Jeryimáya 9 - Bokyi Bible

¹ Kyi/mû kyi/chi kyi-nyîn mě, â dyishí ejí dyi/mû wǎ dyijwáng, achi ejí a-kyú wǎ katí-batíí, eringe nyí ndaman etii buchú ne esû ké dyishí-banet ejí ḿbé baa/ju.

² Kyi/mû kyi/chi kyi-nyîn mě, â m/mû ne kyikit ké kyikim-dyikán ńkyí ndaman edim n-jâ ké nkyí, m-mîng banet ejí. Ké nǎ, mbé kángkáng ba-chi i banchi byinam, ne banet ḿbé badanam barî-banet dyiju.

³ Mbé ba-fút ng bubyíbabang ebe wǎ báre. Byisédéng esét bii/koo esí ńnyín, ntûntû o*fí to*. Ké nǎ, mbé mbe ba-fím m ké kyibî kyibónge ba-nung ké kyikíri, ne ba*fí ba-nyît ng mě wǎ Osówo ebe*. Óburúkpâbí nké o/raa.

⁴ Nang yeě obám byiko emen kyi-kim ne orî-onet emen. Onet o*dachi o-fé dyityém ne wǎn-boné emen*. Ké nǎ, wǎn-boné nang orá o/firi nnîm banet wǎ Jekôp, ne orî-onet nang orá o/firi nram banet.

⁵ Nang yeě o-kú o-nîm m orî-onet emen, onet nang obónge o*fí to o-sét ng ntûntû*. Baa/tángê bubyíbabang ebe eringe nyí budakûsét kyisédéng. Mbé mbe ba-chi i byibî, ne ba*fí ba-man n esaa byiko ba-mîng kámbyí*.

⁶ Mbé mbe ba-cít ng banet ba-nye ng ba-fâ, ba-nîm m banet to ba-nye ng ba-fâ. Óburúkpâbí o/raa o/fu, banet emen baa/né ǎ.

⁷ Ké bubwô ḿbún, Óburúkpâbí mú o/rêe o-shwôm o/raa o/fu, n/chi m-bwât banet ejí n-chi wǎ eringe nyí nree bure odabwât kiǐré, n-kan kámbé n-ri. Banet ejí baa/chi kyibî. Me n-chî ng echi ebóng ne mbé.

⁸ Bubyíbabang ebe mbu wǎ byibî-abán. Mbé ba-sét ng byisédéng kángkáng nkéré. Nang yeě mu o-raa ng kanong ké ejá ne orî-onet emen, nké ké ntûntû, mu o-kuu ng kaǎtám o-tî ǎ.

⁹ Me mm*ba/chi n-kye kámbé busông ké byěm ḿbyín*? Me mm*ba/chi n-só dyizong-oshê ńdyín ewa*? Me Óburúkpâbí nké n/raa.

Bafip ḿbé ba/chi Jeryimáya ké Dyishí-Banet Emen

¹⁰ Me Jeryimáya n/raa n/fu, n/chi n-ta dyikán ké dyishí-eku, n-tii bukyû ké dyishí-byifát, ké nǎ, bii/jwóm, ne onet o*fí to o-cen n ké mbyí*. Kyicoge ńkyí bampong kyi*fí to*. Bunurung ne enyam kángkáng bii/chêe.

¹¹ Óburúkpâbí o-raa o/fu, n/chi n-chi Jerúsélem o-firi wǎ dyizu-biǐbyém ńdyí enyam edakyú. Eshê nyí Júda e/chi e-bírî kyikim-dyikán ńdyí onet nang obónge oo*kyú to ké ndyí*.

¹² Me m/bí Óburúkpâbí n/fu, ebóng esí ee/waa éné dyikáá e-jwóm wǎ kyikim-dyikán ńkyí onet o*fí to o-man n ecen ké nkyí*. Yeě mu ne bubong ḿbú odanyît eringe nyí ńkyín kyi/byí. Yeě wo a/sét ǎ eringe nyí kyi/byí eringe nyí odasét banet bakíri.

¹³ Óburúkpâbí o-faa o/fu, ńkyín kii/chi, ké nǎ, banet ejí baa/mîng echi ńkyí me n/tángê kámbé. Ba*da/chi ńkyí me n/sét kámbé*.

