Jeryimáya 40 - Bokyi Bible

Jeryimáya o/kyú ne Gedalyâ

¹ Óburúkpâbí o/raa ne me ké nkéré mú Nébúzaradan oo/zú mě abwô ké Ríma. Ba/mû ba/fé mě bamgbokobá ba-kúng mě ba-dim ne kángkáng banet ḿbé áku ḿbé ba/fím Jerúsélem ne Júda, ḿbé mbe ba-kúng ng kámbé wǎ bamgbokobá ba-dim ne mbé Bábyílon.

² Nébúzaradan o/kpî mě byi-bwom ké bukô o-sét mě o/fu, Osówo Óburúkpâbí eyên o/fu, nyǐ o-bên n esí ńnyín,

³ ne oo/chi ńkyí o/mû o/fu, nyǐ o-chi i. Ńkyín kyi/chi, ké nǎ, banet eyên ba/chi kyibî ké bushú ḿbú Óburúkpâbí, ne ba*da/chi ńkyí o/sét kámbé*.

⁴ Kántîk, me n-kú m-bâ ǒ epii bamgbokobá ké abwô n-zú ǒ abwô. Â kyi/nyîn ǒ a/fu, a-dim m ne me Bábyílon, byi-dim, me n-tî ng ǒ kanong. Â a/fu, wo aa*ce* *dace*. Oshê omúmú o/já ǒ, a-man n ejé nang nyá nang nyá mú kyi/nyîn ǒ.

⁵ Ké nkéré mú me n*da/faa ojá* Nébúzaradan o/sét mě o/fu, bwa esim a-kâm Gedalyâ mú wǎn-Ahíkam, mú bonchí emen mú kánkán o/mû o-bángê e Sháfan, mú otu mú Bábyílon oo/chi ǎ onet-dyishí mú eshê nyí Júda. A-man n ekyú ne nyǐ ne banet ámbe. Nké â kyi*da ǒ enyîn* a-man n ekyú nang nyá mú kyi/nyîn ǒ. Ne o-yárê mě, o-kye mě byiryíng ḿbyí ndadim ne mbyí o/fu, me ndim kyicê ńkyí kyi/nyîn mě.

⁶ Me n/dim n-da-kyú ne Gedalyâ ké Myízipa, n-kyú ne banet ḿbé ba/mîng kámbé ányi.

Gedalyâ mu Onet-Dyishí mú Júda

⁷ Kyicê-basúja ḿbé Júda ne banet-ashí ebe ba/mû ba*da/zú abwô ké bunwa*. Mbé ba/jwo ba/fu, otu mú Bábyílon oo/tî Gedalyâ onet-dyishí mú esí nyí Júda, ne oo/tî ǎ o/fu, okûtún kángkáng banet ḿbé byikpu byíkpu, ḿbé ba*da/kúng kámbé ba-dim ne mbé Bábyílon*.

⁸ Ne Éshimal mú wǎn-Natanyâ ne Johánan mú wǎn-Karyâ ne Seráya mú wǎn-Tanúmet ne bwǎn ḿbé Éfa mú o/fím Netófa ne Jezanyâ mú o/fím Máka ba-dim kâng ne banet ebe ba-kâm Gedalyâ ké Myízipa.

⁹ Gedalyâ o-sét kámbé o/fu, me mu n-sét ng běn n/fu, *da n̂g eshî ebángê ba/fu, ben ba/firi ké abwô nyí banet ḿbé Bábyílon*. Kyú n̂g ké esí ńnyín, ba-fé otu mú Bábyílon, ne kyi/chi kyi-kyú běn kanong.

¹⁰ Me oyén n/chi n-kyú ké Myízipa n-raa ké dyishí enen â banet ḿbé Bábyílon ba/bê nyín. Nké ben ba-man n ekyú ba-kûchi byiryíng ké eshê nyí bamu ba-kyú u.

¹¹ Kángkáng banet-Ézerel ḿbé ba/mû ké Mówep ne Ámon ne Édom ne eshê ekíri ba/jwo ba/fu, otu mú Bábyílon o/mîng kyicê-banet ḿbé Ézerel ba-waa ké Júda, ne oo/tî Gedalyâ onet-dyishí ebe.

¹² Ne mbé kâng ba-mîng byikit ḿbyí mbé ba/mû baa/pwôo byiryibyiryi ba-bwa esim ké Júda. Ba/bê ba-kâm Gedalyâ ké Myízipa, ba-kpet echi byiryíng ne bato chwóó.

Ba/ju Gedalyâ

¹³ Johánan kâng ne banet-ashí-basúja ḿbé ba/mû ba*da/zú ne abwô ké bunwa* ba/bê ba-kâm Gedalyâ ké Myízipa

¹⁴ ba-bí ǎ ba/fu, wo a*fí a-nyît ng a/fu, Otu Bális mú Ámon oo/twóm Éshimal o/fu, oba-ju ǒ*? Nké Gedalyâ o*da/bángê o/fu, nkyi ké kafâ*.

¹⁵ Johánan kâng o-sét Gedalyâ ké kyikit ńkyí onet o*da/jwo* o/fu, mîng mě n-ca n-da-ju Éshimal, onet o*fí mú o/chi o-nyît onet mú o/ju ǎ*. Ebóng bada ǎ emîng o-ba-ju ǒ. Ńkyín kyi/chi kyi-chi banet-Jûs ḿbé mbe ne wo ké kyikû ba-pwôo byiryibyiryi, ne busông bu/chi bu-bâ bu-kâm kángkáng banet ḿbé ba/mîng kámbé ké Júda.

¹⁶ Nké Gedalyâ o/faa o/fu, *da ǎ eju*. Ńkyí amu a-sét ng kyi-kim ne Éshimal kyi*fí ntûntû*.