Jeryimáya 7 - Bokyi Bible

Jeryimáya o/pem Banet Bǎmpém-Osówo ké Kafâ-Kiǐtí-Kyise-Kyifen-Osówo echi

^1-3 Óburúkpâbí o/twóm mě o/fu, me mbwom ké dyifyi ńdyí kiǐtí-kyise-kyifen emen echi, ké kyikit ńkyí banet ḿbé Júda mbe ba-nung ng ba-da ng ǎ ekye ofê. O/sét mě o/fu, me mbwom ányi n-sét ńkyí Osówo Óburúkpâbí mú Ézerel mú o/rêe o-shwôm o/fu, nyǐ o-sét ng kámbé. O/fu, yángê ê dyikpen ńdyí bamu ba-kyú u ne byěm ḿbyí bamu ba-chi i ne m-bángê běn ba-kyú u ba-câ kashú ké kyikit ńkyín.

⁴ Mîng n̂g ebángê ké boǒnínǐm-byiraa ḿbyí bamu ba-raa ng ba-bírî ng ba/fu, be byi*fí ké kyikit-afaníkong*. Nyín kiǐtí-kyise-kyifen echi ńkyí Óburúkpâbí.

⁵ Yángê ê dyikpen ńdyí bamu ba-kyú u ne byěm ḿbyí bamu ba-chi i. Kû n̂g echi barî byěm ké bukwóp ḿbú bunong.

⁶ *Da n̂g echîcít bacinbánet* ne banet-byibén* ne banyǐnkú*. Mîng n̂g eju banet ḿbé ba*fí ba-chi i byibî ké esí ńnyín*. Mîng n̂g ekye esówo ekíri ofê, ké nǎ, kyi-cen n běn ne bukyû.

⁷ Â ba/yángê, n/chi m-mîng běn ba-kyú u ba-câ kashú nyín ké esí nyí n/kye banchí enen ḿbé kpákpá wǎ chwǒm ńkyí kyidajá kámbé ne banyá.

⁸ Nké ben bamu ba-fâ atyém enen ké byiraa ḿbyí byi*fí ké kafâ*.

⁹ Bamu ba-jii ng bujii, ba-ju ng banet, ba-chi i byinam, ba-sét ng byisédéng ba-ryí i ocím ba-sem m Osówo, ba-chi i byifen ba-kyâ Bâl, ba-fâ esówo nyí ba/mû ba*da/nyît ne*.

¹⁰ Ben bamu ba-chi i byěm ḿbyín ḿbyí byida mě esa kafâ, ba-bwa ba-dim ba-ba-bwom mě ké bushú, ké kiǐtí-kyise-kyifen echi ńkyí ejí me oyén, ba-raa ba/fu, be byi*fí ké afaníkong*.

¹¹ Ben bamu ba-kabe ng ba/fu, kiǐtí-kyise-kyifen ejí echi nkyi kyikit ńkyí banet-bujii badarem? Nn/ri ńkyí ben bamu ba-chi i.

¹² Ca n̂g ké Shílo, mbwôp kashú-kyikit ńkyí n/cá n/fu, bakû mě efé, ba-da-ri ńkyí n/chi ké nkyí ké bubwô ḿbú byibî ḿbyí banet ejí ḿbé Ézerel.

¹³ Ben baa/chi kángkáng byibî ḿbyín ne nang ké n/raa ne ben kyi-kim ne mbyí kampén kampén, ben ba/né atông efwôo. Â n/kó běn baa*faa ojá*.

¹⁴ Ké bubwô ḿbún, ńkyí n/chi Shílo n/chi n-chi to kiǐtí-kyise-kyifen echi ejí ńkyín, ńkyí ben ba/fé dyityém ké nkyí. Nyín ké kyikit ńkyín ńkyí n/kye banchí enen ḿbé kpákpá ne ben, n/chi n-chi dyizong-chwǒm dyibónge ńdyí n/chi Shílo.

¹⁵ N/chi n-ró běn ké bushú ejí wǎ eringe nyí n/ró banchí enen ḿbé kpákpá, banet ḿbé Ézerel. Me Óburúkpâbí nké n/raa.

Banet ba/né echi ńkyí Osówo o/sét Kámbé

¹⁶ Óburúkpâbí o/sét Jeryimáya o/fu, *dachi a-fé nshwam a-kye mě ké bubwô-banet ḿbén*. *Dachi a-tii* a-fé nang nshwam ké dyishí ebe*. *Dachi a-tîm mě nang arông* ké nǎ, mm*ba/chi n-jwo ǒ*.

¹⁷ Nâng wo amu a-ri ng ńkyí mbé mbe ba-chi i ké eshê nyí Júda ne ké byiká-oshê ḿbyí Jerúsélem.

¹⁸ Ḿbé bwǎsíng mbe ba-sá ng ekwón, banyinchéng ba-wóngê e ékâp-okwâ, ḿbé banyinyi ba-buu ng atông nyí badachi berêt mú badakye osówo-onyinyi mú mbé mbe ba-kó ng ǎ Otu-Onyinyi mú Kyíbóng. Mbe ba-yip ng to bato ba-chi i byifen ba-kyâ esówo ekíri eringe nyí badachi kafâ ka-sa mě.

