JǑN BǍMPÉM ḾBÉ BANONG KYI-KIM NE JISOS KARÂS ERINGE NYÍ JǑN O/SÁNG 16 - Bokyi Bible

¹ Me nn/sét běn byěm ḿbyín, eringe nyí baa*ba/chi ba-róng ké byibî*.

² Mbé ba/chi ba-fîm běn ké ékwâbashi ebe. Ne nkéré mu o-bâ mú nang yeě nké o/ju běn, o/chi o-kûkabe o/fu, â nyǐ mu o-chi i éné, nyǐ mu o-fâ Osówo.

³ Mbé ba/chi ba-chi běn byěm ḿbyín, ké ebóng, mbé ba*fí ba-nyît ng Bonchí ejí* nang me*.

⁴ Nké me nn/sét běn byěm ḿbyín, eringe nyí â nkéré ámu mú bada běn echi byěm ámbyi o/fyi, ben ba/chi ba-zîim ba/fu, me m/mû n/sét běn. Me m/mû n*da běn esét byěm ḿbyín ké kiimkpet kyikû* ké ebóng, me m/mû ne ben.

Bǎmkpóngé ḿbé Busun-Osówo

⁵ Nké kántîk n-kú n-wâa ng n-kâm ǎ nyǐ mú o/twóm mě. Nang ké nkyi éné, onet nang obónge ké burwám enen o*fí* mú mu o-bí ng mě o/fu, wo amu a-wâa ng nyá*.

⁶ Nké kántîk mú nn/sét běn, bafip baa/sú běn ké dyityém.

⁷ Nké me mu n-sét ng běn ntûntû n/fu, nkyi kanong ne ben kyi-shwôm, â me n/dim m-mîng běn. Ké ebóng, â me n*da/dim* Nchíchwábáng oo*ba/chi o-bâ o-kâm běn*. Nké â me n/dim m-mîng běn, me kâng n/chi n-twóm běn nyǐ.

⁸ Â nkéré mú nyǐ oo/bê, nyǐ o/chi o-chi banet ḿbé ké ejíí ńnyín ba-kûnyît ba/fu, mbé mbe ba-chi i byibî, ne ba-kûnyît to kyi-kim ne byěm ḿbyí mbyi kanong, ne kyi-kim to ne mpan mú Bonchí ejí o/chi o-pan banet.

⁹ Mbé ba*fí ba-nyît ng ba/fu, mbé mbe ba-chi i byibî* ké ebóng, mbé ba*fí ba-bángê e ne me ne atyém ebe*.

¹⁰ Ba*fí ba-nyît ng kyi-kim ne ńkyí nkyi kanong* ké nǎ, me n-kú n-wâa ng n-kâm Bonchí ejí ne ben to baa*ba/chi ba-chî mě eri*.

¹¹ Ba*fí ba-nyît ng kyi-kim ne mpan mú Bonchí ejí o/chi o-pan banet* ké ebóng, Bonchí ejí oo/pan otu mú ejíí ńnyín mpan dêndên.

¹² Byěm byi/tôong mě chwóó ḿbyí nda běn echîsét, nké kántîk baa*ba/chi ba-man ekám kámbyí ké dyishí*.

¹³ Nké ké nkéré mú Busun-Osówo ḿbú budasét ntûntû boo/bê, mbú bu/chi bu-tông běn bukwóp ḿbú kángkáng ntûntû. Mbú boo*ba/chi bu-kûsét ké kakim emen* nké mbú bu/chi bu-kûsét kyi-kim ne ńkyí mbú mbu bu-jwo ng, bu-sét běn to kyi-kim ne byěm ḿbyí byi/chi byi-chi.

¹⁴ Mbú bu/chi bu-kye mě me akpee, ké ebóng, mbú bu/chi bu-kûkoo ńkyí me mu ne nkyí bu-sét běn kánkyí.

¹⁵ Kángkáng byěm ḿbyí Bonchí ejí mu ne mbyí, ḿbyí ejí. Nkyí nké me n/sét běn n/fu, Busun-Osówo bu/chi bu-koo ńkyí me ndasét kámbú bu-sét běn kánkyí.

Bafip ne Bunyîn-Dyityém

¹⁶ Ké kaǎnyín-nkéré, baa*ba/chi ba-chî mě eri* ne â kyi/chîbyí kaǎnyín-nkéré, ben ba/chi ba-chî mě eri.

¹⁷ Kyicê-bǎmgbán emen ba-kpet eraa ne bábe bakíri ba/fu, ńkyín kyi/byí nǎ. Nyǐ mu o-sét ng bě o/fu, ké kaǎnyín-nkéré, baa*ba/chi ba-chî mě eri* ne â kyi/chîbyí kaǎnyín-nkéré, ben ba/chi ba-chî mě eri. Ne mu o-sét ng bě to o/fu, nkyi éné, ké ebóng, me mu n-wâa ng n-kâm Bonchí ejí.

