JÔP MBWÔP KASHÚ-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 10 - Bokyi Bible

¹ Me nn/kyee ne dyikpen ejí. Fwôo atông a-jwo chwǒm ńkyí nkyi kyi-sa ng mě, ńkyí mu n-sét ng.

² Osówo, *dakét mpan o-bên mě*. Sét mě ńkyí wo a/fu, me n/chi.

³ Nkyi kanong ńkyí wo adabên dyityém dí. Ńkyí adané to ńkyí wo oyén aa/chi? a-bángê e ne ekabe nyí bambên atyém dí.

⁴ Wo amu a-ri ng byěm wǎ eringe be byimu byi-ri ng?

⁵ Dyikpen ńdyí eyên ndyi kaǎkím wǎ ńdyí eten?

⁶ Ebóng kyi/chi kâng ńkyí wo amu a-kyé ng kángkáng byibî ejí, ne kyibî nang kyirá ńkyí nn/chi.

⁷ Wo amu a-nyît ng a/fu, me n*da/chi kyibî* ne onet o*fí mú oda mě echi n-fem ké abwô eyên*.

⁸ Abwô eyên nké a/mee mě, a-nap mě. [Kántîk] abwô eyên ányi abónge nké a-kú a-ju ng mě.

⁹ Zîim a/fu, wo nké a/mee mě [ké ecing.] A-kú a-bâ ng mě eshiryi m-bírî édúkǎndú?

¹⁰ Wo nké a/kye bonchí ejí busa a/fu, ofwon mě. Wo nké a/chi mě n-kán ké dyifít-boné ejí.

¹¹ Wo a/mee enyam-byiko ejí ne byikúú ne eci, ne a/cít byikúú ké enyam-byiko ne ekwop.

¹² Wo nké a/kye mě dyikpen ne kyijé ńkyí kii*man* ne otûn eyên mú amu a-tún n mě oo/tî mě okpó.

¹³ Nké kántîk, n-kú n-nyît ng n/fu, ké nkéré ámu kángkáng, wo a/mû a-nam m ké kadip a/fu, a-némê e mě.

¹⁴ Wo a/mû a-bám m a/fu, wo a-ri ng â me n/chi n-chi kyibî, eringe nyí wo a/chi a-né mě epwoo.

¹⁵ Me n-chi i kyibî m-bâ, me n/firi ké afaníkong ne wo, nké ké nkéré mu n-chi i kanong, n*fí n-já ng akpee*. Me n/firi ké bafip ne [éshwân ké byiko.]

¹⁶ Â kyi/kan enwa kyi-kye mě, wo amu a-kyé ng mě ekám wǎ ekpang, ne amu a-chi i mě byěm-akat ké byiko.

¹⁷ Wo kángkáng nkéré amu ne ntûesé mú oda mě ebîn. Kafâ eyên esa ne me nke ka-jê ng ojěng ka-câ kashú. Kángkáng nkéré a-nam m bunwa bukíri ne me.

¹⁸ Osówo, ebóng ńkyí a/mîng ba-fwon mě. Me m/mû n/chi m-kpú kpá ne onet nang obónge o-kû mě eri.

¹⁹ Ńkyí m/mû ndafím ké dyifít n-shwôm ké dyikun kyi/mû kyi/chi kyi-nwa jangjang wǎ ńkyí ba*da mě efwon*.

²⁰ Kyi/waa kaǎnyín, dyikpen ejí dyi-man, *chí éné dí*. Zú mě abwô eringe ndakyú ké kaǎnyín-bunyîn-dyityém.

²¹ Me mu n-dim m kántîk, ne mm*ba/chi n-chîbwa esim ne banyá*. Mu n-wâa ng ké oshê mú kyifip kyífip,

²² oshê-kyifip ne biǐríribí, ne mú byěm mbyi yógeyóge, mú kiinwángé nkyi wǎ kyifip.