Jeryimáya 38 - Bokyi Bible

Ba/fé Jeryimáya ké Dyibíng ńdyí dyi*fí ne Omu*

¹ Shefátya mú wǎn-Mátan, ne Gedalyâ mú wǎn-Páshu, ne Jehúkal mú wǎn-Shelemyâ, ne Páshu mú wǎn-Makyâ ba/jwo ba/fu, me mu n-sét ng banet n/fu,

² Óburúkpâbí o/sét o/fu, nang yeě nké o/waa ké oshê mún o/chi o-kpú ké byití. Â o*da/kpú byití* o-kpú u esong, ne â o*da/kpú esong* o-kpú u kyirwóm. Nké nang yeě nké o/byí o-da-jwâa kyísí o-kye banet ḿbé Bábyílon, baa*ba/chi ba-ju ǎ*. Nang kyi-chi nǎ o/chi o-waa ne dyikpen emen.

³ Me m/mû n-sét ng to kámbé n/fu, Óburúkpâbí o/sét o/fu, nyǐ o/chi o-kúng oshê mún o-kye basúja ḿbé Bábyílon, ne mbé ba/chi ba-koo kámú.

⁴ Ne banet-ashí ámbe ba-dim ba-kâm otu, ne ba-sét ǎ ba/fu, byi-man byi-ju onyinchéng mún. Eringe nyí nyǐ mu o-raa ng něen, mu o-chi i asa a-jwâa basúja ḿbé oshê mún, ne mu o-chi i dyizong-chwǒm dyibónge to ne nang yeě nang yeě okíri mú o/waa ké oshê mún. O*fí o-kan n o/fu, nyǐ o-chwáp ng banet* mu o-ryuu ng oryǔng o/fu, nyǐ o-némê e kámbé.

⁵ Otu Zedekyâ o-faa kámbé o/fu, â nkyi éné, chi n̂g ńkyí kyi/nyîn běn ne nyǐ. Mm*man běn eku*.

⁶ Ne banet ámbe kâng ba-kúng mě, ba-níbî mě ké erí ba-fé mě ké dyibíng-omu ńdyí wǎn-otu, mú odabángê Makyâ, ńdyí dyi/mû ké kyibám-butu. Omu o/mû o*fí to ké dyibíng ándyi*. Dyi/mû biǐntóng biintong, ne n-ríbî ké mbyí.

⁷ Nké Ébet-Mélek mú o/fím Sudân, mú ba/mû baa/pê ǎ, mú o/mû o-chi i bǎmkpóngé ké kyibám-butu, o/jwo ba/fu, baa/fé mě ké dyibíng-omu. Ké nkéré ámu, otu o/mû mu o-pan n bampan ké dyifyi ńdyí Běnjámin.

⁸ Ne Ébet-Mélek o-dim kâng áku o-da-sét otu o/fu,

⁹ átá-otu, ńkyí banet ḿbén ba/chi kyi*da/nwa*. Baa/yip Jeryimáya ba-fé ké dyibíng-omu, ké kyikit ńkyí o/chi o-waa o-kpú esong, ké nǎ, byiryíng byi*fí to ké oshê*.

¹⁰ Ne otu kâng o-kye Ébet-Mélek busa o/fu, okpî banet bachât ba-ba-fîm mě ké dyibíng-omu ne n-kûkpú.

¹¹ Ne Ébet-Mélek o-dim ne banet ámbe ba-ca ké kyikit ńkyí mbe ba-tî ng byěm ké kyibám-butu ba-da-fîm bakâa-byídí ba-ba-tú ké orí ba-kye mě.

¹² Ébet-Mélek o-sét mě o/fu, me nyabe bakâa-byídí ámbe ké ékpâ eringe nyí erí ee*bán mě*. N-chi éné,

¹³ ne ba-tut mě ba-fîm ké kafâ-dyibíng-omu. Ńdyí ba/fîm mě, ba/tî mě ké kafâ-kabám ńké kyibám-butu.

Otu Zedekyâ o/bí Jeryimáya Bacê

¹⁴ Ké ntáng okíri, Otu Zedekyâ o/fu, babâ ne me ké bushú emen ké afyi achât nyí ké kiǐtí-kyise-kyifen-Osówo echi, ne o-raa ne me o/fu, mu ne ḿbím mú nda ǒ ebí, ne mu n-ryuu ng n/fu, sét mě ochíchí-ntûntû.

