Jeryimáya 8 - Bokyi Bible

¹ Óburúkpâbí o/raa o/fu, ké nkéré ámu, ba/chi ba-fîm byikúú ḿbyí batu ḿbé Júda ne ḿbyí banet-ashí-oshê ne ḿbyí banchi kyifen ejí ne ḿbyí bamkpábé ḿbé badasét byiraa ejí ne ḿbyí banet ḿbé ba/mû ba-kyú u ké Jerúsélem ké akun ebe ba-byí ne mbyí kyíjí.

² Ne ba/chi ba-tî kámbyí ké bushú ḿbú óbyísû ne otukáku ne ékpére, ḿbyí byi/mû bii/jê banet ámbe, ba-sô epé ké mbyí, ba-kye kámbyí ofê. Byikúú ámbyi baa*ba/chi ba-wuri kámbyí* ba-ryii kámbyí nang oryii*. Byi/chi byi-waa kyísí wǎ abîng-enyam.

³ Kyicê-banet ḿbé ba/waa ké kyibî-oshê ńkyín, ké kángkáng byikit ḿbyí me nn/ró kámbé, ba/chi ba-kûryuu bukyû ba-mîng dyikpen. Me Óburúkpâbí mú o/rêe o-shwôm nké n/raa.

Kyibî ne Busông eri

⁴ Wo a/chi a-sét kámbé a/fu, Óburúkpâbí o/fu, â banet ba/myii, baa*bûu to*? Â onet o/tánê, oo*fyi to*?

⁵ Ebóng kâng ńkyí banet ejí baa/bírî mě esim, ba*fí to ba-bwa ng ba-kâm mě*. Baa/waa ké bakye esháng, ba-né esim ebwa ba-kâm mě.

⁶ Me nn/fwôo atông kanong kanong n/fu, n-jwo ng kámbé, nké mbé ba*da/sét ntûntû*. Onet o*fí mú mu o-saa ng byiko o-mîng byibî-byěm emen echi* o-bí byiko emen o/fu, me n/chi ebóng*. Nang yeě nang yeě mu o-câ kiǐfáng ńkyí emen, wǎ kabyî-orá ńké nke ka-zóngê e ka-dim ké byití.

⁷ Nang bunurung mbu bu-nyît ng nkéré mú budafyi. Bunurung wǎ burúú ne agbâng mbu bu-nyît ng nkéré mú budabê, nké banet ejí ba*fí ba-nyît ng byije ejí*.

⁸ Ben ba-cen n nǎ ne ba-raa ba/fu, be byimu ne bubong, ne bamu ba-nyît ng byije ejí. Nké bantánge Byije-Músis ḿbé baa*sét ntûntû* baa/yángê byije ejí.

⁹ N/chi n-fé banet-bubong éshwân. Nn/kám kámbé, ba/firi yógeyóge, ké nǎ, mbé baa/né byije ejí. Ebóng bubong ḿbú mbé mbe ne mbú.

¹⁰ Ké bubwô ámbu, n/chi n-kúng banyi ebe n-kye banet bakíri, n-yip byifát ebe n-kye banet ḿbé ba/chi ba-kpógê kámbé, ké nǎ, kyi-fím ké onet mú kyísí kyísí tete kyi-ribi ké mú kiǐtí, nang yeě mu o-kyé ng acît eryí. Nang yeě nang yeě kyi-fím ké bamkpábé ḿbé badasét byiraa ejí kyi-ribi ké banchi kyifen ejí mu o-ryí i banet bampún.

¹¹ Mbé baa/chi byinêm ḿbyí banet ejí byi-kpú kaǎnyín, ba-raa ng ba/fu, bunyîn-dyityém boo/bê, nké kyikit ńkyí mbu kô kyi*fí*.

¹² Éshwân e/mû e-chi i kámbé ké nkéré mú ba/chi banunut-byěm? Aa*wááng* éshwân e*da/chi kámbé nang kaǎnyín*. Mbé ba*da/nyît eringe nyí éshwân edawuri onet*. Ké bubwô ámbu, mbé ba/chi ba-róng ké burwám-banet ḿbé baa/róng. Â n/kye kámbé busông, ba/chi ba-kpógê kámbé. Me Óburúkpâbí nké n/raa.

¹³ Óburúkpâbí o/fu, m/mû n/fu, m-kpaa ng banet ejí n-tî kyikit kyibónge, wǎ eringe nyí onet odakpaa byiryíng. Mbé mbe wǎ byichí ḿbyí byi*fí ne byirim*. Nang eshǎan to ee/jwóm. [Ké bubwô ámbu, mm/mîng banet-bushwôn ebe ba-koo esí nyí n/kye kámbé.]

¹⁴ Banet ḿbé Jerúsélem ba/raa ba/fu, ebóng be byi/kyú byi-fút abwô. Bâ n̂g byi-dim, byi-zóngê byi-wâa ké eshê nyí badabwom ne ba-nwa byití, byi-da-kpú áku. Ké nǎ, Osówo Óburúkpâbí eten oo/kye bě busông o/fu, be byikpú. Ne oo/kye bě omu mú onet odajwáp o-kpú o/fu, be byijwáp, ké nǎ, bii/chi kyibî ké bushú emen.

¹⁵ Be byi/kyé bunyîn-dyityém, nké kanong ka*da/bê*. Byi-kyé nkéré mú byidanyange, nké byi/bwa byi-ri busông.

¹⁶ Banet-bushwôn eten baa/ribi ké oshê mú Dǎn. Byi-kú byi-jwo ng dyiwonge ńdyí bubyî-orá ebe. Esí emúmú nyi e-náng ng ké nkéré bubyî-orá ebe bu-kú bu-bigi ng. Banet-bushwôn eten baa/bê esí eten ebên ne kángkáng byěm ḿbyí mbyi ké nyǐ ne oshê eten ne kángkáng banet emen.

¹⁷ Óburúkpâbí o/raa o/fu, bám m̂ byiko, me mu n-twóm m byibî-efyi byi-bâ byi-kâm běn. Byibî-efyi ḿbyí baa*man echi kányí bukye* ne e/chi e-jwóm běn. [

Bafip ḿbé Jeryimáya o/ri ké Bubwô-Banet Emen

¹⁸ Bafip ejí ba*fí ne bukye*.] Me n-kú n-rwôm m kyirwóm-dyityém.

¹⁹ Fwôo n̂g atông, me mu n-jwo ng banet ejí ké mbe ba-tii ng ké esí emúmú, ba/fu, Óburúkpâbí o*fí to ké Záyon*? Otu mú Záyon o*fí to*? Óburúkpâbí mú mu Otu ebe o-faa o/fu, ebóng ben ba/chi kafâ ka-sa mě ké ofê mú bamu ba-kyâ erím-bakye enen, ne otínge mú bamu ba-tíngê e kyísí ba-fâ esówo nyí eshê ekíri, nyí e*da/byí chwǒm*.

²⁰ Banet mbe ba-tii ng ba/fu, kyifang kii/man, baa/fuu byiryíng byi-man, nké Osówo o*da bě enyii*.

²¹ Dyityém dyi*fí mě to* ké nǎ, banet ejí ba*fí to*. Me n-kú n-ta ng dyikán, n/firi ké kiǐtí-bafip.

²² Bukye bu*fí ké Gyílet dí. Banchi bakye ba*fí áku*? Ebóng ba*da/chi ne banet ejí ba-nyange*.