Jeryimáya 35 - Bokyi Bible

Jeryimáya ne Banet ḿbé Rékap

¹ Ké nkéré mú Otu Jehóyákim mú wǎn-Otu Josáya o/mû otu mú Júda, Óburúkpâbí o/raa ne me o/fu,

² ca a-da-pem ne banet ḿbé kyikim-oshê ńkyí Rékap. Kpî kámbé a-bâ ne mbé ké nfût obónge mú ké kafâ-kiǐtí-kyise-kyifen ejí echi a-ba-kye kámbé bato.

³ Ne m-kpî kâng kángkáng kyikim-banet ńkyí Rékap. M/kpî to Jazanyâ mú wǎn-Jeryimáya okíri, mú o/mû wǎn-Habazínya ne kángkáng bwǎn emen ḿbé banyinchéng ne bwǎn-bané emen,

⁴ m-bâ ne mbé ké kiǐtí-kyise-kyifen-Osówo echi. M/kpî kámbé n-nung ne mbé ké nfût mú bǎmgbán ḿbé mkpábé mú odasét byiraa-Osówo, mú odabángê Hánan, mú wǎn-Egálya. Nfût ámu o/mû kyíbóng-nfût mú Masáya mú wǎn-Shálum, mú o/mû kiǐtí-onet-dyishí-bǎmkpóngé ké kiǐtí-kyise-kyifen-Osówo echi, ne o/mû o/fárâng ne banfût ḿbé banet-ashí-bǎmkpóngé bakíri.

⁵ Ne n-yip kâng bammîk ne acáng nyí ba/fé bato n-kye banet ḿbé Rékap n/fu, bajwáp.

⁶ Mbé ba-faa ba/fu, be bii*jwáp bato*. Jónádap mú bonchí eten mú kpákpá, mú wǎn-Rékap o/sét bě o/fu, be ne kyikû-banet eten byi*dachi byi-jwáp bato nang bará*.

⁷ O/sét bě o/fu, be byi*dachi byi-bi byise* byi-kpang nang byifát* byi-kwón nang byíkwôn* nang orê to byi*daré kámbyí*. O/sét bě o/fu, be kángkáng nkéré byikûrí ké bampyep ḿbé badabi ké byídí, eringe nyí be byidawaa ké esí ńnyín nyí byimu byi-kyú u ké nyǐ wǎ bacinbánet.

⁸ Bii/chi kángkáng byěm ḿbyí Jónádap o/sét bě. Be bayén bii*jwáp bato* nang banyi eten, nang bwǎn eten to baa*jwáp*.

^9-10 Be bii*bi byise byi-kyú ké mbyí*. Byimu byi-kyú u ké bampyep ḿbé badabi ké byídí, ne byi*fí ne byíkwôn* nang byifát* nang esang-byichí*. Be bii/chi kángkáng byěm ḿbyí Jónádap mú bonchí eten mú kpákpá o/sét bě kerededet.

¹¹ Nké ké nkéré mú Otu Nébúkanéza o/bê ne byití ké oshê, be byi/fu, byi-bâ ké Jerúsélem eringe nyí byidafem ké abwô nyí basúja ḿbé Bábyílon ne Syírya. Ńkyín nké kyi/chi ne byimu byi-kyú u ké Jerúsélem.

^12-13 Ne Osówo Óburúkpâbí mú Ézerel mú o/rêe o-shwôm o-sét mě kâng o/fu, me nca n-da-sét banet ḿbé Júda ne Jerúsélem n/fu, me Óburúkpâbí mu m-bí ng běn n/fu, ebóng ben ba/né mě ejwo, ba-né echi ńkyí n/sét běn.

¹⁴ Kyikû-banet ńkyí Jónádap baa/chi ńkyí Jónádap o/sét kámbé o/fu, ba*dajwáp bato* ne tete dyicí ńdyí kurún, onet o*fí nang obónge ké burwám ebe mú oo/jwáp*. Nké me nn/raa ne ben kángkáng nkéré, ba*fí ba-jwo ng mě*.

¹⁵ Kángkáng nkéré, mu n-twóm m běn kángkáng bǎmgbán ejí ḿbé mbe bamkpábé ḿbé badasét byiraa ejí, ne mbé baa/sét běn ba/fu, ben bamîng byibî-akwóp enen ba-kûchi ńkyí nkyi kanong. Mbé ba/kuri běn ekó ba/fu, ben ba*dachi ba-fé esówo ekíri* eringe nyí ben badawaa ba-kyú u ba-câ kashú ké esí nyí me n/kye běn ne banchí enen ḿbé kpákpá. Nké ben ba*fí ba-fwôo ng atông ba-jwo ńkyí mu n-sét ng běn*.

¹⁶ Kyikû-banet ńkyí Jónádap ba/chi ńkyí bonchí ebe mú kpákpá o/sét kámbé, nké ben banet ḿbén ba*fí ba-chi i ńkyí n/sét běn*.

¹⁷ Ké bubwô ḿbún kâng, me Osówo Óburúkpâbí mú Ézerel mú o/rêe o-shwôm n/chi n-kye běn ben banet ḿbé Júda ne Jerúsélem kángkáng busông ḿbú me m/mû n/ryí ocím. Me n/chi n-chi ńkyín, ké nǎ, â n/raa ne ben, baa*jwo* ne â n/kó běn, baa*faa mě ojá*.

¹⁸ Ne n-sét kâng kyikim-banet ńkyí Rékap n/fu, Osówo Óburúkpâbí mú Ézerel mú o/rêe o-shwôm oo/raa o/fu, ben baa/tî kyije ńkyí Jónádap mú bonchí enen mú kpákpá o/fé běn. Baa/jwo bacê emen, ba-chi kángkáng byěm ḿbyí o/sét běn.

¹⁹ Ké bubwô ámbu, me Osówo Óburúkpâbí mú Ézerel mú o/rêe o-shwôm nn/ryí ocím n/fu, Jónádap mú wǎn-Rékap o-man o-kyú ne wǎn-onyinchéng kángkáng nkéré mú odakyú ḿgbán ejí.