Jeryimáya 51 - Bokyi Bible

Óburúkpâbí o/chîpan Bábyílon Mpan

¹ Óburúkpâbí o/raa o/fu, me n/chi n-tugi Bábyílon ne banet emen [kyibî-bufú.]

² N/chi n-twóm banet-bushwôn ba-ba-bên Bábyílon wǎ bufú ḿbú budatugi biǐbyém bu-pwó. Nkéré mú dyicí ándyi ńdyí ba/chi ba-bên byěm dii/fyi, ba/chi ba-kye bunwa byicê byimúmú ba-mîng esí dyikáá.

³ *Da n̂g ekye basúja emen nkéré mú badaché abán ebe* ba-fé nang bankyû-byití ebe*. *Da n̂g emîng byisat*. Ju n̂g basúja bamúmú.

⁴ Ba/chi ba-némê kámbé ba-kpú ké byiká-oshê ebe.

⁵ Me Osówo Óburúkpâbí mú o/rêe o-shwôm n*da/mîng ne Ézerel ne Júda* nang ké baa/chi kyibî ké bushú ejí* mú Osówo mú onong mú Ézerel*.

⁶ Chêe n̂g ba-mîng Bábyílon. Chêe n̂g ba-nyii akpen enen. *Da n̂g emîng ba-ju běn ké bubwô-kyibî ńkyí Bábyílon*. Me mu n-só ng kámú ewa kántîk, n-chi ńkyí kyi/kwárê ne mǔ.

⁷ Bábyílon o/mû wǎ mmîk-gûl mú n/kám ké bubwô ejí, mú mu n-chi i ejíí emúmú e-bwóm bato. Eshê e/jwáp bato emen e-kpet efún.

⁸ Bábyílon oo/róng nang byiko o*da/kpá* ne baa/bên kámú. Tii n̂g kámú. Fé n̂g kámú bukye ké byibáp, katô byi/chi byi-kpú.

⁹ Bacinbánet ḿbé mbe ba-kyú u ké mǔ mbe ba-raa ng ba/fu, byi/kan byi/fu, byi-chwáp ng Bábyílon, nké nkéré o/mû oo/shwôm. Mîng n̂g byi-mîng kámú byi-bwa esim dyijê. Osówo oo/kye Bábyílon busông ne kángkáng busa emen, ne oo/bên kámú kángkáng.

¹⁰ Óburúkpâbí o/raa o/fu, banet ejí mbe ba-wonge e ba/fu, Óburúkpâbí oo/tông o/fu, be byi*da/chi kyibî*. Bâ n̂g byi-da-sét banet ḿbé ké Jerúsélem ńkyí Osówo Óburúkpâbí eten oo/chi.

¹¹ Óburúkpâbí oo/tírîng Batu ḿbé Médya, ké nǎ, o/fu, nyǐ o-bên n Bábyílon. Éné nké o/chi o-só ewa nyí ba/bên kiǐtí-kyise-kyifen emen echi. Banet-ashí-basúja ḿbé mbe ba-kyâ bunwa mbe ba-kyâ busa ba/fu, jee n̂g abán enen. Kpá n̂g byiko ne édem enen.

¹² Tông n̂g ekap nyí byidabên ekpe nyí Bábyílon. Fé n̂g banet-mbâm ba-jê. Tî n̂g basúja ké byikit. Fé n̂g banet-njât. Óburúkpâbí oo/chi ńkyí nyǐ o/fu, nyǐ o-chi i banet ḿbé Bábyílon.

¹³ Oshê ámu mu ne buce chwóó ne esang chwóó, nké nkéré emen oo/fyi, ne baa/két dyikpen emen.

¹⁴ Óburúkpâbí mú o/rêe o-shwôm oo/sem dyizîn emen o/fu, nyǐ o/chi o-bâ ne banet chwóó ba-ba-kye Bábyílon bunwa, wǎ dyibóng-agurubí, ne ba/chi ba-wonge dyiwonge ńdyí dyikpóge.

Okwan-Akpee ba-kye Osówo

¹⁵ Óburúkpâbí o/chi ejíí ké busa emen. Ké byinyídíng emen, nyǐ o/chi ejíí, o-paam bubóng.

¹⁶ Nyǐ o/kye busa, omu mú mu kyíbóng o-rime. Nyǐ mu o-chi i bubóng kángkáng bu-jîi. Nyǐ mu o-chi i kasabang ka-kédê ké nkéré omu odana, ne mu o-fîm m bufú ké kyise emen ńkyí mu o-tî ng kámbú o-twóm.

