Jeryimáya 44 - Bokyi Bible

Kyitwóm ńkyí Óburúkpâbí o/twóm kyi-kâm Banet-Ézerel ḿbé ké Éjip

¹ Óburúkpâbí o/pem ne me kyi-kim ne kángkáng banet-Ézerel ḿbé mbe ba-kyú u ké Éjip ké eshê nyí Myígidol ne Tápánas ne Mémfyis ne ké kyicê-oshê ńkyí busyísen.

² Osówo Óburúkpâbí mú Ézerel mú o/rêe o-shwôm o/raa o/fu, ben bayén baa/ri eringe nyí m/bên Jerúsélem ne kángkáng eshê nyí áku nyí Júda. Nang kántîk e/tôong shíshí nang onet o*fí o-kyú u ké nyǐ*

³ ké nǎ, banet ebe baa/chi kyibî ne baa/chi kafâ ka-sa mě. Mbé ba/chi byifen ba-kye esówo ekíri, ba-fé esówo nyí nang mbé nang ben nang banchí enen ḿbé kpákpá ba*da/fé*.

⁴ Me n/twóm běn bǎmgbán ejí ḿbé mbe bamkpábé ḿbé badasét byiraa ejí ḿbé ba/mû ba-sét ng běn ba/fu, ben ba*dachi ba-chi kiǐtí-kyibî-chwǒm ńkyín* ńkyí nkyi kyi-sa ng mě kafâ*.

⁵ Nké ben ba*da/fwôo atông ba-jwo ńkyí n/sét běn*. Ben ba*da/mîng byibî-édúú enen ḿbyí bamu ba-chi i byifen ba-kyâ esówo ekíri*.

⁶ Ké bubwô ámbu, mm/pwó busa-dyityém ejí ké eshê nyí Júda ne ké byiká-eshê ḿbyí Jerúsélem, n-fé kámbyí okwâ. Byi/shí kángkáng byi-bírî chwǒm ńkyí kii*nwa to eri* tete dyicí ńdyí kurún.

⁷ Kántîk kâng, me Osówo Óburúkpâbí mú Ézerel mú o/rêe o-shwôm mu m-bí ng n/fu, ebóng ben bamu ba-chi i byiko enen kyibî-chwǒm ńkyín. Ben bamu ba-ryuu ng ba/fu, babâ ne bukyû bu-kâm banyinchéng ne banyinyi ne bwǎsíng ne boǒbwán-ojújwô eringe nyí onet enen nang obónge oo*waa*?

⁸ Ebóng bamu ba-chi i mě n-sa kafâ ké bakye ḿbé bamu ba-sháng ng ne byifen ḿbyí bamu ba-chi i ba-kyâ esówo ekíri nyí nyi nyín ké Éjip, ké kyikit ńkyí ben ba/bê ebakyú. Ben bamu ba-chi i ńkyín ba/fu, ba-ju ng byiko enen, eringe nyí oshê nang orá ké ejíí o/chi o-kye běn edángé, o-kúng dyizîn enen wǎ kyishû?

⁹ Ben baa/ráp kángkáng byibî-byěm ḿbyí banchí enen ḿbé kpákpá ne batu ḿbé Júda ne banyi ebe ne ben bayén ne banyi enen baa/chi ké eshê nyí Júda ne ké byiká-oshê ḿbyí Jerúsélem?

¹⁰ Nké tete dyicí ńdyí kurún, ben ba*da/bwa ne byiko enen kyísí*. Ben ba*da mě ekye ofê* ba-tî nang byije ḿbyí me n/kye běn ne banchí enen ḿbé kpákpá*.

¹¹ Ké bubwô ámbu kâng, me Osówo Óburúkpâbí mú Ézerel mú o/rêe o-shwôm n/chi m-bírî běn esim m-bên Júda omúmú.

¹² Kyi-kim ne banet ḿbé Júda ḿbé ba/mîng kámbé ké esim, ḿbé ba/fu, mbé ba-da ng ekyú ké Éjip, n/chi n-chi ba-ju kámbé kángkáng. Ashí ebe kángkáng, nang mbe biǐtí nang ba*fí biǐtí* ba/chi ba-kpú ké Éjip, â ba*da/kpú byití* ba-kpú u esong. Ba/chi ba-kyú chwǒm ńkyí kii*nwa eri*. Banet ba/chi ba-kye kámbé edángé, ba-kúng dyizîn ebe wǎ kyishû.

¹³ Me n/chi n-kye banet ḿbé mbe ba-kyú u ké Éjip busông ḿbú byití ne esong ne byirwóm wǎ eringe nyí n/kye Jerúsélem.

¹⁴ Onet o*fí mú o/chi o-fem o-waa okpó* ké burwám-banet ḿbé Júda ḿbé ba/mîng kámbé ké esim* ḿbé ba/dim ba/fu, mbé ba-da ng ekyú ké Éjip*. Onet o*fí ké burwám ebe mú o/chi o-bwa esim ké Júda* ké kyikit ńkyí mbé mbe ba-ryuu ng ba/fu, mbé ba-chî ng edakyú*. Onet o*fí mú o/chi o-bwa esim* kyi-cibi ne boǒnyín-banet ḿbú bu/chi bu-chêe byití*.

