Jeryimáya 33 - Bokyi Bible

Óburúkpâbí o/chîryí Banet Emen Ocím Okíri

¹ Ké nkéré m/mû n/tôong ké mgbokobá, ké kafâ-kyibám-butu, kyitwóm ńkyí Óburúkpâbí kyi/chîbê kyi-kâm mě.

² Óburúkpâbí mú o/chi ejíí, mú o/bîi kányí ne o-tî kányí o/raa ne me. Nyǐ mú dyizîn emen dyidabángê Óburúkpâbí o/raa o/fu,

³ kó mě, ne me n/chi m-bángê ǒ. Me n/chi n-sét ǒ biǐtí-akat-byěm ḿbyí wo a*da/nyît ne*.

^4-5 Me Osówo Óburúkpâbí mú Ézerel mu n-sét ng n/fu, ba/chi ba-bú byise ḿbyí Jerúsélem ne kyibám-butu ńkyí Júda ba-pwó kyísí. [Kii*ba/chi kyi-byí běn dyishí* ńkyí badadim bunwa enwa ké byikit-byití ḿbyí banet ḿbé Bábyílon baa/bi ba-wâng oshê ba-fé ké kafâ*. Ńkyín kyi/chi kyi-chi oshê o-sú] ne byikwóm-enyam-byiko-banet ḿbé n/chi n-ju kámbé ké busa-dyityém ejí. Me mm/bírî oshê mún esim ké bubwô ḿbú byibî-byěm ḿbyí banet emen baa/chi.

⁶ Nké n/chi n-chi oshê mún o-nyange ne banet emen, n-chi orwôm ebe o-man. N/chi n-tông kámbé dyikpen ńdyí degere ekyú ne bunyîn-dyityém chwóó.

⁷ Me n/chi n-chi Júda ne Ézerel ba-já byěm, ne n/chi m-bwât kámbé m-bi wǎ eringe nyí ba/mû kpákpá.

⁸ N/chi n-chi kámbé ba-cé ké byibî ebe ḿbyí baa/chi ké bushú ejí, ne n/chi m-pwoo kámbé ké byibî ebe ne ké bunwa ebe ḿbú ba/bírî ne me.

⁹ Jerúsélem o/chi o-firi mě kyikit ńkyí bunyîn-dyityém ne ofê ne byiko etông, ne kángkáng eshê nyí ké ejíí e/chi e-kyú ne bushî, e-tím banê ké nkéré ee/jwo kyi-kim ne byěm ḿbyí byinong ḿbyí mu n-chi i n-kyâ banet ḿbé Jerúsélem, ne kyi-kim to ne kanong ńké mu m-bâ ne nké ké oshê.

¹⁰ Óburúkpâbí o/raa o/fu, banet mbe ba-raa ng ba/fu, kyikit ńkyín nkyi wǎ kyikim-dyikán, kyi*fí ne enyam ne banet ḿbé mbe ba-kyú u ké nkyí*. Ńkyí mbe ba-raa ng nkyi ntûntû. Eshê nyí Júda ne byiká-oshê ḿbyí Jerúsélem byi/firi kafâ dyikáá, nang enyam nang banet ba*fí to ké mbyí*. Nké ké byikit ḿbyín, ben ba/chi ba-chîjwo

¹¹ awonge nyí bunyîn-dyityém ne ejá-dyijêe ńdyí dyijî-abé. Ben ba/chi ba-jwo ekwan ké nkéré banet ba-kú ba-bâ byifen echi ḿbyí asǎma ekó ké kiǐtí-kyise-kyifen ejí echi. Mbé ba/chi ba-raa ba/fu, kó n̂g Óburúkpâbí mú o/rêe o-shwôm asǎma, ké nǎ, nyǐ mu kanong ne kyijé emen kyi-waa ng ne banyá. Me n/chi n-chi esí ńnyín e-firi ne kanong wǎ eringe nyí e/mû ne nké kpákpá. Me Óburúkpâbí nké n/raa.

¹² Óburúkpâbí mú o/rêe o-shwôm o/raa o/fu, ké esí ńnyín nyí nyi wǎ kyikim-dyikán, nyí enyam nang onet o*fí o-kyú u ké nyǐ* biǐbyâa byi/chi byi-chîbyí ké nyǐ, ḿbyí bambâm ebû badaman ekúng ebû ebe ba-ca ké mbyí.