¹⁷ Â banet ba/ri ńkyín, ba-firi enyam, baa*nyît to chwǒm*. Erím-bakye nyi e-nîm m banet ḿbé mbe ba-chi i kányí, ké nǎ, esówo nyí mbe ba-chi i e*fí ké kafâ* ne e*fí ne dyikpen*.

¹⁸ Kyi/kwárê ńkyí badajwó kányí, ké nǎ, e*da/byí chwǒm*. Ba/chi ba-bên kányí ké nkéré Óburúkpâbí oo/bê ebachi ńkyí kyi/kwárê ǎ.

¹⁹ Osówo mú Jekôp o*fí wǎ erím-bakye ányi*. Nyǐ nké o/chi kángkáng byěm, ne oo/cá Ézerel o/fu, bakyú bachíchí-banet emen. O-bángê e Óburúkpâbí mú o/rêe o-shwôm.

Áma nyí Óburúkpâbí

²⁰ Óburúkpâbí o/raa o/fu, Bábyílon, wo a-chi i áma ejí, kyiyám ejí ńkyí mu n-nwa ng byití ne nkyí. Me n/yip ǒ m-kpógê eshê ne batu,

²¹ n-ju bubyî-orá ne banyû bubyî-orá, m-bên bamútu ḿbé bubyî-orá budatut ne banet ḿbé mbe ba-tut ng kámbé,

²² n-ju banyinchéng ne banyinyi, n-ju bakâa ne byisat, n-ju bwǎn-banyinchéng ne banyinyi,

²³ n-ju bambâm ebû ne byitú ebe, n-ju bamkpang kyifát ne bubyî-orá ebe, m-kpógê batu ne banet-ashí-basúja ebe.

Busông ḿbú Bábyílon

²⁴ Óburúkpâbí o/raa o/fu, ben ba/chi ba-ri eringe nyí n/chi n-só Bábyílon ne banet emen ewa ké kángkáng kyibî ńkyí ba/chi Jerúsélem.

²⁵ Bábyílon, wo amu wǎ kaku ńké nke ka-bên n ejíí emúmú, nké me Óburúkpâbí n-chi i onet-bushwôn eyên. N/chi n-kám ǒ n-shí ǒ kángkáng, a-firi atông átong.

²⁶ Buká bu*fí ḿbú badafîm ké biǐbwô-byise eyên ba-chîyip kámbú ba-bi kyise*. A/chi a-waa kyikim-dyikán ne banyá. Me Óburúkpâbí nké n/raa.

²⁷ Tông n̂g ekap nyí byidakye bunwa. Jwá n̂g ntán eringe nyí eshê edajwo. Kpá n̂g eshê byiko ba-nwa byití ne Bábyílon. Sét n̂g eshê nyí Arárat ne Myínyi ne Ashíkénaz ba-kye bunwa. Fîm m̂ onet-dyishí-basúja mú odatông kashú ké bunwa. Bâ n̂g ne bubyî-orá wǎ dyibóng-agurubí.

²⁸ Kpá n̂g eshê byiko ba-nwa byití ne Bábyílon. Twóm m̂ batu ḿbé Médya ba-bâ ne banet-ashí ebe ne banet-ashí-basúja ebe ne basúja ḿbé kángkáng eshê nyí nyi ké abwô ebe.

²⁹ Ejíí nyi e-tím m banê e-náng ng, ké nǎ, Óburúkpâbí o-kú o-chi i ńkyí nyǐ o/fu, nyǐ o-chi i Bábyílon o-firi kyikim-dyikán ńkyí onet oo*kyú to ké nkyí*.

³⁰ Basúja ḿbé Bábyílon baa/mîng bunwa, ne baa/waa ké byise ḿbyí badabwom ba-nwa bunwa. Busa boo/man kámbé ne ba/firi wǎ banyinyi. Baa/sé afyi-oshê, ne byise byi-kú byi-mang ng okwâ.

³¹ Banet-kyitwóm ba-kú ba-chêe ng ba-câ barî ké kyikû ba-da ng esét otu mú Bábyílon ba/fu, baa/bú oshê emen byicê byimúmú.

³² Banet-bushwôn baa/koo kyikit ńkyí mbe ba-nyáng ng kace, ne baa/fé okwâ ké byise ḿbyí badabwom ba-nwa bunwa. Basúja ḿbé Bábyílon ba/firi ké bushî.

³³ Kaa*bwon to ne banet-bushwôn ba-ju kámbé* ba-cím kámbé ké byiká wǎ esang-byichí nyí nyi ké kyikit ńkyí badacím e-byí ké biǐfâa e-róng kyísí*. Me Osówo Óburúkpâbí mú Ézerel mú o/rêe o-shwôm nké n/raa.

