JǑN BǍMPÉM ḾBÉ BANONG KYI-KIM NE JISOS KARÂS ERINGE NYÍ JǑN O/SÁNG 3 - Bokyi Bible

Jisos ne Onyinchéng Obónge mú odabángê Nyikodyímus

¹ Onyinchéng obónge o/mû, mú o/mû o-bángê e Nyikodyímus. Nyǐ o/mû onet-dyishí-banet-Jûs, ne o/mû ké ncibi mú badakó Fárasyî.

² O/dim o-kâm Jisos ké buchú bubónge, ne o-sét ǎ o/fu, ntánge byiraa-Osówo, be byimu byi-nyît ng byi/fu, wo a-chi i ntánge byiraa-Osówo mú Osówo o/twóm. Onet nang obónge o*fí mú odaman echi biǐtí-akat ḿbyí wo amu a-chi i* â Osówo o*fí ne nyǐ*.

³ Jisos o-faa ǎ o/fu, me mu n-sét ng ǒ ké ntûntû n/fu, onet nang obónge o*fí mú o/chi o-ri Butu ḿbú Osówo* â ba*da ǎ echîbwât ba-fwon*.

⁴ Nyikodyímus o-bí ǎ o/fu, kyi-cen n nǎ ne ba-chîfwon onet mú oo/kán. Onet ámu ké ntûntû oo*man to enung ké dyifít ńdyí boné* o-chî ǎ efwon kampén kafee*.

⁵ Jisos o-faa ǎ o/fu, me mu n-sét ng ǒ ké ntûntû n/fu, onet o*fí nang obónge mú odaman enung ké Butu ḿbú Osówo* â ba*da ǎ efwon ké omu ne Busun-Osówo*.

⁶ Ńkyí enyam-byiko edafwon kyi-kyú u enyam-byiko, nké ńkyí Busun-Osówo budafwon kyi-kyú u to busun.

⁷ Kyi*da ǒ echi wǎ chwǒm-akat* ké ebóng, mu n-sét ng ǒ n/fu, ben kángkáng ba-man ba-chî běn efwon*.

⁸ Afú a-tugi ng a-jâ kyicê ńkyí kyidanyîn kányí. A-jwo ng kyirime emen, nké aa*nyît kyicê ńkyí a/fím* nang ńkyí nyi a-jâ*. Nkyi eringe ebónge to ne nang yeě nang yeě mú ba/fwon ǎ ké Busun-Osówo.

⁹ Nyikodyímus o-bí ǎ o/fu, ńkyín kyi-cen n nǎ ne kyi-kyú éné.

¹⁰ Jisos o-faa o/fu, wo a-chi i kiǐtí-ntánge byiraa-Osówo mú Ézerel, nké a*fí a-nyît ng chwǒm ńkyín*?

¹¹ Me mu n-sét ng ǒ ké ntûntû n/fu, be byimu byi-raa ng kyi-kim ne ńkyí byimu byi-nyît ng, ne byimu byi-sét ng to ńkyí bii/ri, nké onet o*fí nang obónge ké burwám enen mú mu o-ryuu ng o/fu, nyǐ o-koo ng bǎmpém eten*.

¹² Â ben ba*fí ba-bángê e ne me* nkéré mu n-sét ng běn kyi-kim ne byěm ḿbyí ké ejíí ńnyín* aa ben ba-cen n nǎ ne ba-bángê ne me ne atyém enen, â n/sét běn kyi-kim ne byěm ḿbyí kyíbóng.

¹³ Onet to o*fí nang obónge mú oo/ce kyíbóng* kyi-cibi ne Wǎn-Onet mú o/fím kyíbóng o-bâ kyísí*.

¹⁴ Eringe nyí Músis o/mû o/bêem efyi nyí kiǐré nyí ké kyikwap o-bi cip ké kyikim-dyikán, eringe ányi ebónge to nké ba/chi ba-bêem Wǎn-Onet ba-bi cip,

¹⁵ eringe nyí nang yeě nké mu o-bángê e ne nyǐ ne dyityém emen o/chi o-kyú ne dyikpen ńdyí ne banyá.

¹⁶ Ké nǎ, Osówo, ejíí e/jê ǎ kanong kanong, nkyí nké o/kye kyitông ńkyí ncen-Wǎn emen, eringe nyí nang yeě mú mu o-bángê e ne nyǐ ne dyityém emen oo*ba/chi o-kpú* nké o-kyú u ne dyikpen ńdyí ne banyá.

¹⁷ Ké ebóng, Osówo o*da/twóm Wǎn emen o-bâ ké ejíí o/fu, oba-pan kányí mpan* nké o/fu, oba-kyú kányí Onet-Onyii.

¹⁸ Nang yeě nké mu o-bángê e ne Wǎn-Osówo ne dyityém emen, Osówo oo*pan ǎ mpan*. Nang yeě mú o*da/bángê ne nyǐ ne dyityém emen* Osówo oo/pan ǎ mpan dêndên, ké ebóng, onet ámu o*da/bángê ne ncen-Wǎn-Osówo ne dyityém emen*.

