Jeryimáya 46 - Bokyi Bible

Ba/kpógê Éjip ké Kákémis

¹ Óburúkpâbí o/sét mě kyi-kim ne eshê nyí ee*nyît ǎ*.

² O/kpet ne Éjip. Nyín ńkyí o/sét kyi-kim ne basúja ḿbé Otu Néko mú Éjip, ḿbé Otu Nébúkanéza mú Bábyílon o/kpógê ké Kákémis, fáráng ne kace ńké Yuférétyis, ké aje anyii nyí Otu Jehóyákim o/ryí butu ké Júda.

³ Banet-ashí-basúja ḿbé Éjip ba/wonge ba/fu, kúng n̂g édem enen ba-dim byití.

⁴ Kpá n̂g bubyî-orá enen byiko ba-yú ké mbú. Bwom m̂ ké otáng ba-cít etam enen. Jee n̂g byíbye enen ba-fé bankyû-byití enen.

⁵ Nké Óburúkpâbí o/bí o/fu, me n/ri ebóng. Ba-kú ba-bwa ng esim ne bushî. Baa/nwa ne basúja ebe ba-bwa esim. Bushî boo/kám kámbé ba-kú ba-zóngê e kakânkakân nang achi ké esim ba*fí ba-bírî ng*.

⁶ Banet ḿbé badakwáng ochéé baa*fem*. Basúja baa*ba/chi ba-fem*. Mbe ba-kpán n ba-myii ng ké kyicê ńkyí bushûyû fáráng ne kace ńké Yuférétyis.

⁷ Yeě mu o-yú u o-bâ kyíbóng něen wǎ kace ńké Nâl, wǎ kace ńké ka-kú ka-sú u.

⁸ Éjip nké nyi e-yú u e-bâ éné wǎ kace ńké Nâl, wǎ kace ńké ka-kú ka-sú u. Éjip e/fu, me n/chi n-sú n-cít ejíí. Me n/chi n-ju eshê ne banet ḿbé mbe ké nyǐ.

⁹ Nyán n̂ bubyî-orá bu-dim, bamútu ḿbé mbu bu-tut ng to badim. Twóm m̂ basúja ba-dim. Twóm m̂ banet ḿbé ba/fím Sudân ne Lyíbya ḿbé badaníbî édem ne banet ḿbé ba/fím Lyíbya ḿbé badaman eché abán.

¹⁰ Nyín dyicí ńdyí Óburúkpâbí mú o/rêe o-shwôm mú mu Otu Kyítá. Kurún o/chi o-só ewa. Kurún o/chi o-kye banet-bushwôn emen busông. Kashwám emen ka/chi ka-ryí kámbé tete ka-zût, ka-jwáp baróng ebe tete ba-kwárê kánké. Kurún, nyǐ mú o/rêe o-shwôm o/chi o-yip banet-bushwôn emen o-chi kyifen ké kyicê ńkyí bushûyû fáráng ne kace ńké Yuférétyis.

¹¹ Banet ḿbé Éjip, ca n̂g Gyílet ba-da-kyé bukye. Kángkáng bakye enen ba*fí ba-chwáp ng*. Chwǒm kyi*fí ńkyí kyi/chi kyi-chi běn ba-nyange*.

¹² Eshê ee/jwo kyi-kim ne éshwân enen. Nang yeě oo/jwo bukyû ḿbú bamu ba-tii ng. Súja obónge mu o-kpán n óbe, mbé ashí amúmú ba-da-myii.

Otu Nébúkanéza o/bê

¹³ Ké nkéré Otu Nébúkanéza mú Bábyílon o/bê o-ba-kye Éjip bunwa, Óburúkpâbí o/sét mě o/fu,

¹⁴ sét kánkyí ké eshê nyí Myígidol ne Mémfyis ne Tapánhas nyí nyi ké Éjip a/fu, kpá n̂g byiko ḿbyí badabwom bunwa ba-nyii byiko enen. Byití bii/wâng běn byi-fé ké kafâ.

