Jeryimáya 49 - Bokyi Bible

Óburúkpâbí o/pan Ámon Mpan

¹ Ńnyín něen ńkyí Óburúkpâbí o/raa kyi-kim ne Ámon. O/fu, banet ḿbé Ézerel mbe nyá. Onet o*fí mú odabwom o-nwa bunwa eringe nyí baa*koo esí ebe*? Ebóng mbé baa/mîng banet ḿbé mbe ba-fâ Myíkom ba-koo esí nyí kyikû-banet ńkyí Gât ba-kyú ké nyǐ.

² Nké nkéré mu o-bâ mú n/chi n-chi banet ḿbé mbe ké dyityém-oshê ńdyí Rába ba-jwo kyicoge-byití, ne ba/chi ba-bú kámú, ba-shí kámú kángkáng. Banet ḿbé Ézerel kâng ba/chi ba-koo esí ebe ké abwô nyí banet ḿbé ba/mû ba/koo kámbé kányí.

³ Banet ḿbé Héshibon, tii n̂g. Baa/bên Âyi. Banyinyi ḿbé Rába, ta n̂g dyikán. Fé n̂g ekâa-byídí ba-ta dyikán. Zóngê ê ochéé mú ba/firi yógeyóge. Ba/chi ba-kúng osówo enen Myíkom ba-dim ne nyǐ oshê okíri, cibicibi ne banet-ashí emen ne banchi kyifen emen.

⁴ Ebóng ben banet ḿbé ba*da/fé dyityém ne me* bamu ba-tông ng byiko. Busa enen boo*man echi chwǒm*. Ebóng ben ba/fé dyityém ké busa enen ba-kûraa ba/fu, onet o*fí mú odacíp dyityém o-kye bě bunwa*.

⁵ N/chi m-bâ běn ne bushî byicê byimúmú. Ben ashí amúmú ba/chi ba-chêe. Nang yeě o/chi o-chêe o/fu, nyǐ o-nyii ng dyikpen emen, ne onet o*fí mú o/chi o-chîkpaa basúja enen o-tî kyikit kyibónge*.

⁶ Nké ké nkéré mú ké kashú, n/chi n-chîchi Ámon a-firi kanong eringe nyí a/mû. Me Óburúkpâbí nké n/raa.

Óburúkpâbí o/pan Édom Mpan

⁷ Nyín ńkyí Óburúkpâbí mú o/rêe o-shwôm o/raa kyi-kim ne Édom. O/fu, banet ḿbé Édom ba*fí to ne bubong*? Bankye bacê ebe ba*fí to ba-man n esét kámbé ńkyí badachi*? Byinyídíng ebe kángkáng bii/rím?

⁸ Banet ḿbé Dyídan, pín n̂ esim ba-chêe. Rem m̂. N-kú m-bâ eju Édom mú kyikû-banet ńkyí Éso, ké nǎ, nkéré oo/fyi mú ndakye kámbé busông.

⁹ Ké nkéré banet ba-kú ba-bóng ng byirim-byichí, [ba-mîng ng boǒnyín-byirim ké asín, ne â banet-kajii ba/bê ne buchú, ba-kúng ng ńkyí kyi/nyîn kámbé nké nke.

¹⁰ Nké me] mm/bâa kyikû-banet ńkyí Éso n-tî wááng, ne nn/ri kyikit ebe ńkyí mbe ba-rem m. Ké bubwô ámbu, baa*man to erem*. Nn/ju kángkáng banet ḿbé Édom. Nang onet obónge o*da/waa*.

¹¹ Mîng n̂g mě ne bwǎn-byibén enen ne n/chi n-tî kámbé kanong. Banyǐnkú enen ba-man n ekyú ne me.

¹² Â nang banet ḿbé ba/mû ba*da/kwárê ḿbé ndakye kámbé busông* nké ba/mû ba/jwáp ké mmîk mú busông, ben ba/mû ba/kabe ba/fu, me m/mû mm*ba/chi n-kye běn busông*? Aa*wááng* ba-man ba-jwáp ké mmîk ámu.

