Jeryimáya 42 - Bokyi Bible

Banet ba/bí Jeryimáya ba/fu, ofé Nshwam ké Bubwô Ebe

¹ Kángkáng banet-ashí-basúja kâng, cibicibi ne Johánan mú wǎn-Karyâ ne [Azaryâ] mú wǎn-Hesháya ba/bê ne kángkáng azong-banet

² ba-ba-sét mě ba/fu, kamgbe, chi ńkyí byimu byi-bí ng ǒ byi/fu, chi. Fé nshwam a-kye Osówo Óburúkpâbí eten ké bubwô eten. Fé kámú ké bubwô ḿbú be ashí amúmú mú bii/fem bukyû. Be byi/mû byi/jê chwóó, nké kántîk byi/firi boǒnyín, wǎ eringe nyí wo amu a-ri ng.

³ Fé nshwam eringe nyí Osówo Óburúkpâbí eten o/chi o-tông bě kiǐfáng ńkyí byidajé ne chwǒm to ńkyí byidachi.

⁴ Me n-faa kâng n/fu, kyi/nwa, me n/chi n-fé nshwam n-kye Osówo Óburúkpâbí eten, wǎ eringe nyí ben ba/bí, ne nang o/sét ebóng, n/chi n-sét běn. Mm*ba/chi n-rôo běn chwǒm nang kyibónge*.

⁵ Mbé ba-sét mě kâng ba/fu, Óburúkpâbí ochi bě nang ebóng chwǒm ńkyí kyi/nyîn ǎ, â byi*da/chi nang ebóng chwǒm ńkyí nyǐ Osówo Óburúkpâbí eten oda ǒ esét o/fu, be byichi*.

⁶ Nang kyi/nyîn bě nang kyi*da bě enyîn* byi/chi byi-chi ńkyí Osówo Óburúkpâbí eten oda bě esét, mú byimu byi-bí ng ǒ byi/fu, fé nshwam a-kye ǎ ké bubwô eten. Kyi-chi i bě kanong â byi/chi ńkyí o/sét.

Ejá nyí Óburúkpâbí o/kye ké Nshwam mú Jeryimáya o/fé

⁷ Ké nkéré mú kii/rí ací diǐkpú, Óburúkpâbí o/pem ne me,

⁸ ne n-kó kâng Johánan ne kángkáng banet-ashí-basúja ḿbé ba/mû ne nyǐ ne burwám-banet ḿbé áku kyikit kyibónge.

⁹ N-sét kámbé n/fu, Osówo Óburúkpâbí mú Ézerel, mú ben ba/twóm mě ba/fu, me mbí ǎ, oo/sét o/fu,

¹⁰ â ben bamu ba-ryuu ng ba/fu, ba-kyú u ké esí ńnyín ba-ca kashú, me n/chi m-bi běn, mm*bú běn m-pwó* n/chi n-kwón běn, nn*zú běn n-twóp*. Busông ḿbú n/kye běn boo/chi bafip ba-chi mě kanong kanong.

¹¹ *Da n̂g echîshî otu mú Bábyílon*. Me mu ne ben, ne n/chi n-nyii běn ké abwô emen.

¹² Ké nǎ, me n-ri ng banet bafip, n/chi n-chi ǎ o-ri běn bafip, o-mîng běn ba-bwa dyijê. Me Óburúkpâbí nké n/raa.

^13-15 Nké ben banet ḿbé ba/mîng běn ké Júda baa*man ba-né echi ńkyí Osówo Óburúkpâbí enen o/sét běn* ba-né ekyú ké esí ńnyín*. Baa*man ba-raa ba/fu, aa*wááng* be byi-da ng ekyú ké Éjip* ké kyikit ńkyí bii*nwa to byití* bii*jwo to ntán mú byití* nang esong ee*nwa bě to*. Â ba/raa éné, Osówo Óburúkpâbí mú Ézerel mú o/rêe o-shwôm mu o-sét ng kâng o/fu, â ben ba/fu, ben ba-da ng ekyú ké Éjip,

¹⁶ byití ḿbyí ben bamu ba-shî ng éné byi/chi byi-kâm běn, ne esong nyí ba*fí ba-ryuu ng kányí* e/chi e-bâ ne ben ké kyikû, ne ben ba/chi ba-waa áku ké Éjip ba-kpú.

¹⁷ Kángkáng banet ḿbé ba/fu, mbé ba-da ng ekyú ké Éjip, â ba*da/kpú byití* ba-kpú u esong ne byirwóm. Onet o*fí nang obónge mú o/chi o-fem*. Onet o*fí mú o/chi o-fem busông ḿbú n/chi n-kye kámbé*.

¹⁸ Osówo Óburúkpâbí mú Ézerel mú o/rêe o-shwôm o/raa o/fu, eringe nyí n/yip kafâ esa ejí m-pwó ké Jerúsélem, éné to nké n/chi n-yip busa-dyityém ejí m-pwó běn ké byiko â ba/dim ba-wâa Éjip. Banet ba-kû ng běn eri ne bushî. Banet ba/chi ba-jwó běn, ba-kúng dyizîn enen wǎ kyishû. Baa*ba/chi ba-chîri kyikit ńkyín ne banyá*.

¹⁹ Ne n-raa n-ca kashú n/fu, Óburúkpâbí oo/sét běn mú ba/waa ké Júda o/fu, ben ba*dachi ba-dim ba-jâ Éjip*. Me mu n-kuri ng běn ekó kántîk

²⁰ n/fu, bamu ba-bâ eróng orông-bukyû. Ben ba/sét mě ba/fu, me nfé nshwam n-kye Osówo Óburúkpâbí eten ké bubwô enen, ne ba/ryí ocím ba/fu, ben ba-chi i nang ebóng chwǒm ńkyí o/sét běn.

²¹ Kántîk, nn/sét běn, nké ben bamu ba-né ng kángkáng byěm ḿbyí Osówo Óburúkpâbí eten o/sét mě o/fu, me nsét běn.

²² Ké bubwô ḿbún kâng, zîim m̂ ńkyín ba/fu, â ben ba*da/kpú byití* ba-kpú u esong ne byirwóm ké esí nyí ben bamu ba-ryuu ng ba/fu, ben ba-jâ.