Jeryimáya 50 - Bokyi Bible

Ba/koo oshê mú Bábyílon

¹ Nyín kyitwóm ńkyí Óburúkpâbí o/twóm mě kyi-kim ne oshê mú Bábyílon ne banet emen. O/fu,

² sét eshê kyitwóm ńkyín. Sét kánkyí. Díp égbáng a-sét kánkyí. *Datî kánkyí ké kadip*. Bábyílon oo/róng. Baa/bên Máduk mú osówo emen. Baa/fé erím-bakye nyí Bábyílon éshwân. Baa/bên erím-bakye emen nyí edanut.

³ Oshê mú o/fím ké kyicê ńkyí bushûyû oo/bê ebakye Bábyílon bunwa, ne o/chi o-chi Bábyílon o-firi kyikim-dyikán. Banet ne enyam ba/chi ba-chêe, ne onet o*fí mú o/chi o-chîkyú ányi*.

Banet ḿbé Ézerel ba/chi ba-fyi

⁴ Óburúkpâbí o/sét o/fu, â nkéré ámu o/fyi, banet ḿbé Ézerel ne ḿbé Júda ba/chi ba-kpet etii ba-kyé ng mě me Osówo ebe ba-bâ.

⁵ Ba/chi ba-bí bukwóp ḿbú mbu bu-jâ Záyon, ba-dim kyicê ánkyi. Ba/chi ba-ryí ocím ne me mú baa*bên to* ba-sem Óburúkpâbí.

⁶ Banet ejí mbe wǎ etám-ebû nyí bambâm ebû baa/mîng kányí e-tánê ké eku. Mbé baa/yêe ké eku wǎ etám-ebû, ne baa/ráp kyikit ńkyí oshê ebe mu.

⁷ Nang yeě mú o/ri kámbé mu o-kyâ kámbé bunwa. Banet-bushwôn ebe ba-kú ba-raa ng ba/fu, baa/chi Óburúkpâbí ebe kyibî, ne ké bubwô ámbu, be byi*da/róng ké ńkyí bii/chi*. Banchí ebe ḿbé kpákpá ba/fé dyityém ké Óburúkpâbí, ne mbé bayén ba/mû ba/chi ba-waa ne dyityém efé ké nyǐ.

⁸ Banet ḿbé Ézerel, chêe n̂g ba-mîng Bábyílon. Mîng n̂g oshê ámu. Kyú n̂g bambwôp kashú-banet ḿbé badadim.

⁹ N/chi n-chi ncibi mú eshê nyí nyi ne busa ké kyicê ńkyí bushûyû, n-chi kányí e-ba-kye Bábyílon bunwa. Ba/chi ba-bwom ké byití ne Bábyílon ba-kpógê kámú. Mbé ba-chi i bachíchí-banryuu akán ḿbé badaché abán baa*jê*.

¹⁰ Ba/chi ba-wuri byěm ké Bábyílon, ne banet ḿbé ba/chi ba-wuri byěm ké mǔ ba/chi ba-yip kángkáng byěm ḿbyí mbe ba-ryuu ng. Me Óburúkpâbí nké n/raa.

Bábyílon o/róng

¹¹ Óburúkpâbí o/sét o/fu, banet ḿbé Bábyílon, ben ba/bên oshê ejí. Ben ba/firi ké bunyîn-dyityém ba-cen n wǎ mpong mú mu o-ryí i nkurung, ne wǎ otyép-kabyî-orá ńké kaa/ri buma,

¹² nké ba/chi ba-bwa ne kiǐtí-oshê enen kyísí kyísí, ba-wuri kámú éshwân. Bábyílon o/chi o-ryí esim ké burwám-eshê kángkáng. O/chi o-firi kiǐjínjwóm-kyikim-dyikán ńkyí kyi*fí ne omu*.

¹³ Ké bubwô-kafâ ejí ńké nke ka-sa ng mě, onet o*fí mú o/chi o-kyú ké Bábyílon*. O/chi o-shí, ne kángkáng banet ḿbé ba/chi ba-shwôm ké mǔ byiko byi/chi byi-kaa kámbé.

¹⁴ Banchê abán, bwom m̂ ké otáng-byití ne Bábyílon, ba-wáp kámú ba-fé ké otyém. Ché n̂g abán enen kángkáng ké Bábyílon, ké nǎ, oo/chi kyibî ké bushú ejí, me Óburúkpâbí.

¹⁵ Wonge ê dyiwonge-byití ba-wáp oshê ámu ba-fé ké otyém. Bábyílon oo/zú abwô ké bunwa kántîk. Baa/bú ekpe emen ba-pwó kyísí. N-kú n-só ng Bábyílon ewa. Ké bubwô ámbu, só n̂g kámbé ewa, ba-chi kámbé ńkyí mbé ba/chi banet bakíri.

