JǑN BǍMPÉM ḾBÉ BANONG KYI-KIM NE JISOS KARÂS ERINGE NYÍ JǑN O/SÁNG 10 - Bokyi Bible

Dyitím-Ekan kyi-kim ne Nkám-Ebû

¹ Me mu n-sét ng běn ntûntû n/fu, onet mú o*fí o-cen n ké ocím-dyifyi ne o-nung ké nkám-ebû* nké mu o-yú u kyíbóng-nkám o-nung ké kafâ ké bukwóp bukíri, onet ámu o-chi i onet-kajii ne mbam banet byěm o-koo ng.

² Onet mú mu o-cen n ké ocím-dyifyi ne o-nung ké kafâ-nkám-ebû o-chi i mbâm ebû ányi.

³ Mbâm ocím-dyifyi ándyi o-kuu ng ǎ dyifyi. Ebû e-jwo ng ejá emen, ne o-kó ng ebû emen ké dyizîn ké dyizîn ne o-kpî kányí e-byí kyíjí.

⁴ Ké nkéré oo/kpî kányí e-byí kyíjí, nyǐ o-bwóp ng kányí kashú, ne nyǐ e-kû ǎ ece ké kyikû, ké ebóng, nyǐ nyi e-nyît ng ejá emen.

⁵ Ee*ce ne onet okíri ké kyikû* nké e-chêe ng onet okíri ochěng, ké nǎ, nyǐ e*fí e-nyît ng ejá emen*.

⁶ Jisos o/tím kámbé dyitím-ekan ńdyín, nké mbé ba*da/nyît dyishí-chwǒm ńkyí nyǐ o/mû o-sét ng kámbé*.

Jisos mu Mbâm Ebû mú Onong

⁷ Jisos o-chîraa kâng ne mbé o/fu, ké ntûntû nké mu n-sét ng běn n/fu, me nké mu dyifyi ńdyí nkám-ebû.

⁸ Kángkáng banet ḿbé áku ḿbé ba/bê ba-sí mě ba-chi i banjii kajii ne bambam banet byěm ba-koo ng, nké ebû e*da/tî atông e-jwo ńkyí mbé ba/sét*.

⁹ Me nké mu dyifyi-nkám-ebû. Nang yeě nké â o/cen ké bubwô ejí ne o-nung ké nkám-ebû ejí, Osówo o/chi o-nyii ǎ. Nyǐ o/chi o-nung, o-byí, ne o-ri to kyikit-byiryíng ḿbyí odaryí.

¹⁰ Onet-kajii o-bâ, eringe nyǐ odajii, o-ju, o-bên nké nke. Me mm/bê, eringe nyí mbé badakoo dyikpen, ba-koo kándyí kerededet.

¹¹ Me n-chi i mbâm ebû mú onong. Mbâm ebû mú onong o-bángê e kyitông emen ekye ké dyishí-ebû emen.

¹² Onet mú bada ǎ eyámê oyámé, mú o*fí mbâm ebû* mú ebû e*fí nyí emen* o-mîng ng kányí ányi o-chêe ké nkéré mú oo/ri ekpang e-kú e-bâ. Ne ekpang ányi kâng e-ba-kám kányí, ne e-chi kányí e-firi byiryibyiryi.

¹³ Onet ámu mú ba/yámê ǎ éné o-chêe ng o-dim, ké nǎ, nyǐ ba/yámê ǎ oyámé. Oo*kérê kyi-kim ne ebû ányi*.

^14-15 Me n-chi i mbâm ebû mú onong. Eringe nyí Bonchí ejí mu o-nyît ng mě me, ne me to mu n-nyît ng ǎ, ké eringe ányi ebónge to nké me mu n-nyît ng ebû ejí, ne nyǐ to nyi e-nyît ng mě. Me mu m-bángê e to n/fu, n-kyâ kyitông ejí ké dyishí ebe.

¹⁶ Me mu ne ebû ekíri to nyí e*fí ké nkám-ebû mún*. M-man m-bâ ne nyǐ nyín to. Nyǐ e/chi e-fwôo atông e-jwo ejá ejí, ne nyǐ kángkáng e/chi e-firi dyibóng-ebû dyibónge ne mbâm ebû obónge.

¹⁷ Me mu n-jê ng Bonchí ejí, ké ebóng, me mu m-bángê e dyikpen ejí ekye, eringe nyí me n/chi n-chîkoo kándyí.

¹⁸ Onet o*fí nang obónge mú mu o-koo ng dyikpen ejí*. Nké me mu n-kyâ kándyí eringe nyí dyityém ejí dyi/sét mě. Me mu ne busa ḿbú ndakye kándyí, ne mu to ne busa ḿbú ndachîkoo kándyí. Nyín něen chwǒm ńkyí Bonchí ejí o/fu, me m-man n-chi.

¹⁹ Byiraa ḿbyí Jisos o/raa něen byi/chi banet-Jûs ba-chîkyii barî ké byikim ké byikim.

²⁰ Bakíri chwóó ba/mû ba-raa ng ba/fu, Jisos mu ne kyibî-bucí, mu o-fún n to. Ebóng kyi/chi ben bamu ba-tî ng atông enen ba-jwo ng ńkyí mu o-raa ng.

