onet mú odatîm Osówo arông ké bubwô ejí, wǎ eringe onet odatîm arông ké bubwô-ocín emen.

²² Aje ejí a-kú a-shwôm m a-câ, ne mu n-cen n ké bukwóp ḿbú mm*bwa to esim*.