¹³ Me oyén nn/sem n-kó byiko ejí n/fu, oshê mú Búzara o/chi o-firi kyikit ńkyí kii*nwa to eri* ké kyikim-dyikán. Banet ba/chi ba-jwó kámú, ba-kúng dyizîn emen wǎ kyishû. N/chi n-shí eshê nyí e/fárâng kámú e-waa éné ne banyá. Me Óburúkpâbí nké n/raa.

¹⁴ Me n/sét n/fu, Édom, Óburúkpâbí oo/twóm mě. Oo/twóm mě o/fu, me nsét banet-bushwôn enen ba-cibi basúja ebe kyikit kyibónge, ba-kpá byiko ḿbyí bada běn ebakye bunwa.

¹⁵ Óburúkpâbí o/chi o-chi běn baa*kyú to ne busa* ne onet o*fí mú o/chi o-kye běn ofê*.

¹⁶ Byiko etông enen bii/nîm běn. Onet o*fí mú mu o-shî ng běn wǎ eringe nyí ben bamu ba-kabe ng*. Ben bamu ba-kyú u ké afít-aká, kyíbóng-eku twóóm. Nké nang bamu ba-kyú u kyíbóng kyíbóng wǎ kiinkwa, Óburúkpâbí o/chi o-bwa ne ben kyísí. Óburúkpâbí oo/raa.

¹⁷ Óburúkpâbí o/fu, bukyû ḿbú bu/chi bu-bâ ké Édom bu/chi bu-bên ḿbú nang yeě mú o/shwôm ányi byiko byi/chi byi-kaa ǎ, bushî bu-kám ǎ.

¹⁸ Ńkyí kyi/chi Sódom ne Gomóra ké nkéré mú ba/bên eshê ányi ne eshê nyí e/fárâng kányí kyi/chi kyi-chi to Édom. Onet o*fí mú o/chi o-chîkyú ányi ne banyá*. Me Óburúkpâbí nké n/raa.

¹⁹ N/chi m-bâ wǎ ekpang nyí nyi e-fím m ké kyizinge ńkyí kyi/fárâng ne kace ńké Jódan e-ribi ké aro, m-ba-chi banet ḿbé Édom ba-chêe ké oshê ebe baa*kpá byiko*. Ne onet-dyishí mú me n/cá ǎ kâng o/chi o-kûtún oshê. Ba-kúng ng yeě ne ba-kan ne me. Yeě odaman ebwom bunwa ne me. Otu orá mú oda mě ekán ké dyishí.

²⁰ Ké bubwô ámbu, fwôo n̂g atông ba-jwo ńkyí nn/kabe n/fu, n-chi i banet ḿbé Édom, ne ńkyí n/fu, n-chi i banet ḿbé oshê mú Táman. Nang bwǎn ebe ba/chi ba-tut kámbé ba-dim ne mbé, ne bushî bu/chi bu-chi nang yeě nang yeě.

²¹ Nkéré mú Édom ee/róng, kyicoge kyi/chi kyi-chi ńkyí ejíí emúmú e/chi e-náng, ne bukyû ḿbú ba/chi ba-tii bu/chi bu-ribi ké dyiga ńdyí badakó Ákwaba.

²² Onet-bushwôn o/chi o-kye Búzara bunwa wǎ kiinkwa ńkyí kii/byí kyi-paam abyibabang. Ké dyicí ándyi, bushî bu/chi bu-chi basúja ḿbé Édom wǎ onyinyi mú bufwon mbu bu-nwa ng ǎ.

Óburúkpâbí o/pan Damásákus Mpan

²³ Nyín ńkyí Óburúkpâbí o/sét kyi-kim ne Damásákus. Banet ḿbé mbe ké eshê nyí Hámat ne Ápat ba/firi ne dyityém ké bubwô, ké nǎ, baa/jwo kyibî-chwǒm. Dyityém dyi-kú dyi-náng ng kámbé wǎ baya, ne ba*fí to ba-man n ejáng*.

²⁴ Banet ḿbé Damásákus ba/firi kyeekyee, ne baa/chêe ké bushî. Ba/firi ké busông ne bafip wǎ onyinyi mú bufwon mbu bu-nwa ng ǎ.