¹⁵ Ne kángkáng banyinchéng ḿbé ba/nyît ba/fu, banyi ebe mbe ba-chi i byifen ba-kyâ esówo ekíri, ne kángkáng banyinyi ḿbé ba/mû ba/bwom ányi, cibicibi ne banet ḿbé Ézerel ḿbé ba/mû ba-kyú u ké kyicê-Éjip ńkyí busyísen, bujê-banet chwóó ba-sét mě kâng ba/fu,

¹⁶ be byi*fí byi-jwo ng ńkyí wo a/sét bě ké dyizîn ńdyí Óburúkpâbí*.

¹⁷ Be byi-chi i nang ebóng chwǒm ńkyí byi/fu, byi-chi i. Byi-chi i byifen byi-kye osówo-onyinyi eten mú mu otu-onyinyi mú kyíbóng, ne byi-chi i kyifen-bato byi-kye ǎ, wǎ eringe nyí be ne banchí eten ḿbé kpákpá ne otu eten ne banet-ashí eten byi/mû byi-chi i ké eshê nyí Júda ne ké byiká-oshê ḿbyí Jerúsélem. Ké nkéré ámu, be byi/mû ne byiryíng chwóó, byi/mû byi-câ kashú, ne afaníkong a/mû a*fí bě*.

¹⁸ Nké kyi-fím ké nkéré mú byi/mîng byifen echi byi-kye otu-onyinyi mú kyíbóng, byi-mîng ǎ bato ekye, be byi*da/chîjá ne chwǒm* ne banet eten baa/kpú byití ne esong.

¹⁹ Ne ḿbé banyinyi ba-chînye ba-raa ba/fu, ké nkéré mú byimu byi-chi i byirim-berêt ḿbyí ba/fé bushú ḿbú otu-onyinyi mú kyíbóng, byi-chi byifen byi-kye ǎ, byi-kye ǎ bato, batyép eten ba/fu, ńkyí byimu byi-chi i kyi/nwa.

²⁰ Ne n-raa kâng n-sét kángkáng ḿbé banyinchéng ne ḿbé banyinyi, ḿbé ba/faa mě ejá ké bukwóp ḿbún n/fu,

²¹ kyi-kim ne byifen ḿbyí ben ne banchí enen ḿbé kpákpá ne batu enen ne banet-ashí enen ne banet-oshê ba/chi ké eshê nyí Júda ne ké byiká-oshê ḿbyí Jerúsélem, ben bamu ba-kabe ng ba/fu, Óburúkpâbí o*da/nyît kyi-kim ne mbyí*? ne oo/ráp kámbyí*?

²² Kurún, esí enen ee/shí kángkáng nang onet o*fí to o-kyú u ké nyǐ*. E/firi kyikit ńkyí kii*nwa to eri* ne banet ba-kú ba-kúng ng dyizîn emen wǎ kyishû, ké nǎ, Óburúkpâbí o*fí to o-man n ecíp byibî-byěm enen ḿbyí bamu ba-chi i*.

²³ Busông ḿbú kántîk bu/bê bu-kâm běn, ké nǎ, ben ba/chi byifen ba-kye esówo ekíri, ne ba/chi kyibî ké bushú ḿbú Óburúkpâbí, ké nǎ, ba*da/chi ńkyí o/sét běn*.

^24-25 Me n/sét kángkáng banet, aciringaciring ḿbé banyinyi, ńkyí Osówo Óburúkpâbí mú Ézerel mú o/rêe o-shwôm o/mû o-sét ng banet ḿbé Júda, ḿbé ba/mû ba-kyú u ké Éjip. N/fu, ben ashí amúmú ne banyi enen baa/ryí otu-onyinyi mú kyíbóng ocím mú shwaneshwane. Ben ba/ryí ocím ba/fu, ben ba/chi ba-chi byifen ba-kye ǎ, ba-kye ǎ bato, ne baa/tî ocím enen mú ba/ryí. Kyi/nwa, tî n̂g ocím enen mú ba/ryí. Chi n̂g eringe nyí ben ba/ryí ocím.

²⁶ Nké kántîk, fwôo n̂g atông ba-jwo ocím mú me Óburúkpâbí nn/ryí běn ben banet-Ézerel ḿbé bamu ké Éjip n-sem kiǐtí-dyizîn ejí. Mm*ba/chi n-chîbángê onet nang obónge ké burwám enen o-kúng dyizîn ejí o-ryí ocím o/fu, me n/sem ké dyizîn ńdyí Osówo mú mu okpó*.

²⁷ M-man n-chi n/fu, ben baa*ce kashú* nké ba/chi ba-ju běn. Ben ashí amúmú ba/chi ba-kpú. Â ba*da/kpú byití* ba-kpú u esong ne byirwóm tete onet nang obónge oo*waa*.

²⁸ Nké boǒnyín-banet bu/chi bu-fem bukyû, bu-fím Éjip bu-fyi Júda. Banet ḿbé ba/chi ba-kpen kâng ba/chi ba-nyît ejá nyí e/chi e-kyú ntûntû, nyí ejí ne nyí ebe.

²⁹ Me Óburúkpâbí n/chi n-tông běn ba-nyît ba/fu, n/chi n-kye běn busông ké kyikit ńkyín, ne ocím ejí mú n/fu, n-ju ng běn o/chi o-kyú ntûntû.

³⁰ N/chi n-kúng Otu Hófara mú Éjip n-kye banet-bushwôn emen ḿbé mbe ba-ryuu ng ba/fu, mbé ba-ju ng ǎ, wǎ eringe nyí n/kúng Otu Zedekyâ mú Júda n-kye Otu Nébúkanéza mú Bábyílon, mú o/mû onet-bushwôn emen ne mú o/mû mu o-ryuu ng o/fu, nyǐ o-ju ng ǎ.