Jeryimáya 48 - Bokyi Bible

Ba/bên Mówep

¹ Nyín něen ńkyí Óburúkpâbí mú o/rêe o-shwôm o/sét kyi-kim ne Mówep o/fu, ri n̂g banet ḿbé Nébo bafip, ké nǎ, baa/bên oshê ebe. Baa/koo Kyiryǎtyam. Baa/bú kiǐtí-kyise emen ńkyí badabwom ba-nwa byití ba-pwó, ba-fé banet emen éshwân.

² Bunong ḿbú Mówep bu*fí to*. Banet-bushwôn baa/koo Héshibon, ne mbe ba-pám m oshê mú Mówep ebên. Oshê mú Mádámen oo*faa to ojá*. Basúja ba/chi ba-nwa bunwa ne mǔ.

³ Banet ḿbé Horónyam mbe ba-tii ng ba/fu, afaníkong, bukyû.

⁴ Baa/bên Mówep. Jwo n̂g eringe nyí ḿbé bwǎsíng mbe ba-tii ng.

⁵ Jwo n̂g ejá-bayit ebe nyí mbe ba-tii ng ba-câ ké bukwóp ḿbú Lúhit, bukyû-bafip ḿbú mbe ba-tii ng ké bukwóp ḿbú mbu bu-wâa ng Horónyam.

⁶ Mbe ba-raa ng ba/fu, zóngê ê ochéé ba-nyii akpen enen. Zóngê ê wǎ kaanyam-atû ńké kaa*nyît onet*.

⁷ Mówep, wo a/fé dyityém ké busa eyên ne efang eyên, nké kántîk, nang wo oyén ba/chi ba-kpógê ǒ to. Ba/chi ba-kám Kémos mú orím-bukye eyên ba-jâ ne mǔ oshê okíri, cibicibi ne banet-ashí emen ne banchi kyifen emen.

⁸ Oshê o*fí mú baa*ba/chi ba-bên kámú*. Ba/chi ba-bên ewo ne byikit ḿbyí ndege ńdege. Me Óburúkpâbí nké n/raa.

⁹ Sím m̂ Mówep dyikun, ké nǎ, ba-kú ba-bâ ebên kámú. Ba/chi ba-shí eshê emen, ne onet oo*ba/chi o-chîkyú ké mǔ*.

¹⁰ Shú n̂g onet mú o*fí o-chi i bǎmkpóngé ḿbé Óburúkpâbí ne dyityém emen*. Shú n̂g onet mú o*fí o-kpet ng o-ju*.

Ba/bên Eshê nyí Mówep

¹¹ Óburúkpâbí o/raa o/fu, Mówep kángkáng nkéré oo/kyú kanong, ne ba*da ǎ ekúng ne o-dim oshê okíri*. Mówep mu wǎ bato ḿbé baa/tî ba-dé, onet o*da/náng kámbé* ne ba*da/yángê ne kámbé ba-fím ké otyu obónge ba-fé ké otyu okíri*. Kyinung emen kyi*da/yángê ne* ne bunyîn emen bu/tôong kerededet.

¹² Kántîk kâng, nkéré mu o-bâ mú n/chi n-twóm banet ba-ba-bírî Mówep ba-pwó wǎ bato. Ba/chi ba-pwó etyu-bato emen e-waa kafâ dyikáá, ba-sé kányí rugirugi.

¹³ Banet ḿbé Mówep ba/chi ba-nyît ba/fu, Kémos mú orím-bukye ebe oo/nîm kámbé wǎ eringe nyí ba/nîm banet ḿbé Ézerel ne Bétel mú mu Osówo mú mbé ba/fé dyityém.

¹⁴ Banet ḿbé Mówep, ebóng ben bamu ba-kúng ng byiko enen ba/fu, ben ba-chi i bakân-banet, basúja ḿbé baa/nwa byití ba-kpógê.

¹⁵ Baa/bên Mówep ne eshê emen. Baa/ju byisat ebe ḿbyí byidajang enwa. Me Otu nké n/raa. Me n-chi i Óburúkpâbí mú o/rêe o-shwôm.

