JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 15 - Bokyi Bible

Nnyinyěng-Bǎmpém

¹ Elyífaz mú o/fím Táman o/faa o/fu,

² Jôp, byiraa eyên byi*fí ké kafâ*.

³ Onet-bubong o*fí mú odaraa wǎ eringe nyí amu a-raa ng* o-fu nang ofu nyǐ o-pan n o-fem ké azong-byiraa ányi nyí aa*byí chwǒm*.

⁴ Â ńkyí amu a-raa ng kyi/mû éné, onet o*fí mú o/mû o/chi o-shî Osówo*. Onet o*fí mú o/mû o/chi o-fé nshwam o-kye ǎ*.

⁵ Ńkyí amu a-raa ng nkyi kyi-tông ng dyityém eyên ńdyí a/bên. Wo amu a-kan n edip kándyí ké byiraa-byinyídíng.

⁶ Kyi*fí ńkyí ndachîkét mpan o-bên ǒ*. Byiraa eyên kángkáng bii/két mpan o-bên ǒ.

⁷ Wo amu a-kabe ng a/fu, wo a/mû mbwôp kashú-onet mú ba/fwon? Wo a/mû ányi ké nkéré Osówo o/chi eku?

⁸ Wo a/jwo byěm ḿbyí Osówo o/kabe? Wo kǎnchí nké amu ne bubong ḿbú onet?

⁹ Chwǒm kyi*fí ńkyí wo amu a-nyît ng* ńkyí be byi*fí byi-nyît ng*.

¹⁰ Banet ḿbé ébyî ee/byí kámbé, ḿbé ba/fwon kámbé ba-sí ńchân nké mbe ké burwám eten.

¹¹ Osówo mu o-fâ ǒ dyityém, ebóng ńkyí amu a-né ng kándyí. Be bii/raa ké bubwô emen ne ejá degere.

¹² Nké dyityém eyên dyi*fí beem* amu a-tún n bě achi ne kafâ esa.

¹³ Wo amu a-sa ng kafâ ne Osówo, ne amu a-né ng ǎ.

¹⁴ Onet nang obónge o-man n ekyú kpárám ké ntûntû? Onet nang obónge mu kô mú o/kwárê ké bushú ḿbú Osówo dí.

¹⁵ Ké ntûntû, Osówo o*fí o-tî ng dyityém nang ne barím emen*. Nang mbé ba*fí kpárám ké bushú emen*.

¹⁶ Ne onet mu o-jwáp ng byibî wǎ eringe odajwáp omu. Ké ntûntû, onet o/bên, oo*nwa*.

¹⁷ Jôp, kántîk, fwôo atông a-jwo ńkyí mu n-nyît ng.

¹⁸ Banet-bubong baa/tángê mě byěm ḿbyí ntûntû ḿbyí banchí ebe ba/tángê kámbé. Mbé ba*da/dip chwǒm nang kyibónge*.

¹⁹ Esí ebe e/mû e*fí ne bacinbánet*. Onet o/mû o*fí mú odachi kámbé ba-bírî Osówo esim*.

²⁰ Mbên dyityém mú mu o-cít ng barî-banet o-waa ng ké busông tete o-kpú.

²¹ Ejá-bushî e/chi e-wonge ǎ ké atông, ne bambam banet byěm ba-koo ba/chi ba-nwa ne nyǐ ké nkéré o-kú o-kabe ng o/fu, nyǐ oo/fem.

²² Nyǐ o*fí o-bángê e o/fu, nyǐ o/chi o-fem ké kyifip* ké nǎ, kashwám ńké kada ǎ eju nke ka-bám m ǎ,

²³ ne [biinfuu akun mbyi byi-bám m] kyikwóm-enyam-byiko emen eryí. Nyǐ mu o-nyît ng o/fu, ací emen nyí ké kashú nyi kyifip kyífip.

²⁴ Ne busông mbu bu-bám m bu/fu, mbú bu-nwa ng ne nyǐ wǎ otu mú mu ne busa.

²⁵ Ányi bukyû ḿbú onet mú mu o-nyîim m égbi o/fu, nyǐ o-kíbî ng Osówo, ne mu o-bírî ng bunwa ne nyǐ mú o/rêe o-shwôm.

^26-27 Onet ámu mu o-tông ng byiko ne mu o-bírî ng bunwa. Nyǐ mu o-níbî ng édem emen ké dyityém erêe, ne mu o-zóngê e o/fu, nyǐ o-nwa ng ne Osówo.

²⁸ Onet ámu nké o/kpógê eshê, o-bam byise ḿbyí bayén baa/chêe o-koo. Nké byití byi/chi byi-bên eshê ányi ne byise.

²⁹ Oo*ba/chi o-kyú nfang-onet ka-rí*. Nang ebóng ńkyí mu ne nkyí kii*ba/chi kyi-rí*. Nang [kiǐríribí] emen kyi/chi kyi-rím,

³⁰ ne nyǐ oo*ba/chi o-fem ké kyifip*. O/chi o-kyú wǎ kyichí ńkyí baa/shí byire emen ké okwâ, ńkyí afú aa/tugi [ekong] emen a-pwó.

³¹ Â mu enyam nyí mu o-tî ng dyityém ké byibî-byěm echi, byibî kâng byi/chi byi-kyú ǎ eyáré.

³² Ne nkéré emen o-kûfyi, nyǐ o/chi [o-kpú] wǎ kyire-kyichí ńkyí kii*chi to eshǎan ne banyá*.

³³ O/chi o-firi wǎ dyisín-kyichí ńdyí ndyi dyi-roo ng byirim emen ḿbyí byi*da/bwam ne* o-firi wǎ kyichí ńkyí nkyi kyi-roo ng ekong emen.

³⁴ Banet ḿbé baa*nyît Osówo* baa*kyú ne bwǎn* ne okwâ o/chi o-shí byise ḿbyí ba/bi ké akpuga-ngu.

³⁵ Banet ḿbén nké mbe ba-nam m afaníkong, ba-chi i byibî. Atyém ebe kángkáng nkéré nyi ne kaǎnínǐm.