¹⁴ Nké ba/bwa ba-firi banshwane ashí, ne baa/kye erím-bakye nyí Bâl ofê wǎ eringe nyí banchí ebe ba/tángê kámbé ba/fu, bachi.

¹⁵ Kántîk kâng, fwôo atông a-jwo ńkyí me Osówo Óburúkpâbí mú Ézerel mú o/rêe o-shwôm n/chi n-chi. N/chi n-kye banet ejí byichí ḿbyí byidaruu ba-ryí, n-kye kámbé bukye ḿbú badakpú ba-jwáp.

¹⁶ N/chi n-chi kámbé ba-pwôo byiryibyiryi ké eshê nyí nang mbé nang banchí ebe ḿbé kpákpá ba*da/jwo ne kyi-kim ne nyǐ* ne n/chi n-twóm basúja ba-nwa byití ne mbé tete n-ju kámbé kángkáng.

Banet ḿbé Jerúsélem ba/tii ba-kó Osówo ba/fu, ochwáp Kámbé

¹⁷ Óburúkpâbí mú o/rêe o-shwôm o/raa o/fu, kabe kyi-kim ne ńkyí nkyi kyi-chi i. Kó bamman eta dyikán ba-bâ, a-kó banyinyi ḿbé badanyîn ejá-bukyû ba-bâ.

¹⁸ Banet ḿbé Jerúsélem ba-raa ba/fu, kó kámbé ba-bâ babap ba-ba-fé okwan-bukyû ba-fé bě tete batíí ba-sú bě ké achi, bushú bu-cok ké bukyû etii.

¹⁹ Fwôo atông a-jwo ejá-bukyû nyí nyi ké Záyon. Be bii/kpú. Be byi/firi ne kiǐtí-éshwân. Byi-man byi-dim byi-mîng esí eten. Baa/bú bě byise.

²⁰ Me Jeryimáya n-raa ne mbé n/fu, fwôo n̂g atông, ǎ banyinyi, ba-jwo Óburúkpâbí, ba-jwo byiraa ḿbyí mu o-sét ng běn. Tángê ê bwǎn-banyinyi enen eringe nyí badata dyikán, ba-tángê bacín enen eringe nyí badafé ochwan-bukyû.

²¹ Bukyû boo/cen ké bawíndu eten bu-nung ké byibám-butu eten. Boo/ju boǒbwásíng ké étíbingé, bu-ju byisat ké bǎntím-busî.

²² Byikwóm-banet byi/firi byiryibyiryi wǎ byíkwôn ḿbyí badapwó ké byifát, wǎ nkurung mú bambûn nkurung badabún ba-pwó kyísí, mú onet o*fí mú odabwóp*. Ńkyín nké Óburúkpâbí o/sét mě o/fu, me nsét.

²³ Óburúkpâbí o/raa o/fu, banet-bubong ba*dachi ba-kûtông byiko kyi-kim ne bubong ebe* nang banet-busa kyi-kim ne busa ebe* nang banet-esang kyi-kim ne efang ebe*.

²⁴ Nang yeě nké o/fu, nyǐ o-tông ng byiko, onet ámu otông byiko o/fu, nyǐ o-nyît ng mě kanong kanong, ké nǎ, kyijé ejí kyi-waa ng eringe ebónge ne n-chi i ńkyí nkyi ntûntû ne ké bukwóp. Byěm ḿbyín nké byida mě enyîn. Me Óburúkpâbí nké n/raa.

^25-26 Óburúkpâbí o/raa o/fu, nkéré mu o-bâ mú n/chi n-kye banet ḿbé Éjip ne ḿbé Júda ne ḿbé Édom ne ḿbé Ámon ne ḿbé Mówep ne ḿbé ké kyikim-dyikán ḿbé mbe ba-két ng eji ebe busông. Kángkáng banet ḿbén ba/cên, nké ba*da/tî ocím mú ba/ryí ba-sem dyizîn ejí* kyi-kim ne dyicên ándyi*. Nang onet o*fí ké burwám-banet ḿbén* nang onet to o*fí ké burwám-banet ḿbé Ézerel* mú oo/tî ocím mú n/ryí ne mbé ne n-sem byiko ejí*.