Jeryimáya 6 - Bokyi Bible

Banet-Bushwôn ba/wâng Jerúsélem ba-fé ké Kafâ

¹ Banet-kyikû-banet ńkyí Běnjámin, chêe n̂g eringe nyí badafem. Chêe n̂g ké Jerúsélem. Jwá n̂g ntán ké Tékwa, ba-tî ekap-byití ké Bét-Hákerem, ké nǎ, kyibî ńkyí kyi/chi kyi-bên byěm chwóó nkyi kyi-fím m bushûyû kyi-bâ.

² Oshê mú Záyon mu o-nwa ng, nké ba/chi ba-bên kámú.

³ Batu ba/chi ba-bi bampyep-byití ányi ne basúja ebe. Ba/chi ba-bi bampyep-byití ebe ba-wáp Jerúsélem ba-fé ké kafâ, nang yeě nang yeě o/chi o-bi ké kyikit ńkyí kyi/nyîn ǎ.

⁴ Ba/chi ba-raa ba/fu, kpá n̂g byiko ḿbyí byidakye Jerúsélem bunwa. Kpá n̂g byiko. Byi/chi byi-kye bunwa ké ncên-esû. Nké mbé ba/chi ba-raa ba/fu, nkéré ámu o/jang etíbî o-shwôm, nkéré oo/tíbî o-shwôm ne busun-dyikurúku bu-kú bu-kwóp ng bu-câ.

⁵ Byi/chi byi-kye bunwa ne buchú, byi-bên byise ḿbyí mbe ba-bwom m ba-nwa byití.

⁶ Óburúkpâbí mú o/rêe o-shwôm oo/kye batu ḿbén busa o/fu, batwom byichí ba-bi byikit ḿbyí badayú ké ekpe, eringe nyí badawâng Jerúsélem ba-fé ké otyém. Nyǐ oo/raa o/fu, n/chi m-bên oshê mún, ké nǎ, oo/sú ne banet ecít.

⁷ Eringe nyí dyibíng-omu ndyi dyi-byí i omu mú okpó kángkáng nkéré, éné to nké Jerúsélem mu o-chi i byibî kángkáng nkéré. Me mu n-jwo ng anwa enwa ne byěm ebên ké kafâ-oshê, byirwóm ne byinêm nké nke mu n-ri ng.

⁸ Banet ḿbé Jerúsélem, mîng n̂g afaníkong ńnyín a-kyú běn wǎ ekó ekuri, â kyi*fí éné* n/chi m-bírî běn esim. N/chi m-bírî oshê enen o-firi kyikim-dyikán, kyikit ńkyí onet oo*ba/chi o-chîman ekyú ké nkyí*.

Ézerel e/bírî Bunwa ne Óburúkpâbí

⁹ Óburúkpâbí mú o/rêe o-shwôm o/raa ne me o/fu, Ézerel e/chi e-waa kafâ dyikáá wǎ kyichí ńkyí baa/bóng byirim emen kpók. Ké bubwô ámbu, wo a-man a-nyii nang yeě nang yeě a-koo ké nkéré mú nkéré o/tôong.

¹⁰ Me n-faa Óburúkpâbí n/fu, yeě o/chi o-fwôo atông o-jwo mě, â n/raa ne mbé n-kuri kámbé ekó. Mbé mbe ba-shwane e ashí ne ba*fí ba-fwôo ng atông ba-jwo kyitwóm eyên*. Mbé mbe ba-jwó ng ojwǒng ńkyí wo amu a-sét ng mě a/fu, me nsét kámbé.

¹¹ Kafâ ńké amu a-sa ng ne mbé nke ka-bán n mě to ké dyityém ejí, ǎ Óburúkpâbí, ne mm*ba/chi n-chîman ecíp dyityém n-kám kánké*. Ne Óburúkpâbí o-raa kâng ne me o/fu, kúng busa-dyityém ejí a-tông ké byiko ḿbyí boǒbwásíng ké byiká-oshê ne ké bancibi ḿbé byisat. Ba/chi ba-kúng batyép ne banyi ba-dim ne mbé, nang banet ḿbé baa/kâa baa*ba/chi ba-mîng kámbé*.

¹² Ba/chi ba-kúng byise ebe ba-kye banet bakíri, eringe ebónge to ne byifát ebe ne banyi ebe. Me n/chi n-kye banet ḿbé ké esí ńnyín busông.

¹³ Kángkáng banet, ḿbé biǐtí ne ḿbé ba*fí biǐtí* mbe ba-kyé ng akpuga ké bukwóp ḿbú boo*nwa*. Nang bamkpábé ḿbé badasét byiraa ejí ne banchi kyifen ejí mbe ba-ryí i banet bampún.

¹⁴ Mbé mbe ba-kúng ng byinêm ḿbyí banet ejí wǎ boochi-bakwá. Byěm byi*fí kanong* nké mbé mbe ba-raa ng ba/fu, byěm mbyi kanong.

