Jeryimáya 37 - Bokyi Bible

Otu Zedekyâ o/bí Jeryimáya o/fu, ofé Nshwam o-kye Óburúkpâbí

¹ Otu Nébúkanéza mú Bábyílon o/chi Otu Zedekyâ mú wǎn-Otu Josáya Otu mú Júda ké kyikit ńkyí Otu Jehóyákin mú wǎn-Otu Jehóyákim.

² Nké nang Otu Zedekyâ nang banet-ashí-bǎmkpóngé emen nang banet-Júda ba*da/chi ńkyí Óburúkpâbí o/sét mě o/fu, bachi*.

³ Otu Zedekyâ o-twóm Jehúkal mú wǎn-Shelemyâ ne nchi kyifen-Osówo mú odabángê Zefanyâ mú wǎn-Masáya o/fu, baba-sét mě n-fé nshwam n-kye Osówo Óburúkpâbí eten ké bubwô ḿbú oshê eten.

⁴ Ké nkéré ámu ba/mû ba*da mě efé ne ké mgbokobá* ne m/mû n/tôong n-cen n wááng ne banet.

⁵ Basúja ḿbé Bábyílon ba/mû mbe ba-wâng ng Jerúsélem, nké ké nkéré mú ba/jwo ba/fu, basúja ḿbé Éjip baa/nyáng buti ḿbú Éjip, mbé ba/bwa dyijê.

⁶ Ne Osówo Óburúkpâbí mú Ézerel o-sét mě kâng

⁷ o/fu, me nsét Otu Zedekyâ n/fu, basúja ḿbé Éjip mbe ba-bâ ké bukwóp ba-ba-chwáp ǒ, nké ba/chi ba-bwa dyijê.

⁸ Ḿbé Bábyílon kâng ba/chi ba-bwa esim ba-kye bunwa ké oshê, ba-koo kámú, ba-shí kámú.

⁹ Me Óburúkpâbí mu n-kuri ng ǒ ekó n/fu, *dachi a-nîm byiko eyên a/fu, ḿbé Bábyílon baa*ba/chi ba-chîbwa esim* ké nǎ, ba/chi ba-bwa esim.

¹⁰ Nang a-bwa a-kpógê burwám-basúja bamúmú ḿbé Bábyílon, kyi-waa banet ḿbé ba/némê kámbé nké nke, ḿbé badawaa sáre ké bampyep-byití, banet ámbe ba-chî ng eman ebûu ba-shí oshê mún kángkáng.

Ba/kám Jeryimáya ba-fé ké Mgbokobá

¹¹ Basúja ḿbé Bábyílon ba/mîng Jerúsélem ba-bwa esim, ké nǎ, basúja ḿbé Éjip ba/mû mbe ba-bâ.

¹² Ne m-kpet edim kâng m-mîng Jerúsélem n/fu, n-câ ké esí nyí Běnjámin n-da-koo kyicê-esí nyí ejí, nyí kyikû-banet ejí.

¹³ Nké ké nkéré n/ribi ké dyifyi ńdyí Běnjámin, onet-dyishí-basúja mú o/mû ké bǎmkpóngé, mú odabángê Eryíja, mú wǎn-Shelemyâ, mú bonchí emen mú kánkán o/mû o-bángê e Hanánya, o/sét mě o/fu, me mbwom, o-bí mě o/fu, a-kú a-chêe ng a-kâm banet ḿbé Bábyílon dí.

¹⁴ Me n-faa ǎ n/fu, kyi*fí éné*. N*fí n-chêe ng*. Nké Eryíja o*da mě ejwo*. O-kám mě o-ca ne me ké kyikit-banet-ashí.

¹⁵ Kafâ ka-sa kámbé ne me, ne ba-kye busa ba/fu, bamín mě ba-fín mě ké kyise ńkyí Jónátan mú nsâng banwet mú otu, mú baa/yip kyise emen ba-chi kyise-mgbokobá.

¹⁶ Ba-yip mě ba-fé ké kaase-mgbokobá ńké kyísí, n-waa ányi ké kyikim-nkéré chwóó.

¹⁷ Ké nkéré mú kaa/bwon, Otu Zedekyâ o-twóm o/fu, baca ne me kyikit emen, ne o-bí mě ké kadip, ké kyibám-butu emen o/fu, kyitwóm nkyi kô ńkyí kyi/fím ne Óburúkpâbí dí. Me n-sét ǎ n/fu, nkyi kô, ne n-chînye n-sét ǎ n/fu, ba/chi ba-kám ǒ ba-kye otu mú Bábyílon.

¹⁸ Ne m-bí kâng n/fu, ebóng kyibî ńkyí me n/chi ké bushú eyên nang banet-ashí eyên nang banet ḿbén ńkyí kyi/chi ǒ a-fé mě ké mgbokobá.

¹⁹ Bamkpábé eyên ḿbé badasét byiraa-Osówo, ḿbé ba/sét ǒ ba/fu, otu mú Bábyílon oo*ba/chi o-kye ǒ bunwa* nang oshê mún bunwa* mbe nyá.

²⁰ Kántîk, ké butu eyên, mu n-tîm m ǒ arông n/fu, jwo mě, a-chi ńkyí mu m-bí ng ǒ. Kamgbe, *dachi a-twóm mě m-bwa esim ké mgbokobá* ké kyise ńkyí Jónátan*. Â a/chi, m-man m-kpú ányi.

²¹ Ne Otu Zedekyâ o-kye busa kâng o/fu, bafín mě ké kafâ-kyibám-butu. Me n/waa ányi, ne kángkáng dyicí ba-kyâ mě kyirim-berêt mú mbe ba-chi i ányi ké kafâ-oshê tete berêt mú ké oshê omúmú o-man.