JǑN BǍMPÉM ḾBÉ BANONG KYI-KIM NE JISOS KARÂS ERINGE NYÍ JǑN O/SÁNG 17 - Bokyi Bible

Jisos o/fé Nshwam o-kye Osówo ké Bubwô-Bǎmgbán Emen

¹ Ké nkéré mú Jisos oo/raa byěm ḿbyín kpók, o-bêem achi o-tún kyíbóng, o-raa o/fu, Kyítá, nkéré oo/fyi. Kye Wǎn eyên akpee, eringe nyí Wǎn eyên to oda ǒ ekye akpee.

² Ké ebóng, wo aa/kye ǎ busa ḿbú kángkáng banet badakyú ké bubwô emen, eringe nyí nyǐ odakye banet ḿbé wo a/kye ǎ dyikpen ńdyí ne banyá.

³ Ne nyín něen eringe nyí mbé badakyú ne dyikpen ńdyí ne banyá, â mbé mbe ba-nyît ng ǒ ba/fu, wo nké amu Osówo kǎnchí mú ntûntû, ne â mbé mbe ba-nyît ng to Jisos Karâs mú wo a/twóm.

⁴ Me nn/tông busa eyên ké ejíí, ké nǎ, n/chi bǎmkpóngé eyên ba-man ḿbé a/kye mě.

⁵ Kyítá, kye mě ofê ké bushú eyên kántîk, dyizong-ofê ámu mú wo a/kye mě, ne a-kûchi ejíí.

⁶ Me nn/chi banet ḿbé wo a/fîm ké ejíí a-kye mě ba-nyît ǒ. Mbé ba/já ǒ wo, ne wo to nké a/kye mě kámbé. Mbé baa/chi eringe nyí wo a/sét,

⁷ ne kántîk ba-kú ba-nyît ng ba/fu, kángkáng byěm ḿbyí wo a/kye mě mbyi byi-fím m ké abwô eyên.

⁸ Ké ebóng, me nn/sét kámbé kyitwóm ńkyí wo a/twóm mě, ne mbé to ba/koo kánkyí. Ba-kú ba-nyît ng to ba/fu, ntûntû me n/fím ké abwô eyên, ne ba-kú ba-bángê e ne atyém ebe ba/fu, wo nké a/twóm mě.

⁹ Me mu n-fâ nshwam n-kyâ ǒ ké bubwô ebe. Me n*fí n-fâ nshwam n-kyâ ǒ ké bubwô ḿbú banet ḿbé ké ejíí ńnyín* nké ké bubwô ḿbú banet ḿbé wo a/kye mě, ké ebóng, mbé ba/já ǒ wo.

¹⁰ Kángkáng byěm ḿbyí me mu ne mbyí, ḿbyí eyên, ne kángkáng byěm ḿbyí wo amu ne mbyí, ḿbyí ejí, ne akpee ejí nyi a-rángê e ké bubwô ebe.

¹¹ Nké kántîk me n-kú m-bâ n-kâm ǒ. Me n*fí to ké ejíí* nké mbé mbe ké ejíí. Kyítá mú o/nwa o-shwôm, bám kámbé ké busa ḿbú dyizîn eyên, dyizîn ándyi ńdyí wo a/kye mě, eringe nyí mbé badakyú wǎ onet obónge, wǎ eringe nyí wo ne me byimu eringe ebónge.

¹² Ké nkéré mú me m/mû n/tôong ne mbé, m/bám kámbé ké busa ḿbú dyizîn eyên, dyizîn ándyi ńdyí wo a/kye mě. Me m/bám kámbé, onet nang obónge o*da/tánê* kyi*da/shwôm onet ámu mú o/fu, nyǐ o-man o-tánê* eringe ejá eyên nyí ba/sáng kyísí edakyú ntûntû.

¹³ Kántîk, me n-kú m-bâ n-kâm ǒ. Ne mu n-raa ng byěm ḿbyín něen ké ejíí, eringe nyí mbé badakyú ne bunyîn-dyityém ejí bumúmú ké atyém ebe bu-kwárê kámbé kerededet.

¹⁴ Me n/sét kámbé kyitwóm eyên ne ejíí e/sa kafâ ne mbé, ké ebóng, mbé ba*da/já ejíí* wǎ eringe nyí me to n*da/já kányí*.

¹⁵ Me n*fí n-fâ nshwam n/fu, fîm kámbé ké ejíí* nké mu n-fâ n/fu, bám kámbé kyi-kim ne Otu-Byibî-Barím.

¹⁶ Wǎ eringe nyí me n*da/já ejíí* éné to nké mbé ba*da/já kányí*.

¹⁷ Kúng kámbé a-kye byiko eyên ké bukwóp ḿbú ntûntû. Ké nǎ, ejá eyên, ányi ntûntû.

¹⁸ Me n/twóm kámbé ké ejíí, wǎ eringe nyí wo a/twóm mě ké ejíí.

¹⁹ Ne ké bubwô ebe, nn/kúng byiko ejí n-kye ǒ, eringe nyí mbé to badakúng byiko ebe ntûntû ba-kye ǒ.

²⁰ Me n*fí n-fâ nshwam n-kyâ ǒ ké bubwô ḿbú bǎmgbán ejí nké nke* nké mu n-fâ to ké bubwô ḿbú banet ḿbé ba/bángê ne me ne atyém ebe ké bubwô ḿbú kyitwóm ebe ńkyí ba/jwo.

²¹ Me mu n-fâ nshwam n/fu, kyi/bát mbé ashí amúmú bafiri wǎ onet obónge. Kyítá, kyi/bát mbé bakyú ké atyém eten wǎ eringe nyí wo amu ké dyityém ejí, me to ké ńdyí eyên. Kyi/bát mbé bafiri wǎ onet obónge, eringe nyí banet ḿbé ké ejíí ba/chi ba-bángê ba/fu, wo nké a/twóm mě.

²² Me nn/kye kámbé ofê, wǎ eringe nyí wo a/kye mě, eringe nyí mbé badafiri wǎ onet obónge, wǎ eringe nyí me ne wo byimu.

²³ Me mu ké atyém ebe, ne wo amu ké ńdyí ejí, eringe nyí mbé badakyú kerededet wǎ onet obónge. Eringe nyí ejíí edanyît e/fu, wo nké a/twóm mě, ne eringe nyí edanyît to e/fu, mbé mbe ba-jê ng ǒ wǎ eringe nyí me mu n-jê ng ǒ.

²⁴ Kyítá, wo aa/kye mě me bǎmgbán ejí, ne me mu n-ryuu ng n/fu, mbé bakyú ne me ké kyikit ńkyí me ndakyú, eringe nyí mbé badari ofê mú wo a/kye mě. Ké ebóng, me m/kpet ǒ wo ejê kpá, ne a-kûchi ejíí.

²⁵ Kyítá mú odachi kanong, banet ḿbé ké ejíí ńnyín ba*fí ba-nyît ng ǒ* nké me mu n-nyît ng ǒ, ne bǎmgbán ejí ḿbén mbe ba-nyît ng to ba/fu, wo nké a/twóm mě.

²⁶ Me nn/chi kámbé ba-nyît ǒ, ne n/chi n-kûchi éné n-ca kashú, eringe nyí kyijé ńkyí me mu n-jê ng ǒ wo kyi/chi kyi-firi ké atyém ebe, ne me to ké atyém ebe.