¹⁶ *Da n̂g ebángê banet ba-chîkwón byiryíng ba-fuu kámbyí ké oshê ámu*. Ocinónet nang orá mú mu o-kyú u ké mǔ o/chi o-shî basúja ḿbé mbe ba-kyâ bunwa, ne o/chi o-bwa esim dyijê.

Banet ḿbé Ézerel ba/bwa Esim Dyijê

¹⁷ Óburúkpâbí o/raa o/fu, banet ḿbé Ézerel mbe wǎ etám-ebû nyí ekpang nyi e-nwa ng ne nyǐ, e-chi i kányí e-pwôo byiryibyiryi. Ké mbwôp kashú, otu mú Asyírya nké o/kye kámbé bunwa, ne Otu Nébúkanéza o-sé kámbé byikúú.

¹⁸ Ké bubwô ḿbún, me Osówo Óburúkpâbí mú Ézerel mú o/rêe o-shwôm n/chi n-kye Otu Nébúkanéza ne oshê emen busông, wǎ eringe nyí n/kye otu mú Asyírya.

¹⁹ N/chi m-bwa ne banet ḿbé Ézerel esim ké esí ebe. Mbé ba/chi ba-ryí byiryíng ḿbyí mbyi byi-kán n ké kaku ńké Kámel ne ké esí nyí Báshan, ne ba/chi ba-ryí kángkáng byíkwôn ḿbyí mbe ba-ryuu ng, ḿbyí mbyi ké esí nyí Éferem ne Gyílet.

²⁰ Ké nkéré mú nkéré ámu oo/fyi, kyibî kii*chi to ké Ézerel* ne dyityém ebên dii*chi to ké Júda* ké nǎ, n/chi m-pwoo banet ḿbé nn/nyii akpen ebe. Me Óburúkpâbí nké n/raa.

Osówo o/pan Bábyílon Mpan

²¹ Óburúkpâbí o/raa o/fu, kye n̂g banet ḿbé Meratyâm ne Pékot bunwa. Ju n̂g [kámbé] kángkáng. Chi n̂g kángkáng byěm ḿbyí n/sét běn. Me Óburúkpâbí nké n/raa.

²² Ba-kú ba-jwo ng kyicoge-byití ké esí ányi, ne baa/bên byěm chwóó.

²³ Bábyílon o/díp ejíí emúmú áma e-sêe byicê byicê. Kántîk, áma ányi aa/sêe. Byiko bii/kaa eshê emúmú ké ńkyí kii/chi oshê ámu.

²⁴ Bábyílon, wo a/nwa bunwa ne me, ne aa/róng ké kaǎtám ńké n/kuu n-tî ǒ, nang ké a*da/nyît kánké*.

²⁵ Nn/kuu kyikit ńkyí n/tî byěm-byití ejí, ne ké dyityém ejí ńdyí ndyi dyi-sa ng mě, nn/fîm kámbyí, ké nǎ, me Óburúkpâbí mú o/rêe o-shwôm mu ne bǎmkpóngé ḿbé ndachi ké Bábyílon.

²⁶ Kye n̂g kámú bunwa byicê byimúmú, ba-bú byikit ḿbyí ba/tî byiryíng. Zû n̂g byěm ḿbyí badawuri wǎ dyizu-byiryíng. Bên n̂ oshê ámu. *Da n̂g emîng chwǒm nang kyibónge*.

²⁷ Ju n̂g kángkáng basúja ebe. Kpet n̂g kámbé ba-pwó. Banet ḿbé Bábyílon ba/firi ké bukyû. Nkéré oo/fyi mú badakye kámbé busông.

²⁸ Banchêe byití mbe ba-chêe ng ké Bábyílon ba-bâ Jerúsélem, ne mbe ba-sét ng eringe nyí Osówo Óburúkpâbí eten mu o-só ng banet ḿbé Bábyílon ewa ké ńkyí ba/chi kiǐtí-kyise-kyifen emen echi.

²⁹ Sét n̂g banchê abán ba-kye Bábyílon bunwa. Twóm m̂ nang yeě mú odaman eché dyibán. Bwom m̂ ba-wáp oshê ba-fé ké kafâ. *Da n̂g emîng onet nang obónge o-fem*. Só n̂g oshê ámu ewa ké kángkáng byěm ḿbyí oo/chi, ba-chi kámú wǎ eringe nyí o/chi eshê ekíri, ké nǎ, o/tông byiko ne me, Osówo mú onong mú Ézerel.

³⁰ Éné nké ba/chi ba-ju byisat emen ké byiká-oshê, ne ba/chi ba-ju kángkáng basúja emen ké dyicí ándyi. Me Óburúkpâbí nké n/raa.

