Jeryimáya 52 - Bokyi Bible

Orông mú Jerúsélem

¹ Otu Zedekyâ o/mû oo/rí aje bujam ne din ké nkéré mú ba/chi ǎ otu mú Júda, ne o/kyú wǎ otu ké Jerúsélem ké aje diǐkpú ne din. Boné emen o/mû o-bángê e Hamútal, mú wǎn-Jeryimáya mú o/mû o-kyú u ké oshê mú Lyíbana.

² Otu Zedekyâ o/chi kyibî ké bushú ḿbú Óburúkpâbí wǎ eringe nyí Otu Jehóyákim o/mû o/chi.

³ Óburúkpâbí o-kpet esa kafâ kanong kanong ne banet ḿbé Jerúsélem ne Júda ńké ka/chi ǎ o-ró kámbé ké bushú emen. Otu Zedekyâ o/bwom bunwa ne Otu Nébúkanéza mú Bábyílon,

⁴ ne ké bubwô ámbu, Otu Nébúkanéza o/bê ne kángkáng basúja emen o-ba-kye Jerúsélem bunwa ké ací diǐkpú nyí etukáku diǐkpú, ké aje kátángekányi nyí Otu Zedekyâ o/ryí butu. Ba/bi bampyep-byití ké bukô-oshê, ba-bi ekpe nyí badarem ba-wáp oshê ba-fé ké kafâ,

⁵ ne ba-kye bunwa tete aje a-ribi diǐkpú ne din nyí Otu Zedekyâ o/ryí butu.

⁶ Ké ací kátángekányi ké etukáku enyii nyí dyije ándyi ńdyí kyibî-esong kyi/róng, ńkyí banet ba*fí to ne chwǒm ńkyí badaryí*

⁷ basúja ḿbé Bábyílon ba-bú ekpe nyí e/wáp Jerúsélem e-fé ké kafâ, ba-nung. Nang ké banet ḿbé Bábyílon ba/mû ba/wáp oshê ba-fé ké kafâ, kángkáng basúja ḿbé Júda ba/chêe ne buchú. Ba/cen ké kiǐfáng ńkyí kyifát-otu, ba-shwôm ké dyifyi ńdyí dyi/cibi ekpe ányi efee, ne ba-chêe ba-jâ ké kyicê ńkyí owo mú Jódan.

⁸ Nké basúja ḿbé Bábyílon ba/rim ne Otu Zedekyâ ké kyikû, ba-kám ǎ ké biǐdíndáng-byikit ḿbyí byi/fárâng ne Jéríku, ne kángkáng basúja emen ba-chêe ba-mîng ǎ.

⁹ Ba-kúng Otu Zedekyâ ba-ca ne nyǐ ké kyikit-Otu Nébúkanéza mú o/mû o-kyú u ké oshê mú Ryíla ké esí nyí Hámat, ne ányi nké Otu Nébúkanéza o/pan ǎ mpan.

¹⁰ Ké Ryíla, Otu Nébúkanéza o/ju bwǎn ḿbé Otu Zedekyâ ké bushú-Otu Zedekyâ oyén, o-ju to banet-ashí ḿbé Júda.

¹¹ Ké nkéré mú oo/ju kámbé, o-kye busa ba-fuu Otu Zedekyâ achi ba-twóp, ba-fé ǎ bamgbokobá, ba-kúng ǎ ba-dim ne nyǐ Bábyílon. Otu Zedekyâ o/waa ké mgbokobá ké Bábyílon tete o-kpú.

Ba/bên Kiǐtí-Kyise-Kyifen-Osówo echi

¹² Ké ací diǐkpú nyí etukáku etánge ké aje onyiryiká ne anyii nyí Otu Nébúkanéza o/ryí butu ké Bábyílon, Nébúzaradan, mú nkye bacê mú Otu Nébúkanéza ne onet-dyishí-basúja emen, o/nung Jerúsélem.

¹³ O-shí kiǐtí-kyise-kyifen-Osówo echi ne kyibám-butu ne byise ḿbyí biǐtí-banet ḿbyí Jerúsélem.

¹⁴ Basúja emen ba-bú ekpe nyí e/wáp oshê e-fé ké kafâ.

¹⁵ Ne Nébúzaradan o-kúng banet ḿbé ba/mû ba/waa ké oshê ne banet ḿbé ba/kwâa bǎmkpóngé ba-kpí o-dim ne mbé Bábyílon cibicibi ne banet ḿbé ba/mû ba/chêe ba-kâm basúja ḿbé Bábyílon.

¹⁶ Nké o/mîng kyicê-banet ḿbé kyikpu kyi/jang eróng kámbé, ḿbé ba*fí ne chwǒm* ké Júda o/fu, bakûchi bǎmkpóngé ké byifát.

¹⁷ Banet ḿbé Bábyílon ba-sé byěm ḿbyí ba/chi ké borôn, byěm wǎ byikwap ne kiimbâng-dyicáng ne byěm ḿbyí badabírî atû, ḿbyí byi/mû ké kiǐtí-kyise-kyifen-Osówo echi, ba-yip borôn ámu kángkáng ba-jâ ne mǔ Bábyílon.