¹³ Ké eshê nyí ké byikit ḿbyí eku éku ne ké byikû-eku ne ké kyicê ńkyí Júda ńkyí busyísen ne ké esí nyí Běnjámin ne ké byikit ḿbyí byi/fárâng Jerúsélem e-fé ké kafâ ne ké eshê nyí Júda, bambâm ebû ba/chi ba-chîpan ebû ebe. Me Óburúkpâbí nké n/raa.

¹⁴ Óburúkpâbí o/raa o/fu, nkéré mu o-bâ mú n/chi n-chi ńkyí n/ryí banet ḿbé Ézerel ne Júda ocím.

¹⁵ Ké nkéré ámu, n/chi n-fîm onet mú mu kanong ké kyikû ńkyí Otu Dívit n-kúng ǎ butu. Otu ámu o/chi o-byí wǎ kyicat-kyichí o-chi ńkyí nkyi kanong ne ńkyí nkyi dángdáng ké esí emúmú.

¹⁶ O/chi o-nyii banet ḿbé Júda ne ḿbé Jerúsélem ne ba/chi ba-kyú ké bunyîn-dyityém. Ba/chi ba-kûkó oshê mún, Óburúkpâbí mú o/nyii bě.

¹⁷ Me Óburúkpâbí n/ryí ocím n/fu, onet o-man o-kyú kángkáng nkéré ké kyikû-banet ńkyí Otu Dívit mú odakyú otu mú Ézerel,

¹⁸ ne banchi kyifen ejí ba-man ba-fím kángkáng nkéré ké kyikû-banet ńkyí Lyíva, ḿbé badakyú bǎmgbán ejí ne ḿbé badakûchi byifen ḿbyí badafwá byirim-enyam ne ḿbyí esang-byichí ba-kyâ mě.

¹⁹ Óburúkpâbí o/sét mě o/fu,

²⁰ me nn/ryí ocím ne buchú ne esû eringe nyí byidakûbê ké bankéré ebe, ne ocím ámu oo*nwa ebên*.

²¹ Eringe ányi ebónge, nn/ryí ocím ne Otu Dívit mú ḿgbán ejí n/fu, o/chi o-man o-já onet ké kyikû-banet emen mú odakyú otu, ne nn/ryí ocím to ne banchi kyifen ḿbé kyikû-banet ńkyí Lyíva n/fu, mbé kángkáng nkéré ba-kyú u bǎmgbán ejí, ne ecím nyí n/ryí něen ee*bên ne banyá*.

²² Me n/chi n-chi kyikû-banet ńkyí Otu Dívit mú ḿgbán ejí kyi-jê, n-chi to banchi kyifen ejí ḿbé kyikû-banet ńkyí Lyíva kyi-jê eringe nyí baa*nwa to epan* wǎ ékpére nyí kyíbóng ne wǎ éshíshě nyí nyi ké bukô-baya.

²³ Óburúkpâbí o/sét mě o/fu,

²⁴ wo aa/jwo eringe nyí banet mbe ba-raa ng ba/fu, me nn/né Ézerel ne Júda? byikû-banet byifee ḿbyí me n/cá? Ké bubwô ámbu, ba-kú ba-tún n banet ejí dángé, ba*fí to ba-kúng ng kámbé wǎ oshê*.

²⁵ Nké me Óburúkpâbí n/ryí ocím ne buchú ne esû, ne nn/chi byije ḿbyí mbyi byi-níbî ng bubóng ne esí.

²⁶ Eringe nyí me nn/chi ńkyín kyi-kyú éné, n/chi n-tî to ocím ejí mú n/ryí ne bwǎn ḿbé Jekôp ne Otu Dívit mú ḿgbán ejí. N/chi n-fîm onet obónge ké kyikû-banet ńkyí Otu Dívit mú o/chi o-kyú otu mú bwǎn ḿbé Ébarahâm ne Ázik ne Jekôp. N/chi n-ri banet ejí bafip, n-chi kámbé ba-chîkpet ece kashú.