Jeryimáya 4 - Bokyi Bible

Óburúkpâbí o/kó Banet ḿbé Ézerel o/fu, basaa Byiko ba-mîng Byibî echi

¹ Óburúkpâbí o/raa o/fu, banet-Ézerel, â bamu ba-ryuu ng ba/fu, ba-bwa ng esim, bwa n̂g kâng esim ba-kâm mě. Â ben ba/fîm erím-bakye nyí nyi e-sa ng mě kafâ, ba-kpet efé dyityém ne me, [

² kyi/chi kyi-kyú kanong ńkyí ben badaryí ocím ké chwǒm ba-sem dyizîn ejí.] Ne kángkáng eshê kâng e/chi e-bí mě e/fu, me njware kányí, ne e/chi e-kpee mě.

³ Óburúkpâbí o/raa ne banet ḿbé Júda ne ḿbé Jerúsélem o/fu, kpang n̂g byifát enen ḿbyí ba*da/kpang ne*. *Da n̂g ekwón esang-byichí enen ba-cibi ne byiwong*.

⁴ Tî n̂g ocím enen mú ba/ryí ne me, mú mu Óburúkpâbí enen, ba-kúng byiko enen, ǎ banet ḿbé Júda ne Jerúsélem, ba-kye mě. Â ben ba*da/chi éné* kafâ ejí ka/chi ka-mang mě wǎ okwâ, ké bubwô ḿbú byibî-byěm ḿbyí baa/chi. Kafâ ejí ka/chi ka-mang, ne onet o*fí mú o/chi o-man erîp kánké*.

Óburúkpâbí o/fu, Nyǐ o-kyâ Júda Busông

⁵ Jwá n̂g ntán ké esí emúmú. Wonge ê ne ejá kyíbóng kyíbóng, ba-sét banet ḿbé Júda ne Jerúsélem ba/fu, bachêe ba-da-rem ké eshê nyí nyi ne byikit ḿbyí badabwom ba-nwa byití.

⁶ Sét n̂g kámbé ba-bírî kyicê ńkyí Záyon. Bazóngê ochéé eringe nyí badafem. Ba*dachi ba-bên nkéré*. Óburúkpâbí mu o-bâ ne busông ne kiǐtí-bukyû ńkyí nkyi kyi-fím m ké kyicê ńkyí bushûyû.

⁷ Mbên eshê oo/dim o-kú o-bâ wǎ ekpang nyí edabyí ké kyikit ńkyí nyi e-rem m. Nyǐ mu o-bâ o/fu, nyǐ o-bâ ng ebên Júda. Eshê nyí Júda e/chi e-bên kángkáng, ne onet o*fí mú o/chi o-kyú ké nyǐ*.

⁸ Ké bubwô ámbu, fé n̂g byídí-dyikán eta, ba-tii, ba-wonge, ké nǎ, kiǐtí-busa-dyityém ńkyí Óburúkpâbí kyi/tôong ké Júda.

⁹ Óburúkpâbí o/raa o/fu, ké dyicí ándyi, busa bu/chi bu-man batu ne banet-ashí-oshê ebe. Byiko byi/chi byi-kaa banchi kyifen-Osówo, ne bamkpábé ḿbé badasét byiraa-Osówo ba/chi ba-waa ocím ké dyishí fúú.

¹⁰ Ne me n-raa kâng n/fu, Óburúkpâbí mú mu Otu Kyítá, wo aa/nîm banet ḿbé Jerúsélem kanong kanong. Wo aa/sét a/fu, bunyîn-dyityém bu/chi bu-kyú, nké kashwám ka/firi kámbé ké kyitông.

¹¹ Nkéré mu o-bâ mú ba/chi ba-sét banet ḿbé Jerúsélem ba/fu, bufú ḿbú budashí byikit mbu bu-fím m ké kyikim-dyikán, bu-tugi ng bu-bâ. Boo*ba/chi bu-kyú bufú ḿbú degere* ḿbú budatugi biǐbyém bu-pwó*.

¹² Bufú ḿbú Óburúkpâbí mu o-twóm m bu/jê ne busa bu-shwôm éné. Óburúkpâbí oyén nké mu o-két ng mpan o-bên banet emen.

Banet-Bushwôn ba/wáp Júda ba-fé ké Kafâ

¹³ Kan n̂ achi ba-ri, onet-bushwôn mu o-bâ wǎ ófíbí. Bamútu-byití enwa emen mbe wǎ kyibî-bufú, ne bubyî-orá emen bu-kwáng ng bu-shwôm biinkwa. Be bii/tánê. Be bii/kpú.

¹⁴ Jerúsélem, soo byibî ḿbyí mbyi ké dyityém eyên eringe nyi Osówo o/chi o-nyii ǒ. Ka-rí i nǎ ne wo a-mîng byibî-okabe ekabe.