¹⁸ Ba-yip to basóburu, ne boǒcáng ḿbú ba/mû ba/fé atông nyí mbe ba-shî ng kyikit-kyifen-Osówo echi, ne byěm-bǎmkpóngé ḿbyí ba/mû ba-nap ng etyuryíkáng, ne acáng nyí ba/mû ba-fâ baróng-enyam ḿbé ba/mû ba-chi i kyifen-Osówo, ne boǒcáng ḿbú ba/mû ba-shí i burwan, ne kángkáng byěm-borôn byikíri ḿbyí ba/mû ba-chi i bǎmkpóngé ne ḿbyí ké kiǐtí-kyise-kyifen-Osówo echi ba-jâ to ne mbyí.

¹⁹ Ba/yip kángkáng byěm ḿbyí ba/chi ké gûl ne syílyíba, byěm wǎ boǒcáng, ne acáng nyí ba/mû ba-níbî ng amánge-okwâ, ne acáng nyí ba/mû ba-fâ baróng-enyam ḿbé kyifen-Osówo echi, ne boǒcáng-atông, ne byikwap ḿbyí ba/mû ba-twôom m etyuryíkáng, ne acáng nyí ba/mû ba-fâ burwan, ne acáng nyí ba/mû ba-fâ bato-kyifen-Osówo echi.

²⁰ Byěm-borôn ḿbyí Otu Sólómon o/mû o/chi o-tî ké kiǐtí-kyise-kyifen-Osówo echi, byěm wǎ byikwap ḿbyí byiryên byifee, ne byěm ḿbyí badabírî atû, ne kiimbâng-dyicáng, ne bampong diǐkpú ne bafee ḿbé ba/mee ba-níbî dyicáng ándyi, byi/mû byi-jang ng eró ḿbyí badayip.

^21-22 Byikwap ámbyi byifee byi/mû eringe ebónge. Nang kyirá kyi/mû kyi/kwóp bamyíta nyíryinyi, kyi-rêe ké bamyíta batánge ne kyicê, kyi-cîp to ké bajam-bamyílyímyíta bachât esim onyiryiká, ne mbwo ké otyém. Dyishí-kyikwap nang dyirá ba/mû ba/chi kándyí ké borôn, ńdyí dyi/kwóp bamyíta bafee ne kyicê, ńdyí ba/fé kándyí basáng, ba-fé esang-byichí nyí edasan ragerage ké basáng ámbe.

²³ Ké busáng ḿbú kyikwap nang kyirá, esang-byichí ányi e/mû bajam batánge, ne â a/bwom kyísí a-ri ng bajam banyii esim onyiryiká ne din.

Ba/kúng Banet-Júda ba-dim ne Mbé Bábyílon

²⁴ Cibicibi ne byěm ámbyi, Nébúzaradan o/kúng to Seráya mú otu-banchi kyifen-Osówo, ne Zefanyâ mú o/kim ǎ, ne biǐtí-banet-ashí-bǎmkpóngé ḿbé kiǐtí-kyise-kyifen-Osówo echi bachât, o-dim to ne mbé wǎ bamgbokobá.

²⁵ Ké oshê, o/kúng onet-dyishí-basúja ḿbé Júda, ne bankye otu bacê ashí káchâtkányi ḿbé ba/mû ba/tôong ké oshê, ne nnyinyěng-onet-dyishí-basúja mú o/mû o-tî ng banwet-byití, ne biǐtí-banet byikíri ashí bajam bachât.

²⁶ Nébúzaradan o/kúng kámbé o-da-kye otu mú Bábyílon, mú o/mû ké oshê mú Ryíla,

²⁷ ké esí nyí Hámat. Ányi nké otu ámu o/kye kámbé busông, o-ju kámbé. Ne ba-kúng kâng banet ḿbé Júda ba-jâ ne mbé wǎ básóng.

²⁸ Nyín ocím-banet ḿbé Otu Nébúkanéza o/kúng o-dim ne mbé wǎ bamgbokobá. Ké nkéré o/ryí butu o-rí aje káchâtkányi, o/kúng égot-banet onyiryiká ne banet bujam ne bachât.

²⁹ Ké nkéré o/rí aje onyiryiká ne achât, o/kúng égot-banet enyii ne banet bujam esim diǐkpú ne bafee ké Jerúsélem.

³⁰ Ne ké aje emen bujam ne achât, Nébúzaradan o/kúng égot echât ne bajam-banet batánge esim bajam bafee ne ashí atánge. Kángkáng kangkang ba/kúng égot-banet bujam ne bachât ba-dim ne mbé.

³¹ Ké dyije ńdyí Otu Efyimeródak o/ryí butu ḿbú Bábyílon, nyǐ o/tông dyityém ecángê ne Otu Jehóyákin mú Júda, o-fîm ǎ ké mgbokobá. Ńkyín kyi/chi ké ací bujam ne atánge nyí etukáku diǐkpú ne efee ké aje bujam esim onyiryiká ne afee nyí ba/kám Otu Jehóyákin ba-dim ne nyǐ ké mgbokobá.

³² Otu Efyimeródak o/tî Otu Jehóyákin kanong, o-tî ǎ ké kyikit-ofê ńkyí kyi/nwa kyi-shwôm ńkyí o/kye batu bakíri ḿbé ba/mû ba/kám to kámbé ba-dim ne mbé Bábyílon.

³³ Ké bubwô ámbu kâng, ba/mîng Otu Jehóyákin o-yángê byídí-mgbokobá emen o-kûryí byiryíng ké ókpákpúrúk mú otu tete o-kpú.

³⁴ Ba/mû ba-kyâ ǎ akpuga kángkáng dyicí nyí odaré ńkyí kyi/fárâng ǎ tete o-kpú.