²⁵ Baa/chêe ba-mîng kiǐtí-oshê ńkyí kyi/mû ké [bunyîn-dyityém.]

²⁶ Ké dyicí ándyi, ba/chi ba-ju byisat emen ké byiká-oshê ne kángkáng basúja emen.

²⁷ N/chi n-fé okwâ ké ekpe nyí Damásákus, ne n/chi n-shí byibám-butu ḿbyí Otu Benhádat. Me Óburúkpâbí mú o/rêe o-shwôm nké n/raa.

Óburúkpâbí o/pan Kyikû-Banet ńkyí Kéda ne Oshê mú Házo Mpan

²⁸ Nyín ńkyí Óburúkpâbí o/sét kyi-kim ne kyikû-banet ńkyí Kéda ne kyikim-oshê ńkyí nkyi ké bubwô ḿbú Házo, ḿbyí Otu Nébúkanéza mú Bábyílon o/kpógê kámbyí. O/fu, kye n̂g banet ḿbé Kéda bunwa ba-ju kyikû-banet ánkyi ńkyí banet ḿbé ba/fím ké kyicê ńkyí esû nyi e-byí i.

²⁹ Koo n̂g bampyep ebe ḿbé badabi ké byídí ne byitú ebe ne byídí-bampyep ebe ne kángkáng byěm ḿbyí mbyi ké bampyep ebe. Kúng n̂g boonyam-atû ebe ba-sét kámbé ba/fu, bushî boo/fárâng běn.

³⁰ Banet ḿbé Házo, me Óburúkpâbí mu n-kuri ng běn ekó n/fu, zóngê ê ochéé ba-tíbî ba-da-rem. Otu Nébúkanéza mu o-nam m běn dyiju, ne mu o-raa ng něen o/fu,

³¹ bâ n̂g byi-dim, byi-da-kye banet ámbe ḿbé ba/fu, mbé mbe ké bunyîn-dyityém bunwa. Oshê ebe o*fí ne afyi* ba*da/fín kámú* ne nang chwǒm kyi*fí ńkyí kyi/ku kámú*.

³² Koo n̂g boonyam-atû ebe ne bampong ebe. N/chi m-pwó banet ámbe ké kángkáng byikit, ḿbé mbe ba-két ng eji ebe e-waa boǒkím, ne n/chi m-bâ kámbé ne busông byicê byimúmú.

³³ Házo o/chi o-bírî kyikim-dyikán ńkyí enyam nké nke edakûkyú. Onet o*fí mú o/chi o-chîkyú ányi ne banyá*. Me Óburúkpâbí nké n/raa.

Óburúkpâbí o/pan Élam Mpan

³⁴ Ńdyí Otu Zedekyâ o-ryí i butu ké Júda o-bâ, Óburúkpâbí mú o/rêe o-shwôm o/pem ne me kyi-kim ne oshê mú Élam.

³⁵ O/sét o/fu, n/chi n-ju kángkáng banchê abán ḿbé baa/chi Élam e/firi ne dyizong-busa ámbu.

³⁶ N/chi n-chi afú a-fím ké kángkáng byikit a-ba-tugi ké Élam, ne n/chi m-pwó banet emen ké kángkáng byikit, tete oshê nang orá o-firi ne onet-Élam mú o/chêe byití.

³⁷ N/chi n-chi banet ḿbé Élam ba-kûshî banet-bushwôn ebe ḿbé mbe ba-ryuu ng ba/fu, mbé ba-ju ng kámbé. Ké kiǐtí-busa-dyityém ejí, n/chi n-ju banet ḿbé Élam n-twóm basúja ba-da-nwa ne mbé tete n-ju kámbé kángkáng.

³⁸ N/chi n-ju batu ebe ne banet-ashí ebe n-tî kakyúng-butu ńké ejí ányi.

³⁹ Nké ké nkéré mú ké kashú, n/chi n-chi banet ḿbé Élam ba-chîfiri ne kanong wǎ eringe nyí ba/mû. Me Óburúkpâbí nké n/raa.