¹⁹ Dyizong-bukwóp ḿbún nké mpan ámu mu o-cen n. Kiinwángé kii/bê ké ejíí, nké banet, kyifip kyi-nyîn n kámbé kyi-shwôm kiinwángé, ké ebóng, mbe ba-chi i byibî-byěm.

²⁰ Onet nang orá mú mu o-chi i byibî-byěm, kiinwángé kyi-sa ng ǎ kafâ, ne oo*ba/chi o-bâ ké kiinwángé* ké ebóng, nyǐ o*fí o-ryuu ng o/fu, byibî-byěm emen ḿbyí nyǐ mu o-chi i byibyí kyíjí wááng*.

²¹ Nké nang yeě nké mu o-chi i ńkyí nkyi ntûntû o-bâ ké kiinwángé, eringe nyí kiinwángé kyidaman etông kyi/fu, nyǐ o/chi kánkyí ké ofê mú Osówo.

Jisos ne Jǒn

²² Ńdyí ńkyín kii/shwôm, Jisos ne bǎmgbán emen ba/dim ba-wâa Judyâ. O/rí áku ne mbé, o-kye to banet osoo mú Osówo.

²³ Jǒn to o/mû mu o-kyâ banet osoo mú Osówo ké Énon, fáráng ne Sálim, ké ebóng, omu o/mû ányi chwóó. Banet ba/mû ba-câ ba-kâm m ǎ, o-kyâ kámbé osoo mú Osówo.

²⁴ Ányi ba*da/mán ne Jǒn ké mgbokobá*.

²⁵ Kyicê-bǎmgbán-Jǒn kyi-kpet ekán ké dyishí ne onet-Jûs obónge kyi-kim ne byěm esoo.

²⁶ Mbé ba-dim kâng ba-kâm Jǒn, ba-da-sét ǎ ba/fu, ntánge byiraa-Osówo, wo a/tôong a-zîim m onyinchéng ámu mú o/mû ne wo ké esim-kace nyí áku ńké badakó Jódan? Mú a/mû a-raa ng kyi-kim ne nyǐ? Mu nyín o-kyâ banet osoo mú Osówo. Nang yeě nang yeě o-kú o-câ o-kâm m ǎ.

²⁷ Jǒn o-faa o/fu, onet o*fí nang obónge mú odaman ekyú ne chwǒm* kyi*da/shwôm â Osówo o/kye ǎ kánkyí*.

²⁸ Ben bayén ba-man n ebwom bantûesé ejí ba/fu, me n/fu, me, *chí onet mú Osówo o/kúng ǎ butu* nké Osówo oo/twóm mě o/fu, me mbwóp ǎ kashú.

²⁹ Onyinyi mú mu o-bé ng dyibé o/já onyinchéng mú mu o-bé ng ǎ. Ocín-onyinchéng ámu mú mu o-bé ng dyibé éné o-bwom m ányi fáráng o-kû ǎ ejwo, ne o-jêe ng ké nkéré o-kú o-jwo ng ejá nyí ocín emen mú mu o-bé ng dyibé. Ké bubwô ámbu, bunyîn-dyityém ḿbú ejí boo/sú pwat.

³⁰ Nyǐ o-man o-firi kiǐtí-onet o-shwôm oshwǒm, nké me m-man m-bwa kyísí kyísí.

Onet mú mu o-fím m Kyíbóng ne o-bâ

³¹ Onet mú mu o-fím m kyíbóng o/rêe o-shwôm kángkáng banet. Onet mú o/fím ké ejíí o/já ejíí, ne o-raa ng to kyi-kim ne byěm ḿbyí ké ejíí. Onet mú mu o-fím m kyíbóng o/shwôm kángkáng banet.

³² Nyǐ o-sét ng ńkyí nyǐ oo/ri ne ńkyí oo/jwo, nké onet o*fí nang obónge mú mu o-koo ng kyitwóm emen*.

³³ Nang yeě nké mu o-koo ng kyitwóm emen, onet ámu mu o-tông ng ké nkyí o/fu, Osówo mu o-sét ng ntûntû.

³⁴ Onet mú Osówo o/twóm ǎ o-raa ng byiraa ḿbyí Osówo, ké ebóng, Osówo o-kyâ ǎ busa ḿbú Busun emen bu-sú ǎ ké byiko pwat.

³⁵ Wǎn-Osówo mu o-jê ng Bonchí emen, ne Bonchí oo/kúng kángkáng byěm o-fé ǎ ké bubwô.

³⁶ Nang yeě nké mu o-bángê e ne dyityém emen ké Wǎn-Osówo o/firi ne dyikpen ńdyí ne banyá. Nang yeě nké o*fí o-chi i ńkyí Wǎn-Osówo o/sét* oo*ba/chi o-kyú ne dyikpen* nké busa-dyityém ḿbú Osówo bu/chi bu-waa ne nyǐ ne banyá.