¹⁶ Busông ḿbú Mówep mbu bu-bâ. Bukyû emen mbu bu-bâ abeabe.

¹⁷ Ben banet ḿbé bamu ba-kyú u fáráng, tii n̂g oshê ámu bukyû, ben kángkáng mú bamu ba-nyît ng dyizîn emen. Raa n̂g ba/fu, baa/koo kiǐtí-busa emen ńkyí mu o-níbî ng oshê. Busa emen ne akpee emen byi*fí to*.

¹⁸ Ben mú bamu ba-kyú u ké Dyíbon, shû n̂g kyísí ké byikit enen ḿbyí ofê, ba-byak kyísí ké édúkǎndú. Onet mú odabên Mówep mu nyín, ne oo/bên byise ḿbyí badabwom ba-nwa byití kángkáng.

¹⁹ Ben mú bamu ba-kyú u ké Áro, bwom m̂ ké bukwóp ba-bám. Bí n̂g banet ḿbé mbe ba-chêe ng ba-sét běn ńkyí kii/chi.

²⁰ Ba/chi ba-faa ba/fu, Mówep oo/róng. Tii n̂g kámú. Baa/fé kámú éshwân. Sét n̂g ba-câ ké kace ńké Ánon ba/fu, baa/bên Mówep.

²¹ Mpan oo/bê o-kâm eshê nyí ké byikit ḿbyí ndege ńdege, o-kâm Hólon ne Jáza ne Méfat

²² ne Dyíbon ne Nébo ne Bét-Dyibyilatyâm

²³ ne Kyiryǎtyam ne Bét-Gámul ne Bét-Môn

²⁴ ne Kérot ne Búzara. Mpan oo/bê o-kâm kángkáng eshê nyí Mówep, nyí nyi fáráng ne nyí tíbítíbí.

²⁵ Baa/kpógê busa ḿbú Mówep, baa/ju kámbú. Me Óburúkpâbí nké n/raa.

Óburúkpâbí o/chi o-bwa ne Mówep Kyísí Kyísí

²⁶ Óburúkpâbí o/raa o/fu, chi Mówep o-kûbwóm bato, ké nǎ, o/bwom bunwa ne me. Mówep o/chi o-bínê ké éfâm emen nyí o/fám, ne banet ba/chi ba-jwó kámú.

²⁷ Mówep, zîim eringe nyí wo a/jwó banet ḿbé Ézerel. Wo a/chi kámbé byěm wǎ ba/kám kámbé ne banet-kajii.

²⁸ Ben banet ḿbé bamu ba-kyú u ké Mówep, mîng n̂g eshê enen. Ca n̂g ba-da-kyú ké bakô-eku. Kyú n̂g wǎ ojóbyiryi-esí mú odachi dyiju ké bakô-biǐmbém.

²⁹ Mówep mu o-jang ng etông byiko. Me nn/jwo eringe nyí banet emen mbe ba-tông ng byiko, eringe nyí mbe ba-kabe ng kyi-kim ne byiko ebe.

³⁰ Me Óburúkpâbí mu n-nyît ng kyi-kim ne byiko ebe etông. Byiko etông ebe byi*da/byí chwǒm* ne byěm ḿbyí mbe ba-chi i bii*ri*.

³¹ Ne ké bubwô ámbu, me n/chi n-tii nang yeě mú mu ké Mówep ne banet ḿbé Kî-Héres.

³² Me n/chi n-tii banet ḿbé Síma n-shwôm eringe nyí n/chi n-tii banet ḿbé Jáze. Oshê mú Síma, wo amu wǎ kyichí ńkyí byire emen byi/tan byi-shwôm baya ḿbé badakó Bukyû, byi-tan tete byi-ribi Jáze. Nké kántîk, baa/bên byirim eyên ḿbyí amu a-zím m ne kyifang.

³³ Baa/kúng dyijêe ne bunyîn-dyityém ké esí nyí Mówep nyí edabát byiryíng ba-dim ne mbú. Nn/chi bato ba*fí to ba-byí i ké kyikit ńkyí mbe ba-nwárê ng bato*. Onet o*fí to mú odachi bato ámbe o-kûwonge e o-jêe ng*.