¹⁵ Me n-faa ǎ n/fu, â n/sét ǒ ntûntû, a/chi a-ju mě, ne â n/kye ǒ bacê aa*ba/chi a-jwo mě*.

¹⁶ Otu Zedekyâ kâng o-ryí mě ocím ké kadip o/fu, me n/sem ké dyizîn ńdyí Osówo mú mu okpó, Osówo mú o/kye bě dyikpen n/fu, mm*ba/chi n-ju ǒ* n-kúng ǒ n-kye nang banet ḿbé ba/fu, mbé ba-ju ng ǒ*.

¹⁷ Ne n-sét Otu Zedekyâ kâng n/fu, Osówo Óburúkpâbí mú Ézerel mú o/rêe o-shwôm oo/sét o/fu, â wo a/zú abwô ké bunwa a-jwâa kyísí a-kye banet-ashí-basúja ḿbé otu mú Bábyílon, baa*ba/chi ba-ju ǒ* ne baa*ba/chi ba-shí oshê mún*. Ba/chi ba-mîng ǒ ne kyikû-banet eyên.

¹⁸ Nké â a*da/zú abwô ké bunwa* ba/chi ba-yip oshê mún ba-kye banet ḿbé Bábyílon ḿbé ba/chi ba-shí kámú, ne wo aa*ba/chi a-fem ké abwô ebe*.

¹⁹ Nké otu o/faa o/fu, me mu n-shî ng banet-oshê eten ḿbé baa/chêe ba-kâm banet ḿbé Bábyílon. Ba-man mě eyip ba-kye kámbé ba-kye mě busông.

²⁰ Me n-sét ǎ n/fu, baa*ba/chi ba-kúng ǒ ba-kye kámbé*. Mu n-tîm m ǒ arông n/fu, jwo kyitwóm ńkyí Óburúkpâbí mu o-sét ng ǒ. Â a/chi éné, kyi/chi kyi-kyú kanong ne wo, ne baa*ba/chi ba-ju ǒ*.

²¹ Nké Óburúkpâbí oo/tông mě ké chwǒm-akat ńkyí kyi/chi kyi-chi â a/né a/fu, wo aa*zú abwô ké bunwa*.

²² Ké chwǒm-akat ánkyi, me n/ri ké baa/kpî kángkáng banyinyi ḿbé ba/waa ké kyibám-butu ńkyí Júda ba-ba-kye banet-ashí-basúja ḿbé otu mú Bábyílon. Fwôo atông a-jwo ńkyí ba/mû ba-raa ng ké nkéré mbe ba-cen n ba-câ. Ba/fu, bacín-dyityém-otu ba/nîm ǎ, ba-koo ǎ busa. Ne kántîk mú byiká emen bii/ríbî ké biǐntóng, bacín emen baa/mîng ǎ.

²³ Ne n-chînye n-sét n/fu, kángkáng banyinyi eyên ne bwǎsíng ba/chi ba-yip kámbé ba-da-kye banet ḿbé Bábyílon, ne wo oyén aa*ba/chi a-fem ké abwô ebe*. Otu mú Bábyílon o/chi o-kám ǒ wǎ onet-mgbokobá, ne ba/chi ba-shí oshê mún kángkáng.

²⁴ Otu Zedekyâ o-faa o/fu, *dachi a-chi onet nang obónge o-nyît kyi-kim ne bǎmpém ḿbén*. Chwǒm kii*ba/chi kyi-chi dyikpen eyên*.

²⁵ Â ḿbé banet-ashí-oshê ba/jwo ba/fu, me m/pem ne wo, ba/chi ba-bâ ba-ba-bí ǒ ńkyí be byi/pem. Ba/chi ba-ryí ǒ ocím ba/fu, mbé baa*ju ǒ* â wo a/sét kámbé kángkáng byěm.

²⁶ Sét kámbé kaǎkím a/fu, wo a/mû a-tîm m mě arông a/fu, me n*dachi n-chî ǒ etwóm ké mgbokobá* a-da-kpú áku*.

²⁷ Kángkáng ḿbé banet-ashí ámbe kâng ba-bâ ba-ba-bí mě, ne n-sét kámbé kerededet ńkyí otu o/sét mě o/fu, me nsét. Chwǒm kyikíri kyi/mû kyi*fí ńkyí badachîchi* ké nǎ, onet o*fí nang obónge* mú o/jwo bǎmpém ámbe*.

²⁸ Ne ba-tî mě ké kafâ-kabám ńké kyibám-butu tete dyicí ńdyí ba/koo Jerúsélem.