¹⁹ Ké ntûntû, me nké mbe ba-chi i kyi-bán mě? Aa*wááng* mbe ba-chi i kyi-bán byiko ebe, ba-wuri ng éshwân ba-kyâ byiko ebe.

²⁰ Ké bubwô ḿbún kâng, me Óburúkpâbí mú o/rêe o-shwôm n/chi m-pwó kafâ ejí ńké nke ka-jang ng mě esa ké kiǐtí-kyise-kyifen ejí echi ńkyín. N-fîm kánké to m-pwó banet ne enyam ké byiko, cibicibi ne byichí ne byíkwôn. Kafâ esa ejí ka/chi ka-kyú wǎ okwâ mú onet nang obónge oo*man erîp*.

²¹ Banet ejí, byifen byikíri bamu ba-shí i kámbyí kángkáng ké kyikit-kyifen echi, byikíri bamu ne busa ḿbú badakúng kyicê-byěm ba-ryí. Nké ńkyí me Osówo Óburúkpâbí mú Ézerel mú o/rêe o-shwôm mu n-raa ng nkyi něen, n/fu, ben ba-man n eryí kámbyí byimúmú kángkáng.

²² Me n*da/kye banchí enen ḿbé kpákpá busa kyi-kim ne byifen ḿbyí badashí ké okwâ* nang kyi-kim ne kyifen kyikíri* ké nkéré me n/fîm kámbé ba-byí ké Éjip*.

²³ Nké n/sét kámbé n/fu, bachi byěm ḿbyí n/sét kámbé eringe nyí me ndakyú Osówo ebe, mbé ba-kyú to banet ejí. Ne n/sét kámbé n/fu, bakyú wǎ eringe nyí me n/sét kámbé, eringe nyí byěm byi/chi byi-kyú kanong ne mbé.

²⁴ Nké ba*da/chi ńkyí n/sét kámbé* ba-fwôo nang atông ba-jwo mě*. Nké ba/chi ńkyí biinshunshwan ne byibî-atyém ebe byi/sét kámbé byi/fu, bachi, ne ba-bwa esim ésim, ńkyí ba/mû ba/chi ba-ca kashú.

²⁵ Kyi-fím ké dyicí ńdyí banchí enen ḿbé kpákpá ba/byí ké Éjip tete kyi-ribi dyicí ńdyí kurún, me mu n-twóm m běn bǎmgbán ejí, bamkpábé ḿbé badasét byiraa ejí.

²⁶ Nké onet o*fí nang obónge mú o/fwôo atông o-jwo*. Nké ben ba/bwa ba-bírî obíríng banshwan ashí ne bancen ne bunwa ba-shwôm banchí enen ḿbé kpákpá.

²⁷ Ké bubwô ḿbún kâng, ǎ Jeryimáya, wo a/chi a-kúng byiraa ḿbyín kángkáng a-sét banet ejí, nké baa*ba/chi ba-jwo ǒ*. A-kó ng kámbé, nké baa*ba/chi ba-faa ǒ ojá*.

²⁸ A/chi a-sét kámbé a/fu, oshê ebe o*fí o-chi i ńkyí me Osówo Óburúkpâbí ebe n/sét kámú* ba-bwa ba-já nang dyishí ké busông ḿbú nn/kye kámbé*. Dyityém etî ne me dii/kpú. Nang ozîim óziim ba*fí to ba-zîim m kyi-kim ne ndyí*.

Byibî ḿbyí Banet-Júda ba/chi ké Owo mú Hyínom

²⁹ Ta n̂g dyikán, ǎ banet ḿbé Jerúsélem. Kwárê n̂g eji enen ba-pwó. Bwom m̂ kyíbóng-kaku ba-fé ochwan-bukyû, ké nǎ, me Óburúkpâbí n-kú n-sa ng kafâ ne nn/né banet ejí.

³⁰ Banet ḿbé Júda baa/chi kyibî-chwǒm. Baa/yip erím-bakye ebe nyí eda mě esa kafâ ba-tî ké kafâ-kiǐtí-kyise-kyifen ejí echi ne baa/bên kánkyí.

³¹ Mbé baa/bi kyikit-kyifen echi ńkyí badakó Tófet ké owo mú Hyínom eringe nyí badaman eyip bwǎn ebe ḿbé banyinchéng ne ḿbé banyinyi ba-shí ké okwâ, ba-chi kyifen. Me n*da/sét kámbé n/fu, bachi ńkyín*. Nang okabe ókabe n*da/kabe kyi-kim ne nkyí*.

³² Ne ké bubwô ámbu, nkéré mu o-bâ mú baa*ba/chi ba-chîkó kyikit ánkyi Tófet* nang owo mú Hyínom* nké ba/chi ba-kûkó kánkyí Owo mú Banet eju. Ba/chi ba-kûryii banet ányi, ké nǎ, kyikit kyikíri kyi*fí to ńkyí badaryii banet*.

³³ Byikwóm-enyam-byiko-banet byi/chi byi-firi ḿbyí bunurung ne enyam-dyikán byidaryí, ne onet oo*ba/chi o-kyú mú o/chi o-ró kámbyí*.

³⁴ Kángkáng esí-Júda e/chi e-firi kyikim-dyikán. Me n/chi n-chi ejá nyí bunyîn-dyityém ne ojêe mú ké ajî-abé byi-man ké eshê nyí Júda ne ké byiká-oshê ḿbyí Jerúsélem.