¹⁸ Ba-bí barî ba/fu, kaǎnyín-nkéré ńkén, ányi kyi/byí nǎ. Be byi*fí byi-nyît ng chwǒm kyi-kim ne ńkyí nyǐ mu o-raa ng*.

¹⁹ Jisos o/nyît o/fu, mbé mbe ba-ryuu ng ba/fu, mbé ba-bí ng ǎ, ne o-raa ne mbé kâng o/fu, me n/raa n/fu, ké kaǎnyín-nkéré, baa*ba/chi ba-chî mě eri* ne â kyi/chîbyí kaǎnyín-nkéré, ben ba/chi ba-chî mě eri. Ńkyín něen nké ben bamu ba-bí ng barî dí.

²⁰ Me mu n-sét ng běn ntûntû n/fu, ben ba/chi ba-kûtii ba-ta ng dyikán. Nké dyityém dyi/chi dyi-kûnyîn ejíí. Ben ba/chi ba-firi ké bafip. Nké bafip enen ba/chi ba-pín ba-firi bunyîn-dyityém.

²¹ Ké nkéré mú onyinyi o-kú o-bâ efwon wǎn, dyityém emen dyi-firi ng bafip báfip, ké nǎ, nkéré mú busông emen oo/fyi. Nké nkéré mú oo/fwon wǎn ámu, o-ráp busông emen, ké ebóng, nyǐ o/firi ké bunyîn-dyityém ké wǎn mú nyǐ oo/fwon o-tî ké ejíí.

²² Éné to nké nkyi ne ben. Kántîk ben bamu ké bafip, nké me n/chi n-chî běn eri, ne atyém enen a/chi a-sú ne bunyîn-dyityém, bunyîn-dyityém ḿbú mbu dyizong ńdyí onet nang obónge oo*man běn ekoo kámbú*.

²³ Ké nkéré mú dyicí ándyi dii/fyi, ben baa*ba/chi ba-bí mě ba/fu, me nkye běn nang chwǒm*. Ne mu n-sét ng běn ntûntû n/fu, Bonchí ejí o-kyâ běn nang ebóng ńkyí ben ba/bí ǎ, â ben ba/kó dyizîn ejí.

²⁴ Tete kii/ribi kántîk, ben ba*da/yip ne dyizîn ejí* ba-bí ǎ nang chwǒm*. Bí n̂g ne ben ba/chi ba-koo, eringe nyí bunyîn-dyityém enen budakwárê kerededet.

Jisos oo/kpógê Ejíí

²⁵ Me nn/sét běn byěm ḿbyín něen ké atím-ekan. Nké nkéré mu o-bâ mú me mm*ba/chi n-chîraa ké atím-ekan* nké n/chi n-kûraa ne ben wááng kyi-kim ne Bonchí ejí.

²⁶ Ké nkéré mú dyicí ándyi dii/fyi, ben ba/chi ba-yip dyizîn ejí ba-kû ǎ ebí byěm. Me n*fí n-raa ng n/fu, me n/chi n-kû ǎ ebí ké bubwô enen*

²⁷ ké nǎ, ben bamu ba-jê ng Bonchí ejí oyén. Ben bamu ba-jê ng ǎ, ké nǎ, me mu n-jê ng běn, ne ben to baa/bángê ne atyém enen ba/fu, me n/fím ké abwô nyí Osówo.

²⁸ Me n/fím ké abwô nyí Bonchí ejí ne m-bâ ké ejíí. Kántîk me n-kú m-mîng ng ejíí m-bwa esim n-kâm Bonchí ejí.

²⁹ Bǎmgbán emen ba-raa kâng ne nyǐ ba/fu, ké ntûntû, kántîk a-kú a-raa ng wááng, atím-ekan a*fí a-fâ*.

³⁰ Be byi-kú byi-nyît ng kántîk byi/fu, wo amu a-nyît ng kángkáng byěm. Wo a*fí mú onet odabwa o-kû ǒ ebí bǎmbím*. Ńkyín nkyi kyi-chi i bě byi-bángê ne wo ne atyém eten byi/fu, wo a/fím ké abwô nyí Osówo.

³¹ Jisos o-faa o-bí kámbé o/fu, ben kántîk ba-kú ba-bángê e ne me ne atyém enen dí.

³² Nkéré mu o-bâ, ne oo/fyi, mú banet ba/chi ba-chi běn ashí amúmú ba-pwôo byiryibyiryi, onet ne onet o-jâ ké oshê emen, ba-mîng mě kǎnchí. Nké me n*fí kǎnchí* ké ebóng, Bonchí ejí mu ne me.

³³ Me nn/sét běn ńkyín něen, eringe nyí ba/chi ba-kyú ké bunyîn-dyityém ké ocibi mú baa/cibi ne me. Ejíí e/chi e-chi běn ba-ri busông. Nké bwom m̂ kíngkíng. Me mm/kpógê ejíí.