¹⁵ Mbé éshwân e/mû e-chi i kámbé? ké nkéré ba/chi banunut-byěm ḿbyín? Aa*wááng* éshwân e*da/chi kámbé nang kaǎnyín*. Mbé ba*fí ba-nyît ng nang eringe nyí éshwân edawuri onet*. Ne ké bubwô ámbu, mbé ba/chi ba-róng wǎ eringe nyí banet ḿbé áku ba/róng. Nkuli kyikû ebe o/chi o-kyú ké nkéré nn/kye kámbé busông. Me Óburúkpâbí nké n/raa.

Banet ḿbé Ézerel ba/né Bukwóp ḿbú Osówo

¹⁶ Óburúkpâbí o/raa ne banet emen o/fu, bwom m̂ ké akam-bukwóp ba-tún achi. Bí n̂g okúri-kiǐfáng ne kyikit ńkyí bukwóp ḿbú bu/nwa bu-shwôm mbu. Cen n̂ ké bukwóp ámbu ne ben ba/chi ba-kyú ké bunyîn-dyityém. Nké mbé ba/raa ba/fu, aa*wááng* be bii*cen*.

¹⁷ Óburúkpâbí kâng o-fîm banet-mbâm o/fu, bakûfwôo atông ké ntán mú o/chi o-kuri kámbé ekó. Nké banet-mbâm ámbe ba/raa ba/fu, mbé baa*fwôo atông*.

¹⁸ Óburúkpâbí o-raa kâng o/fu, ben eshê emúmú, fwôo n̂g atông ba-jwo ńkyí kyi/chi kyi-chi banet ejí.

¹⁹ Esí, fwôo atông. Me n-kú m-bâ banet ḿbén ne okwâ ké byiko wǎ busông ḿbú n/chi n-kye kámbé ké kángkáng byibî-ekabe ebe, ké nǎ, mbé baa/né ńkyí n/tángê kámbé ne ba*da/chi wǎ eringe nyí me n/sét kámbé*.

²⁰ Me n*fí ne chwǒm ńkyí ndachi ne burwan ḿbú ba/fím ne mbú ké Shéba ba-bâ mě ne mbú* nang ne bakút ḿbé ba/fím oshê mú tíbítíbí*. Mm*ba/chi n-koo eyáré ebe* nang byifen ebe bii*ba/chi byi-nyîn mě*.

²¹ Ké bubwô ḿbún kâng, n/chi n-chi kámbé ba-kpán ácíring ba-myii. Banchí ne bwǎn ba/chi ba-kpú cibicibi ne bacín ebe ne barî-banet ebe.

Banet-Byití ḿbé ba/fím Kyicê ńkyí Bushûyû

²² Óburúkpâbí o-raa o/fu, banet ḿbé ba/fím ké oshê obónge ké kyicê ńkyí bushûyû mbe ba-bâ. Kiimbâng-oshê mú mu tíbítíbí nkyi kyi-kpá ng byiko-byití.

²³ Baa/kúng báre ne abán ne bushwám. Banet ámbe ba/bên atyém, baa*ri banet bafip*. Â ba-kú ba-yú u bubyî-orá, kyicoge ebe kyi-chi i éné wǎ baya ḿbé mbe ba-náng ng. Baa/kpá byiko-byití ne Jerúsélem.

²⁴ Banet-Jerúsélem ba-faa ba/fu, be bii/jwo kánkyí, nké byimu abwô akáá. Bafip ne bubân byi/firi bě ké byiko wǎ onyinyi mú bufwon mbu bu-nwa ng ǎ.

²⁵ Be bii*man ebyí kyíjí* byi-cen nang ké bukwóp*. Ké nǎ, banet-bushwôn eten mbe ne byiyám-byití ne bushî boo/wáp bě bu-fé ké otyém.

²⁶ Óburúkpâbí o-raa ne banet emen o/fu, fé n̂g byídí-dyikán eta, ba-bínê ké atông. Ta n̂g dyikán ne batíí ké achi wǎ ńdyí badata â ncen-wǎn o/kpú, ké nǎ, onet mú mu o-bâ ebabên o/chi o-kye kiǐmút-bunwa.

²⁷ Jeryimáya, fwôo banet ejí wǎ eringe nyí adafwôo kiǐré, a-nyît eringe nyí mbe.

²⁸ Mbé kángkáng mbe banshwane ashí-banet-bunwa, ḿbé badashwane wǎ aká ne biǐré. Mbé kángkáng baa/bên, ba-cen n ba-ram m eram.

²⁹ Ókâp-okwâ-bure o-mang ng kakânkakân, nké biǐré ḿbyí bii*nwa* bii*nyange byi-pwôo kyísí*. Nkyi chwǒm-nkéré ebên ńkyí onet odace kashú o/fu, nyǐ o-bwât ng banet ejí, ké nǎ, byibî-banet byi*fí byi-man n kámbé ké burwám*.

³⁰ Ba/chi ba-kûkó kámbé biǐré ḿbyí bii*nwa* ké nǎ, me Óburúkpâbí nn/né kámbé.