²¹ Nké bakíri ba/mû ba-raa ng ba/fu, onet mú mu ne kyibî-bucí oo*man eraa azong-byiraa nyín*. Kyibî-bucí kyi-man n echi bansêe achi ba-kûrángê?

Banet-Jûs ba/né Jisos

²² Nkéré o-ba-fyi mú badachi dyijî-kyifen ńkyí badajware kiǐtí-kyise-kyifen-Osówo echi ké Jerúsélem. Kyi/mû ké nkéré mú burwom.

²³ Jisos o/mû mu o-cen n ké ákpamê nyí Otu Sólómon, nyí kiǐtí-kyise-kyifen-Osówo echi

²⁴ ké nkéré mú banet-Jûs ba/bê ba-kâm ǎ, ne ba-bí ǎ ba/fu, a-chi i ofong o-waa bě zírízírí ka-rí nǎ. Â wo a-chi i onet mú Osówo o/kúng ǎ butu, sét bě wááng.

²⁵ Jisos o-faa kámbé o/fu, me nn/sét běn nyáá, nké ben ba*fí ba-bángê e ne me ne atyém enen*. Bǎmkpóngé ḿbé me mu n-chi i ké bubwô ḿbú Bonchí ejí nké mbe ba-bwom m mě wǎ ntûesé ejí.

²⁶ Nké ben ba*fí ba-bángê e ne me ne atyém enen* ké nǎ, ben baa*chi ebû nyí ejí*.

²⁷ Ebû ejí e-jwo ng ejá nyí ejí. Me n-nyît ng kányí, ne nyǐ to nyi e-cen n ne me ké kyikû.

²⁸ Me n-kyâ kányí dyikpen ńdyí ne banyá, ne nyǐ ee*ba/chi e-kpú ne banyá*. Onet to o*fí nang obónge mú oda mě eman ebam kányí o-koo*.

²⁹ Ńkyí Bonchí ejí oo/kye mě kyi/rêe kyi-shwôm kángkáng byěm. Onet to o*fí nang obónge mú odaman ebam kányí ké bubwô ḿbú Bonchí ejí o-koo*.

³⁰ Me ne Bonchí ejí byimu eringe ebónge.

³¹ Banet-Jûs ámbe kâng ba-chîbwóp aká ba/fu, mbé ba-tím m ǎ.

³² Jisos o-sét kámbé o/fu, me nn/chi bǎmkpóngé ḿbé banong chwóó ké bushú enen, ḿbé Bonchí ejí o/kye mě o/fu, nchi. Ké bubwô-bǎmkpóngé bará nké ben bamu ba-kyé ng mě aká etím.

³³ Banet-Jûs ámbe ba-faa ba/fu, *chí ké bǎmkpóngé ḿbé banong nké byi/fu, byi-tím m ǒ aká*. Nké byi/fu, byi-tím m ǒ aká, ké ebóng, wo amu a-dángê e Osówo. Wo amu onet nké nke, nké wo amu a-kan n a/fu, wo a-kúng ng byiko eyên wǎ Osówo.

³⁴ Jisos o-faa kámbé o/fu, ba/sáng ké Byije-Músis ba/fu, Osówo o/fu, ben ba-chi i esówo.

³⁵ Be byimu byi-nyît ng byi/fu, ńkyí ejá-Osówo nyí ba/sáng kyísí nyi e-sét ng nkyi ntûntû ne banyá, ne Osówo oo/kó banet ḿbé nyǐ o/twóm kámbé kyitwóm emen esówo.

³⁶ Nké kyi-kim kâng ne me, Bonchí ejí o/cá mě, ne o-twóm mě ké ejíí ńnyín. Kyi-cen n nǎ kâng ne ben ba-kûraa ba/fu, me mu n-dángê e Osówo. Ké ebóng, me mu n-raa ng n/fu, me n-chi i Wǎn-Osówo.

³⁷ *Da n̂g echi ba-bángê kâng ne me ne atyém enen* â me n*fí n-chi i bǎmkpóngé ḿbé Bonchí ejí*.

³⁸ Nké â me mu n-chi i kámbé, nang ben ba*fí ba-bángê e ne me ne atyém enen* ba/mû ba-man n ebángê nang ké bǎmkpóngé ejí nké nke, eringe nyí badanyît kanong kanong ba/fu, Bonchí ejí mu mě ké dyityém, ne me to mu ǎ ké ńdyí emen.

³⁹ Ba-chîkan ekám Jisos, nké nyǐ o/fem kámbé.

⁴⁰ Jisos o-chîbwa esim, o-nyáng kace ńké badakó Jódan, o-wâa ké kyikit ńkyí Jǒn o/mû o-kyâ banet osoo mú Osówo, o-da-kyú áku.

⁴¹ Bujê-banet ba/bê ba-kâm ǎ. Ba-kpet eraa ba/fu, Jǒn o/mû o*da/chi kiǐtí-akat nang kyibónge*. Nké kángkáng byěm ḿbyí Jǒn o/raa kyi-kim ne onyinchéng mún mbyi ntûntû.

⁴² Ne bujê-banet ḿbé ba/mû ányi ba-bángê ne Jisos ne atyém ebe.