Jeryimáya 41 - Bokyi Bible

¹ Ké etukáku káchâtkányi ké dyije ándyi, Éshimal mú o/mû onet-kyikû-butu ne o/mû onet-dyishí-basúja ḿbé otu o/dim ne banet-ashí diǐkpú ké kyikû o-wâa Myízipa o/fu, nyǐ o-da ng eri Gedalyâ. Ké nkéré mú mbé ashí kángkáng ba-kú ba-ryí i byiryíng kyikit kyibónge,

² Éshimal ne banet ḿbé ba/mû ne nyǐ ké kyikû ashí diǐkpú ba-zú bushwám ebe ba-ju Gedalyâ.

³ Éshimal o/ju to kángkáng banet-Ézerel ḿbé ba/mû ké Myízipa ne Gedalyâ ne basúja ḿbé Bábyílon ḿbé ba/mû ányi.

⁴ Ké orî-dyicí, ányi banet ba*da/nyît ne ba/fu, baa/ju Gedalyâ*

⁵ bajam-banet banyii ba/fím Shékem ne Shílo ne Samérya ba-bâ. Ba/mû ba/pwát byiti ebe, ba-ját byídí, ba-ját byiko ebe byibáp. Ba/mû ba/kúng byiryíng ne burwan ba/fu, mbé ba-bâ ng echi kyifen ké kiǐtí-kyise-kyifen-Osówo echi.

⁶ Éshimal kâng o/dim ké Myízipa o-kâm kámbé, o-tii ng o-câ. Ké nkéré mú o/kâm kámbé, o/sét kámbé o/fu, bâ n̂g ba-ba-ri Gedalyâ.

⁷ Ńdyí ba-nung ng ké kafâ-oshê ba-bâ, Éshimal ne banet emen ba-ju kámbé, ba-yip byikwóm ebe ba-fé ké dyibíng-omu.

⁸ Nké banet ba/mû ashí diǐkpú ḿbé ba/mû ké burwám-banet ámbe ḿbé ba/sét Éshimal ba/fu, kamgbe, *da bě eju*. Be byimu ne byiryíng chwóó ḿbyí byi/rôo ké byifát. Ké bubwô ámbu, Éshimal o*da/ju kámbé*.

⁹ Dyibíng ńdyí Éshimal o/twóp byikwóm-enyam-byiko-banet ḿbé o/ju [dyi/mû dyi/rêe,] ńdyí Otu Ása o/mû o/sím, nkéré mú Otu Básha mú Ézerel o/mû o-kyâ ǎ bunwa. Éshimal o/fé byikwóm-banet ámbe ké dyibíng ándyi dyi-sú.

¹⁰ Ne o-kúng kángkáng bwǎn-banyinyi ḿbé otu o-chi kámbé ba-firi bamgbokobá, cibicibi ne kángkáng banet ḿbé ba/mû ké Myízipa, ḿbé Nébúzaradan o/mîng ké abwô nyí Gedalyâ. Éshimal o/kúng kámbé wǎ bamgbokobá o-dim dyijê ké esí nyí Ámon.

¹¹ Johánan ne banet-ashí-basúja ḿbé ba/mû ne nyǐ ba/jwo kyibî ńkyí Éshimal o/chi.

¹² Ne ba-rim ne nyǐ ké kyikû ne banet ebe ba-da-kâm ǎ fáráng ne kiǐtí-dyibíng-omu ńdyí dyi/mû ké Gyíbya.

¹³ Ńdyí banet-mgbokobá ḿbé Éshimal o/kám ba/ri Johánan ne banet-ashí-basúja ḿbé ba/mû ne nyǐ ké kyikû, ba-kpet ejêe,

¹⁴ ba-bírî ba-zóngê ba-kâm kámbé.

¹⁵ Nké Éshimal ne banet emen ashí nyíryinyi ba/fem Johánan ba-chêe ba-jâ ké esí nyí Ámon.

¹⁶ Johánan ne banet-ashí-basúja ḿbé ba/mû ne nyǐ, ba-koo banet ámbe ḿbé Éshimal o/mû oo/kám kámbé wǎ bamgbokobá ké Myízipa ké nkéré mú o/ju Gedalyâ. Banet ámbe ba/mû basúja ne banyinyi ne bwǎsíng ne banet-ashí-bǎmkpóngé-otu.

^17-18 Mbé ba/mû ba-shî ng banet ḿbé Bábyílon, ké nǎ, Éshimal o/ju Gedalyâ mú otu mú Bábyílon o/tî ǎ onet-dyishí mú esí nyí Júda. Ne ba-dim kâng Éjip eringe nyí badafem ké abwô nyí banet ḿbé Bábyílon. Ńdyí ba/byí ké bukwóp, ba/bwom ké Kyínham mú o/fárâng ne Bételehêm.