Jeryimáya 34 - Bokyi Bible

Kyitwóm ńkyí Óburúkpâbí o/twóm kyi-kâm Otu Zedekyâ

¹ Óburúkpâbí o/raa ne me ké nkéré mú Otu Nébúkanéza ne basúja emen ne kángkáng eshê nyí e/mû ké bubwô emen mbe ba-kyâ Jerúsélem ne eshê nyí e/fárâng ne mǔ bunwa.

² Osówo Óburúkpâbí mú Ézerel o/sét mě o/fu, me nca n-da-sét Otu Zedekyâ n/fu, me Óburúkpâbí n/chi n-kúng oshê mún n-kye otu mú Bábyílon, ne o/chi o-shí kámú.

³ Wo aa*ba/chi a-fem*. Ba/chi ba-kám ǒ ba-kye ǎ. A/chi a-bwom ne nyǐ ba-pem, ne a/chi a-dim Bábyílon.

⁴ Otu Zedekyâ, fwôo atông a-jwo ńkyí mu n-sét ng kyi-kim ne wo. Baa*ba/chi ba-ju ǒ ké byití*.

⁵ Wo a/chi a-kpú bukyû ḿbú degere, ne wǎ eringe nyí banet ba/shí burwan ké nkéré mú ba/ryii banchí eyên ḿbé kpákpá ḿbé ba/ryí butu kpáá ne wo a-ryí, éné to nké ba/chi ba-shí burwan ba-fé ǒ. Ba/chi ba-tii ǒ ba-raa ba/fu, otu eten oo/kpú. Me Óburúkpâbí nké n/raa.

⁶ Me n/sét kâng Otu Zedekyâ kyitwóm ńkyín ké Jerúsélem,

⁷ ké nkéré mú basúja ḿbé otu mú Bábyílon mbe ba-kyâ Jerúsélem bunwa. Basúja ámbe ba/mû mbe ba-kyâ to Lákyishi ne Azéka bunwa. Eshê ńnyín nké nke e/mû e/waa ké Júda nyí ba/mû ba/bi ekpe ba-wáp kányí ba-fé ké kafâ.

Kaǎnínǐm ńké ba/nîm Básóng

⁸ Otu Zedekyâ ne banet ḿbé Jerúsélem ba/mû ba/ryí ocím ba/fu, mbé ba-zú ng básóng ebe

⁹ ḿbé Hyíburus, ḿbé banyinchéng ne ḿbé banyinyi, abwô ba-firi ké byiko ebe, eringe nyí onet-Ézerel oo*tî to óbe wǎ ósóng*.

¹⁰ Kángkáng banet ne banet-ashí ebe ba/bángê ba/fu, mbé ba-zú ng básóng ebe abwô, baa*tî to kámbé wǎ básóng*. Ba/zú kámbé abwô,

¹¹ nké ké kaǎnyín-nkéré ba-yángê atyém ebe, ba-koo kámbé ba-bwa esim, ba-chi kámbé ké busa ba-chîbírî básóng ebe.

¹² Ne Osówo Óburúkpâbí

¹³ mú Ézerel o-sét mě kâng o/fu, me nsét banet ḿbé Ézerel n/fu, me n/ryí ocím n-sem byiko ejí ne banchí enen ḿbé kpákpá ké nkéré mú n/fîm kámbé ba-byí ké Éjip, n-chi kámbé ba-fem ké búsóng. Me n/sét kámbé n/fu,

¹⁴ ké kángkáng aje káchâtkányi, nang yeě mú oo/tî onet-Hyíburus wǎ ósóng ké aje nyâchât, ozú ósóng ámu abwô o-firi ké byiko emen. Nké banchí enen ḿbé kpákpá ba*da/fwôo atông ba-jwo mě* ba-chi ńkyí n/sét kámbé*.

¹⁵ Ké boǒnyín-ací ḿbú bu/shwôm ké esim, ben ba/chi ńkyí kyi/nyîn mě. Ben ba/bángê ba/fu, ben ba-zú ng bánen-banet-Ézerel ḿbé ben ba/tî wǎ básóng abwô ba-firi ké byiko ebe, ne ben ba/ryí ocím ké bushú ejí, ké kiǐtí-kyise-kyifen ejí echi, ńkyí bamu ba-fâ mě.

¹⁶ Nké ben ba/chîyángê atyém enen ba-né mě ofê ekye. Ben ashí amúmú ba/chîkoo básóng enen ḿbé ben ba/mû baa/zú kámbé abwô ba-firi ké byiko ebe, ba-chîchi kámbé ké busa ba-chîbírî básóng enen.

¹⁷ Ké bubwô ḿbún kâng, kántîk me Óburúkpâbí mu n-sét ng běn n/fu, ben baa/né echi ńkyí me n/sét běn. Ben baa/né ba/fu, bánen-banet-Ézerel ba*dachi ba-kyú ké byiko ebe*. Ké bubwô ḿbún kâng, me n/chi n-chi běn ba-firi ké byiko enen. Byiko enen ekyú ḿbyí ba/chi ba-kpú ké byití, ba-kpú byirwóm ne esong. N/chi n-chi oshê nang orá ké ejíí o-firi ne bushî ké ńkyí n/chi n-chi běn.

^18-19 Banet-ashí ḿbé Júda ne Jerúsélem, cibicibi ne banet-ashí-bǎmkpóngé-otu ne banchi kyifen ejí ne kángkáng banet-ashí-oshê ba/ryí ocím ne me ba-sem dyizîn ejí, ba-cen ké otyém-byicê-enyam byifee ḿbyí ba/ju mpong ba-ját kámú byicê byifee. Nké mbé ba/bên ocím mún ba*da/chîtî kámú*. Ké bubwô ámbu, n/chi n-chi banet ḿbén ńkyí mbé ba/chi mpong ámu.

²⁰ N/chi n-kúng kámbé n-kye banet-bushwôn ebe ḿbé mbe ba-ryuu ng ba/fu, mbé ba-ju ng kámbé, ne bunurung ne enyam byi/chi byi-ryí byikwóm-enyam-byiko ebe.

²¹ N/chi n-kúng to Otu Zedekyâ ne banet-ashí-bǎmkpóngé emen n-kye banet ḿbé mbe ba-ryuu ng ba/fu, mbé ba-ju ng kámbé. N/chi n-kúng kámbé n-kye basúja ḿbé Bábyílon, ḿbé baa/mîng běn bunwa ekye.

²² Me n/chi n-kye busa, ne mbé ba/chi ba-bwa esim ké oshê mún. Ba/chi ba-kye kámú bunwa, ba-koo kámú, ba-shí kámú. N/chi n-chi eshê nyí Júda e-firi wǎ kyikim-dyikán ńkyí onet o*fí o-kyú u*. Me Óburúkpâbí nké n/raa.