Jeryimáya 39 - Bokyi Bible

Otu mú Bábyílon o/koo Jerúsélem

¹ Ké nkéré mú Otu Zedekyâ oo/ryí butu ké Júda kyi-rí aje kátángekányi ne etukáku diǐkpú, Otu Nébúkanéza mú Bábyílon o/bê ne basúja emen kángkáng o-ba-kye Jerúsélem bunwa.

² Ké aje diǐkpú ne din ne etukáku enyii ne ací kátángekányi nyí Otu Zedekyâ o/ryí butu, ba/bú ekpe nyí e/wáp Jerúsélem e-fé ké kafâ ba-pwó.

³ Ké nkéré mú ba/koo Jerúsélem, kángkáng banet-ashí-basúja ḿbé otu mú Bábyílon ba/bê ba-ba-kyú me ké dyifyi ńdyí otyém ne otyém cibicibi ne [Négal-Sháréza ne Sámaga-Nébo ne Sásékim ne Négal-Sháréza okíri.]

⁴ Ké nkéré mú Otu Zedekyâ ne kángkáng basúja emen ba/ri ńkyí nkyi kyi-chi i, ba/kan ba/fu, mbé ba-chêe ng ba-mîng oshê ne buchú. Ba/cen ké kiǐfáng ńkyí kyifát ńkyí otu, ba-shwôm ké dyifyi ńdyí dyi/cibi byikim-ekpe byifee, ne ba-chêe ké kyicê ńkyí owo mú Jódan.

⁵ Nké basúja ḿbé Bábyílon ba/rim ne mbé ké kyikû, ba-da-kám Otu Zedekyâ ké byikit ḿbyí ndege ńdege ḿbyí byi/fárâng ne Jéríku. Ne ba-kúng ǎ kâng ba-dim ne nyǐ ké kyikit-Otu Nébúkanéza, mú o/mû ké oshê mú Ryíla, ké esí nyí Hámat. Ányi nké Otu Nébúkanéza o/pan ǎ mpan.

⁶ Ké Ryíla nké o/ju bwǎn ḿbé Otu Zedekyâ ḿbé banyinchéng ké bushú ḿbú Otu Zedekyâ oyén, o-ju to banet-ashí ḿbé Júda.

⁷ Ké nkéré mú oo/ju kámbé, o-fuu Otu Zedekyâ achi, o-fé ǎ bamgbokobá, o/fu, bayip ǎ ba-dim ne nyǐ Bábyílon.

⁸ Banet ḿbé Bábyílon ba/shí kyibám-butu ne byise, ba-bú ekpe nyí e/wáp Jerúsélem e-fé ké kafâ.

⁹ Ké nkuli kyikû, Nébúzaradan mú onet-dyishí-basúja o-kúng banet ḿbé ba/waa ké oshê, cibicibi ne banet ḿbé ba/mû ba/chêe ba-kâm ǎ, o-dim ne mbé Bábyílon wǎ bamgbokobá.

¹⁰ Banet ḿbé o/mîng ké esí nyí Júda ba/mû kyicê-banet-kyikpu ḿbé ba/mû ba*fí ne chwǒm* ne o/kye kámbé byifát.

Ba/zú Jeryimáya Abwô

¹¹ Nké Otu Nébúkanéza o/kye Nébúzaradan busa ḿbún o/fu,

¹² dakyé Jeryimáya o-tî ǎ kanong. *Da ǎ enémê* nké chi nang ebóng chwǒm ńkyí mu o-ryuu ng o-kye ǎ.

¹³ Ne Nébúzaradan, cibicibi ne Nébúshazában ne Négal-Sháréza ḿbé banet-ashí-basúja ne banet-ashí-basúja bakíri ḿbé otu mú Bábyílon

¹⁴ ba-ba-fîm mě ké kafâ-kyibám-butu. Ba/yip mě ba-kye Gedalyâ mú wǎn-Ahíkam, mú bonchí emen mú kánkán o/mû o-bángê e Sháfan, ba/fu, osí mě n-nung oshê ejí kanong. Ne n-kyú kâng ne banet ámbe.

Óburúkpâbí o/ryí Ébet-Mélek Ocím o/fu, Nyǐ o/chi o-tî ǎ Kanong

¹⁵ Ké nkéré m/mû n/tôong ké mgbokobá ké kyibám-butu, Óburúkpâbí o/sét mě o/fu,

¹⁶ me nsét Ébet-Mélek mú o/fím Sudân n/fu, Osówo Óburúkpâbí mú Ézerel mú o/rêe o-shwôm oo/raa o/fu, me n-chi i ńkyí ndasét, me n/chi m-bâ ne busông ké oshê mún, *chí kanong*. Ne â ńkyín kyi/chi, wo a/chi a-ri kánkyí.

¹⁷ Ne me Óburúkpâbí n/chi n-ku ǒ, mm*ba/chi n-kúng ǒ n-kye banet ḿbé amu a-shî ng kámbé*.

¹⁸ Me n/chi n-tî ǒ kanong, ne baa*ba/chi ba-ju ǒ*. Wo a/chi a-fem ne dyikpen eyên, ké nǎ, wo a/fé dyityém eyên ne me. Me Óburúkpâbí nké n/raa.