³⁴ Otu mú Bábyílon o/kám Jerúsélem o-ryí. O/chi oshê o-waa kafâ dyikáá wǎ otyu. O/myii kámú wǎ kyibî-enyam. O/kúng ńkyí mu o-ryuu ng, o-bwa ne kyicê o-pwó.

³⁵ Banet ḿbé Záyon baraa ba/fu, Bábyílon ori busông ké busông ḿbú o/kye bě. Banet ḿbé Jerúsélem baraa ba/fu, Bábyílon ori busông ké afaníkong nyí bii/ri.

Óburúkpâbí o/chi o-chwáp Ézerel

³⁶ Ne Óburúkpâbí o-raa kâng ne banet ḿbé Jerúsélem o/fu, me n/chi n-kúng kyiraa enen, ne n/chi n-chi banet-bushwôn enen ba-ri busông ké ńkyí ba/chi běn. N/chi n-chi buce ḿbú Bábyílon bu-núng boo*sen to*.

³⁷ Oshê ámu o/chi o-firi wǎ dyizu-biǐbyém ńdyí enyam edakyú. O/chi o-firi kyikit ńkyí kii*nwa to eri*. Onet o*fí mú o/chi o-kyú ké mǔ* ne bushî bu/chi bu-chi kángkáng banet ḿbé badari kámú.

³⁸ Kángkáng banet ḿbé Bábyílon mbe ba-fém m wǎ ekpang, ba-wonge e wǎ boǒbwán-ekpang.

³⁹ Mbé ba-ryí i aryî? N/chi n-chi kámbé dyijî, n-chi kámbé ba-jwáp bato ba-firi ké bunyîn-dyityém. Ba/chi ba-da-rí sáre baa*bûu to*.

⁴⁰ N/chi n-kúng kámbé ba-ju kámbé wǎ etám-ebû ne ebû ne etyítǎm. Me Óburúkpâbí nké n/raa.

Ńkyí kyi/chi kyi-chi Bábyílon

⁴¹ Óburúkpâbí o/raa kyi-kim ne Bábyílon o/fu, baa/koo oshê mú ejíí emúmú nyi e-kpee ng. Ejíí e*fí to e-man n eri Bábyílon*.

⁴² Baya ḿbé baryên baa/sú ba-cít Bábyílon.

⁴³ Eshê emen ee/bírî byikit ḿbyí bii*nwa to eri* ne e/firi wǎ kyikim-dyikán ńkyí omu o*fí* ńkyí onet o*fí o-kyú u* nang onet o*fí o-cen n ké nkyí*.

⁴⁴ N/chi n-kye Bêl mú mu osówo mú Bábyílon busông, n-chi ǎ o-bwa ne byěm emen ḿbyí o/jii o-só. Eshê ee*ba/chi e-chî ǎ ekye ofê*. Ekpe nyí Bábyílon ee/myii.

⁴⁵ Banet ḿbé Ézerel, chêe n̂g ké oshê ámu. Chêe n̂g ba-nyii dyikpen enen ké kafâ ejí ńké nke ka-jang ng mě esa.

⁴⁶ *Da n̂g ejwâa asa* ba-shî* ké byiraa ḿbyí bamu ba-jwo ng*. Kángkáng dyije, kiǐshwô kyikíri kyi-bâ, biǐshwô ḿbyí anwa enwa ké esí, ne ḿbyí otu obónge mu o-nwa ng ne otu okíri.

⁴⁷ Ké bubwô ámbu, nkéré mu o-bâ mú n/chi n-chi ńkyí kyi/kwárê mě ne erím-bakye nyí Bábyílon. N/chi n-fé oshê omúmú éshwân, ne n/chi n-ju kángkáng banet emen.

⁴⁸ Kángkáng byěm ké ejíí ne bubóng byi/chi byi-wonge ne bunyîn-dyityém ké nkéré Bábyílon oo/róng o-kye banet ḿbé mbe ba-fím m kyicê ńkyí bushûyû ba-bâ kámú ebabên.

⁴⁹ Bábyílon o/chi banet ba-kpú ké ejíí emúmú, kántîk, Bábyílon o/chi o-róng, ké nǎ, o/chi bujê-banet ḿbé Ézerel ba-kpú. Me Óburúkpâbí nké n/raa.

Kyitwóm ńkyí Óburúkpâbí o/twóm kyi-kâm Banet ḿbé Ézerel ké Bábyílon

⁵⁰ Óburúkpâbí o/raa ne banet emen ké Bábyílon o/fu, ben baa/fem bukyû. Dim m̂ kántîk, *da n̂g ebwom*. Nang ké ben ba*fí fáráng ne oshê enen* kabe n̂g kyi-kim ne me, mú mu Óburúkpâbí enen, ba-zîim Jerúsélem.