³¹ Bábyílon, bukpô boo/sú ǒ ké byiko. Ké bubwô ámbu, me Óburúkpâbí mú mu Otu Kyítá mú o/rêe o-shwôm mm/bírî ǒ esim. Nkéré oo/fyi mú nda ǒ ekye busông.

³² Oshê eyên mú odatông byiko o/chi o-kpán o-myii, ne onet o*fí mú o/chi o-chwáp ǒ a-bûu*. N/chi n-fé okwâ ké eshê eyên ne kángkáng byěm byi/chi byi-shí.

³³ Óburúkpâbí mú o/rêe o-shwôm o/raa o/fu, mbe ba-cít ng banet ḿbé Ézerel ne Júda. Kángkáng banet ḿbé ba/kám kámbé mbe ba-bám m kámbé kanong kanong, ba*fí ba-bángê e kámbé ba-dim*.

³⁴ Nké nyǐ mú o/chi o-nyii kámbé o-koo mu ne busa. O-bángê e Óburúkpâbí mú o/rêe o-shwôm. Nyǐ oyén o/chi o-kúng kyiraa ebe, ne o/chi o-bâ ne bunyîn-dyityém ké ejíí, nké o/chi o-kye banet ḿbé Bábyílon busông.

³⁵ Óburúkpâbí o/raa o/fu, bukyû buju Bábyílon. Bukyû buju banet emen ne batu ebe ne banet-bubong emen.

³⁶ Bukyû buju bansô epé emen ḿbé badasét byisédéng. Ba/róng enyam kanong kanong. Bukyû buju basúja emen. Bushî boo/kám kámbé kanong kanong.

³⁷ Ju n̂g bubyî-orá emen, ba-bên bamútu emen ḿbé bubyî-orá budatut. Ju n̂g basúja emen ḿbé o/yámê. Ba*fí ne busa*. Bên n̂ esang emen. Dugi n̂g kányí, ba-wuri.

³⁸ Chi n̂g omu o-mîng ena ké esí emen, ba-chi buce bu-núng. Bábyílon o-chi i oshê mú erím-bakye nyí edachi bushî, nyí ee/nîm banet emen.

³⁹ Ne ké bubwô ámbu, [byibî-enyam] byi/chi byi-sú ké Bábyílon. Banet baa*ba/chi ba-chîkyú ányi ne banyá* nang ké nkéré nang orá mú mu o-bâ ké kashú*.

⁴⁰ Ńkyí kyi/chi Sódom ne Gomóra ké nkéré mú m/bên eshê ányi ne eshê nyí e/fárâng kányí kyi/chi kyi-chi to Bábyílon. Onet o*fí mú o/chi o-chîkyú ányi*. Me Óburúkpâbí nké n/raa.

⁴¹ Banet mbe ba-fím m ké oshê mú bushûyû ba-bâ, kiǐtí-oshê ńkyí tíbítíbí. Batu chwóó mbe ba-kpá ng byiko-byití.

⁴² Baa/kúng báre ne bushwám ebe. Ba/bên atyém, ne baa*ri banet bafip*. Kyicoge ńkyí â ba-kú ba-yú u bubyî-orá ebe kyi-chi i wǎ baya ḿbé mbe ba-náng ng. Baa/kpá byiko ḿbyí badanwa byití ne Bábyílon.

⁴³ Otu mú Bábyílon oo/jwo kánkyí ne abwô emen aa/róng bogop. Bubân ne bafip bii/nung ǎ ké byiko wǎ onyinyi mú bufwon mbu bu-nwa ng ǎ.

⁴⁴ Me Óburúkpâbí n/chi m-bâ wǎ ekpang nyí nyi e-fím m ké kyizinge ńkyí kyi/fárâng ne kace ńké Jódan e-ribi ké aro, m-ba-chi banet ḿbé Bábyílon ba-chêe ké oshê ebe baa*kpá byiko*. Ne onet-dyishí mú me n/cá kâng o/chi o-kûtún oshê. Ba-kúng ng yeě ne ba-kan ne me. Yeě odaman ebwom bunwa ne me. Otu orá mú oda mě ekán ké dyishí.

⁴⁵ Ké bubwô ámbu, fwôo n̂g atông ba-jwo ńkyí n/fu, n-chi i oshê mú Bábyílon, ne ńkyí n/fu, n-chi i banet emen. Nang bwǎn ebe ba/chi ba-tut kámbé ba-dim ne mbé, ne bushî bu/chi bu-chi nang yeě nang yeě.

⁴⁶ Ké nkéré mú Bábyílon oo/róng, kyicoge kyi/chi kyi-chi ńkyí ejíí emúmú e/chi e-náng, ne eshê nyí áku e/chi e-jwo bukyû ḿbú ba/chi ba-tii.