³⁴ Banet ḿbé [Héshibon ne Élyâle mbe ba-tii ng,] ne bukyû ebe mbu bu-byí i Jáhaz. Banet ḿbé Zówa ba-man n ejwo kámbú, ne mbu bu-ribi ng Horónyam ne Égalat-Shelyíshyâ. Nang kace ńké Nyímirim kaa/núng.

³⁵ Me n/chi n-chi banet ḿbé Mówep ba-mîng byifen echi ké byikit ebe ḿbyí mbe ba-sháng ng bakye, n-chi to kámbé ba-mîng burwan eshí ba-kyâ esówo ebe. Me Óburúkpâbí nké n/raa.

³⁶ Ké bubwô ḿbún, dyityém ejí ndyi dyi-tii ng Mówep ne banet ḿbé Kî-Héres, wǎ onet mú mu o-tii ng bukyû ké kaantán ejwá, ké nǎ, kángkáng byěm ḿbyí ba/mû ne mbyí byi*fí to*.

³⁷ Mbé ashí amúmú baa/pwát ashí, ba-kwárê byiti. Mbé ashí amúmú baa/ját byibáp ké abwô ebe, ne nang yeě nang yeě oo/bwá byídí-dyikán eta.

³⁸ Bukyû búkyu nké bu/firi ké kángkáng byise ne ké étíbingé nyí Mówep, ké nǎ, me nn/sé Mówep wǎ otyu mú onet oo*chi to*.

³⁹ Nn/sé Mówep rugirugi, tii n̂g. Nn/fé Mówep éshwân. Oo/shí, ne kángkáng eshê nyí e/fárâng kámú e-kú e-jwó ng kámú. Me Óburúkpâbí nké n/raa.

Mówep oo*ba/chi o-fem*

⁴⁰ Óburúkpâbí oo/ryí ocím o/fu, oshê obónge o/chi o-ba-tíngê ké Mówep wǎ kiinkwa ńkyí kii/byí kyi-paam abyibabang,

⁴¹ ne oshê ámu o/chi o-koo eshê ne byise ḿbyí badabwom ba-nwa byití. Ké dyicí ándyi, basúja ḿbé Mówep ba/chi ba-kûshî wǎ onyinyi mú bufwon mbu bu-nwa ng ǎ.

⁴² Ba/chi ba-bên Mówep, ne oo*ba/chi o-chîkyú oshê* ké nǎ, o/bwom bunwa ne me.

⁴³ Bushî ne abíng ne boǒtám mbyi byi-bám m banet ḿbé Mówep. Óburúkpâbí oo/raa.

⁴⁴ Nang yeě nké o/kan o/fu, nyǐ o-chêe ng bushî ámbu, o/chi o-róng ké abíng, ne nang yeě nké o/byí ké abíng ányi, boǒtám bu/chi bu-kám ǎ, ké nǎ, Óburúkpâbí oo/tî nkéré mú o/chi o-bên Mówep.

⁴⁵ Banet ḿbé ba/chêe byití mbe ba-kan n ba/fu, mbé ba-da ng erem ké Héshibon, oshê mú o/mû ké abwô nyí Otu Síhon, nké oshê ámu o-kú o-mang ng okwâ. Okwâ oo/shí bati ne bubóng-eku nyí banet Mówep ḿbé byití byidanyîn kámbé.

⁴⁶ Ri n̂g banet ḿbé Mówep bafip. Baa/ju banet ḿbé mbe ba-fâ Kémos, ne baa/kúng bwǎn ebe ba-dim ne mbé wǎ bamgbokobá.

⁴⁷ Nké ké ací nyí nyi a-bâ ké kashú, Óburúkpâbí o/chi o-chi Mówep o-firi kanong eringe nyí o/mû. Kángkáng byěm ḿbyín ḿbyí Óburúkpâbí oo/sét byi/chi byi-chi Mówep.