¹⁵ Ebóng Ápis mú kiǐtí-osówo enen o/róng. Óburúkpâbí oo/díp ǎ o-myii kyísí. [

¹⁶ Basúja enen baa/kpán ba-myii.] Nang yeě mu o-raa ng ne óbe o/fu, byichêe babap byi-jâ byi-kâm banet eten eringe nyí byidafem kashwám ńké onet-bushwôn eten.

¹⁷ Fé n̂g otu mú Éjip dyizîn ńdyí dyifyîfî ńdyí badakó Nchi Kyicoge-Ntông Byiko mú o/mîng echi ńkyí o/mû o/chi o-chi.

¹⁸ Me Óburúkpâbí mú o/rêe o-shwôm n-chi i Otu. Me n-chi i Osówo mú mu okpó. Eringe nyí kaku ńké Tábo ka/nyâam ka-shwôm kángkáng eku ne eringe nyí kaku ńké Kámel ka/nyâam ka-shwôm baya, éné to nké busa ḿbú onet mú mu o-kyâ běn bunwa bu/chi bu-kyú.

¹⁹ Ben banet ḿbé Éjip, kpá n̂g byiko ḿbyí ba/chi ba-kúng běn ba-dim ne ben wǎ bamgbokobá. Mémfyis o/chi o-firi kyikim-dyikán, oshê mú oo/shí, mú onet o*fí to ké mǔ*.

²⁰ Éjip nyi wǎ mpong mú onong mú ocincing obónge mú o/fím ké kyicê ńkyí bushûyû mu o-kyâ kámú afaníkong.

²¹ Nang basúja emen ḿbé o/yámê ba*fí ne busa* wǎ bwǎn-bampong. Ba*da/bwom ba-nwa bunwa* mbé ashí amúmú ba/pín esim ba-chêe. Dyicí-busông ebe dyi/mû dii/ribi, nkéré mú badaju kámbé.

²² Éjip e-kú e-chêe ng, e-raa ng e-câ wǎ efyi ké nkéré banet-bushwôn emen mbe ba-bâ. Mbe ba-kyâ ǎ bunwa ne akye wǎ banet ḿbé mbe ba-twom m byichí

²³ ba-bên n kyizinge. Banet ebe ba/jê ḿbé baa*nwa epan*. Basúja ebe ba/jê ba-shwôm agurubí.

²⁴ Baa/fé banet ḿbé Éjip éshwân. Banet ḿbé kyicê ńkyí bushûyû baa/kpógê kámbé. Me Óburúkpâbí nké n/raa.

²⁵ Osówo Óburúkpâbí mú Ézerel mú o/rêe o-shwôm o/raa o/fu, me n/chi n-kye Ámon mú mu osówo mú Tébes, cibicibi ne Éjip ne esówo emen ne batu emen busông. N/chi n-kúng otu mú Éjip ne kángkáng banet ḿbé ba/fé dyityém ne nyǐ

²⁶ n-kye Otu Nébúkanéza ne basúja emen ḿbé mbe ba-ryuu ng ba/fu, mbé ba-ju ng kámbé. Nké ké nkéré mú mu o-bâ ké kashú, banet ba/chi ba-chîkyú ké Éjip wǎ eringe nyí ba/mû ba/kyú ké nkéré mú o/shwôm ké esim. Me Óburúkpâbí nké n/raa.

Óburúkpâbí o/chi o-nyii Banet Emen

²⁷ Banet ejí, *da n̂g echi ba-shî*. Banet ḿbé Ézerel, *da n̂g eshî*. Me n/chi n-nyii běn ké esí ányi nyí tíbítíbí, ké esí nyí ben bamu bamgbokobá. Ben ba/chi ba-bwa esim dyijê ba-ba-kyú ké bunyîn-dyityém. N/chi n-ku běn, ne onet o*fí mú o/chi o-chi běn ba-shî*.

²⁸ Me n/chi m-bâ n-kâm běn m-ba-nyii běn. N/chi m-bên kángkáng eshê nyí mm/pwó běn ké nyǐ byiryibyiryi, nké mm*ba/chi n-ju běn*. Mm*ba/chi m-mîng běn busông ekye*. Nké â n/kye běn busông, n/chi n-kye běn ḿbú budakwárê ne ben. Me Óburúkpâbí nké n/raa.