¹⁵ Banet-kyitwóm ḿbé ba/fím ké esí nyí Dǎn ne ké eku nyí Éferem mbe ba-sét ng kyibî-chwǒm ńkyí kyi/chi kyi-chi.

¹⁶ Mbé baa/bê ba/fu, mbé ba-bâ ng ekuri eshê ekó, ba-sét to Jerúsélem ba/fu, banet-bushwôn mbe ba-fím m ké oshê mú tíbítíbí ba-bâ. Banet-bushwôn ḿbén ba/chi ba-wonge kyibî kyi-kim ne eshê nyí Júda,

¹⁷ ne ba/chi ba-wáp Jerúsélem ba-fé ké kafâ wǎ banet ḿbé mbe ba-bám m kyifát, ké nǎ, banet ḿbé Jerúsélem baa/bwom bunwa ne Óburúkpâbí. Óburúkpâbí nké o/raa.

¹⁸ Júda, dyikpen enen ńdyí bamu ba-kyú u ne byěm enen ḿbyí bamu ba-chi i nké bii/bê běn ne ńkyín ké byiko. Byibî enen nké bii/bê ne busông ḿbún, ḿbú boo/ta běn ké dyityém.

Bafip ḿbé ba/chi Jeryimáya kyi-kim ne Banet Emen

¹⁹ Me n*fí m-man n ecíp bafip ejí*. Dyityém ejí ndyi dyi-kíbî ng mě byiryibyiryi. Mm*man ecíbî pyêp*. Me mu n-jwo ng bantán ne awonge nyí byití.

²⁰ Â busông bubónge bu/man, bukíri bu-ribi. Baa/bên oshê omúmú. Baa/bên bampyep eten ḿbé byi/bi ké byídí ba-ját byídí ebe boǒcê boǒcê, nang ekpu byi*da/tî*.

²¹ Ka-rí i nǎ ne me m-mîng byití ḿbyín eri ne bantán ḿbén ejwo.

²² Óburúkpâbí o/raa o/fu, banet ejí mbe enyam. Mbé baa*nyît mě*. Mbe wǎ enyam-bwǎsíng, baa*nyît chwǒm*. Mbé ba-nyît ng kanong kanong eringe nyí badachi kyibî, nké baa*man echi ńkyí nkyi kanong*.

Jeryimáya o/ri Akat nyí a/kim ne Busông ḿbú bu/chi bu-bâ

²³ Me n/tún achi ké ejíí ne n-ri kányí ké e/firi kafâ dyikáá. N-tún achi ké bubóng, kiinwángé kyi*fí*.

²⁴ N-tún eku nyí nyáám, n-ri kányí ké e-kú e-ninge e. N-tún eku nyí kyísí kyísí n-ri ké e-kú e-náng ng e-jâ kú e-jâ kú.

²⁵ N/tún achi, nang onet n*da/ri*. Nang bunurung kángkáng boo/chêe.

²⁶ N/tún achi n-ri esí nyí e/mû ne byirim-byichí ké ee/bírî kyikim-dyikán, ne ké kángkáng eshê ee/shí ké bushú ḿbú Óburúkpâbí, ké bubwô-kiǐtí-busa-dyityém emen. [

²⁷ Ké nǎ, Óburúkpâbí o/raa o/fu, ejíí emúmú e/chi e-bírî kyikim-dyikán, nké mm*ba/chi m-bên kányí kángkáng*.]

²⁸ Ké bubwô ḿbún, ejíí e/chi e-ta dyikán ne bubóng bu/chi bu-firi kyifip kyífip. Ké nǎ, me Óburúkpâbí nn/raa. Me n/kabe ne n-chi. Me mm*ba/chi n-yángê okabe ejí* ne mm*ba/chi m-mîng ńkyí n/fu, n-chi i*.

²⁹ Oshê nang orá o-chêe ng ké nkéré mú oo/jwo kyicoge-banyû bubyî-orá ne banchê abán. Mbé ba/chi ba-nung ké akán, ba-yú u ké aká. Ba-chêe ba-mîng eshê emúmú, onet nang obónge oo*kyú to mú odakyú ké nyǐ*.

³⁰ Jerúsélem, wo a/firi ké busông. Ebóng amu a-bwá ng byídí ḿbyí batu. Ebóng amu a-fâ byibwáng ḿbyí byinong, a-fâ bukye-achi. Wo amu a-chi i búsé dyikáá. Bákyî eyên baa/né ǒ ne ba-kú ba-ryuu ng ba/fu, mbé ba-ju ng ǒ.

³¹ Me n/jwo bukyû wǎ onyinyi mú bufwon mbu bu-nwa ng ǎ, n-jwo dyiwonge wǎ onyinyi mú mu o-fwon n bufwon-dyikwá. Bukyû ámbu bu/mû ḿbú Jerúsélem mu o-nwa ng ne kiǐnjáng eshû, o-mege ng bubwô, o-raa ng o/fu, me mm/kpú. Ba-kú ba-bâ mě ebaju.