⁵¹ Ben bamu ba-raa ng ba/fu, baa/wuri bě éshwân chwóó. Be byi*fí to ne chwǒm ńkyí byidachi* ké nǎ, banet-bushwôn eten baa/koo byikit-ociring eten ḿbyí mbyi ké kiǐtí-kyise-kyifen-Osówo echi.

⁵² Ké bubwô ámbu kâng, me mu n-sét ng n/fu, nkéré mu o-bâ mú n/chi n-chi ńkyí kyi/kwárê mě ne erím-bakye nyí Bábyílon, ne banet ḿbé ba/chi ba-némê kámbé ba/chi ba-byé ké oshê omúmú.

⁵³ Â nang banet ḿbé Bábyílon ba/man eyú ké bubóng ba-da-bi kyikit ńkyí banet-byití baa*man enung áku* m-man n-twóm banet ba-da-bên kánkyí. Me Óburúkpâbí nké n/raa.

Dyibên Dyikíri ńdyí ba/chi ba-bên Bábyílon

⁵⁴ Óburúkpâbí o/raa o/fu, fwôo n̂g atông ba-jwo bukyû ḿbú mbe ba-tii ng ké Bábyílon, ba-jwo kyi-kim ne dyikán ńdyí mbe ba-ta ng ké oshê mú ba/bên.

⁵⁵ N-kú m-bên n Bábyílon, n-chi kámú o-firi pyêp. Basúja mbe ba-nung ng ké mǔ wǎ baya ḿbé badanáng, ne mbe ba-kyâ kámú bunwa ne kyicoge.

⁵⁶ Baa/bê ebên Bábyílon. Baa/kám basúja emen, ba-bún báre ebe. Me n-chi i Osówo mú odakye kyibî busông, ne n/chi n-chi ńkyí kyi/kwárê ne Bábyílon.

⁵⁷ N/chi n-chi batu emen ne banet-byinyídíng emen ne banet-ashí emen ne basúja emen ba-kûbwóm bato. Ba/chi ba-da-róng ké burê baa*bûu to*. Me Otu nké n/raa. Me n-chi i Óburúkpâbí mú o/rêe o-shwôm.

⁵⁸ Ba/chi ba-bú ekpe nyí kiǐtí-Bábyílon ba-pwó kyísí, ba-shí biǐnyáám-afyi emen. Kángkáng eshê e/chi bǎmkpóngé dyikáá. Busa ebe boo/shí. Me Óburúkpâbí mú o/rêe o-shwôm nké n/raa.

Ba/twóm Kyitwóm ńkyí Jeryimáya kyi-dim Bábyílon

⁵⁹ Onet-dyishí-bǎmkpóngé mú Otu Zedekyâ o/mû o-bángê e Seráya, mú wǎn-Neryâ, mú bonchí emen mú kánkán o/mû o-bángê e Masáya. Ké aje anyii nyí Otu Zedekyâ o/ryí butu ké Júda, Seráya o/mû mu o-dim m Bábyílon ne nyǐ ké kyikû, ne n/sét ǎ byiraa.

⁶⁰ N/sáng ké nwet kángkáng eringe nyí ba/chi ba-bên Bábyílon, cibicibi ne byěm ḿbyín kyi-kim ne Bábyílon.

⁶¹ N/sét Seráya n/fu, â a/ribi Bábyílon, kó kángkáng byěm ḿbyí n/sáng nyín wááng a-sét banet ḿbé Ézerel.

⁶² Ne a-fé kâng nshwam a/fu, Óburúkpâbí, wo aa/sét a/fu, wo a-bên n kyikit ńkyín eringe nyí chwǒm ńkyí nkyi ne dyikpen kii*ba/chi kyi-chîkyú ké nkyí* nang onet nang enyam* ne kyi/chi kyi-waa wǎ kyikim-dyikán ne banyá.

⁶³ Â a/kó nwet mún kángkáng a-sét banet, ǎ Seráya, bwá kámú ké buká, a-twóp ké kafâ-kace ńké Yuférétyis,

⁶⁴ a-raa a/fu, ńkyín nké kyi/chi kyi-chi Bábyílon. Bábyílon o/chi o-ríbî oo*byí to* ké bubwô ḿbú obên mú Óburúkpâbí o/chi o-bên [kámú.] Byiraa ḿbyí Jeryimáya byi/nyere nyín.