Jeryimáya 32 - Bokyi Bible

Jeryimáya o/ré Kyifát

¹ Óburúkpâbí o/raa ne me ké nkéré mú Otu Zedekyâ o/ryí butu ké Júda kyi-rí aje diǐkpú, ányi kii/rí to aje onyiryiká ne achât ké nkéré mú Otu Nébúkanéza o/ryí butu ké Bábyílon.

² Ké nkéré ámu, basúja ḿbé otu mú Bábyílon ba/mû mbe ba-kyâ Jerúsélem bunwa, ne ba/mû ba/fín mě ba-ciring ké kafâ-kyibám-butu.

³ Otu Zedekyâ o/mû o/fé mě ké mgbokobá ányi o/fu, ké nǎ, me n/sét n/fu, Óburúkpâbí oo/raa o/fu, nyǐ o/chi o-mîng otu mú Bábyílon o-kpógê oshê mún,

⁴ ne Otu Zedekyâ oo*ba/chi o-fem*. Ba/chi ba-kúng ǎ ba-kye otu mú Bábyílon. Ba/chi ba-kwárê kashú ne barî, ne o/chi o-pem ne nyǐ.

⁵ Ba/chi ba-kúng Otu Zedekyâ ba-dim ne nyǐ Bábyílon, ne o/chi o-waa áku tete n-chi ǎ ńkyí kyi/kwárê ne nyǐ. Nang o-bwa o-nwa ne banet ḿbé Bábyílon oo*ba/chi o-kpógê kámbé*. Me Óburúkpâbí nké n/raa.

⁶ Óburúkpâbí o/sét mě

⁷ o/fu, Hánámel mú wǎn-Shálum mú wǎn-boné ejí o/chi o-ba-bí mě o/fu, me nda-ré kyifát emen ńkyí nkyi ké Anátot, ké esí nyí Běnjámin, ké nǎ, me nké mu ochíchí-wǎn-boné emen ne m-man n eré kyifát ánkyi kyi-firi ńkyí ejí.

⁸ Wǎ eringe nyí Óburúkpâbí o/raa kâng, Hánámel o/bê o-kâm mě ké kafâ-kyibám-butu o-ba-bí mě o/fu, me nré kyifát emen. Ne n-nyît kâng ké ntûntû n/fu, Óburúkpâbí o/pem ne me.

⁹ Me n/ré kyifát ánkyi ńkyí Hánámel, m-pan akpuga n-kye ǎ. Akpuga ányi nyí ba/chi ké syílyíba a/mû a/byí onyiryiká ne afee.

¹⁰ Me n/fé dyizîn ejí ne n-cít nwet ámu mú n/ré kyifát ánkyi, n-kó bantûesé, ne m-pan akpuga n-kye ǎ.

¹¹ Ne n-kúng kâng biǐbáá-nwet ḿbyí n/rí kyifát ánkyi, kiǐbáá ńkyí ba/cít kánkyí, ńkyí ba/sáng ocím mú byi/ryí ké kafâ, ne kiǐbáá ńkyí ba*da/cít*

¹² n-kye Báruk mú wǎn-Neryâ, mú bonchí emen mú kánkán o/mû Masáya. N/kye Báruk biǐbáá-nwet ámbyi ké bushú-Hánámel ne ḿbú bantûesé ḿbé ba/fé dyizîn to ké nwet mú n/ré kyifát, ne ké bushú-banet ḿbé ba/mû ba/kyú ké kyibám-butu.

¹³ Me n/sét Báruk ké bushú ebe kángkáng n/fu,

¹⁴ Osówo Óburúkpâbí mú Ézerel mú o/rêe o-shwôm oo/kye ǒ busa o/fu, wo akúng biǐbáá-nwet ḿbyín, ńkyí ba/cít kánkyí ne ńkyí ba*da/cít* a-fé ké otyu eringe nyí bii*ba/chi byi-bên ké aje chwóó nyí nyi a-bâ ké kashú*.

¹⁵ Osówo Óburúkpâbí mú Ézerel mú o/rêe o-shwôm oo/sét o/fu, ba/chi ba-chîré byise ne byifát ké esí ńnyín.

Nshwam mú Jeryimáya o/fé

¹⁶ Ké nkéré mú nn/kúng biǐbáá-nwet ḿbyí n/ré kyifát n-kye Báruk, me n/fé nshwam n/fu,

¹⁷ Óburúkpâbí mú mu Otu Kyítá, wo nké a/chi bubóng ne esí ké kiǐtí-busa eyên. Chwǒm kyi*fí ńkyí kyida ǒ ekpógê*.

¹⁸ Wo aa/tông égot-banet kyijé ńkyí kii*man* nké amu a-kyâ to banet busông ké byibî ḿbyí banchí ebe ba/chi. Wo a-chi i Osówo mú mu kiǐtí ne mú mu ne busa. Wo amu Óburúkpâbí mú o/rêe o-shwôm.

¹⁹ Wo a-kabe ng byěm ḿbyí byinong, a-chi i biǐtí-byěm. Wo amu a-ri ng kángkáng byěm ḿbyí banet mbe ba-chi i, ne a-kyâ kámbé eyáré e-tyeem ne byěm ḿbyí mbe ba-chi i.

²⁰ Ké nkéré mú o/shwôm ké esim chwóó, wo a/chi biǐtí-akat ne ekap ké Éjip ne a/tôong a-chi i kámbyí a-câ kashú tete dyicí ńdyí kurún, ké Ézerel ne ké kángkáng eshê, ne ké bubwô ámbu, baa/nyît ǒ ké kángkáng byikit.

²¹ Ké biǐtí-akat eyên ne ekap ḿbyí byi/fé banet-bushwôn eten bushî, wo a/kúng busa eyên a-fîm banet ḿbé Ézerel ba-byí ké Éjip.

²² Wo nké a/kye kámbé esí ńnyín, nyí nyi e-bát ng byiryíng, wǎ eringe nyí a/mû a/ryí banchí ebe ḿbé kpákpá ocím.

²³ Nké ké nkéré mú mbé ba/bê ké esí ńnyín ba-koo kányí e-firi nyí ebe, mbé ba*da/chîtî byije eyên* nang eringe nyí wo a/tángê kámbé a/fu, bakyú, ba*da/kyú*. Ba*da/chi chwǒm nang kyibónge ńkyí a/sét kámbé a/fu, bachi*. Ne ké bubwô ámbu kâng, wo a/bê kámbé ne kángkáng busông ḿbún.

²⁴ Banet ḿbé Bábyílon baa/bi byikit ḿbyí badabwom ba-nwa byití ba-wáp oshê mún ba-fé ké kafâ ba/fu, mbé ba-koo ng kámú, ne mbe ba-kyâ bunwa. Byití ne esong ne byirwóm byi/chi byi-chi oshê mún o-róng ké abwô ebe. Wo a-man n eri a/fu, kángkáng byěm ḿbyí wo a/sét bii/chi wǎ eringe nyí a/sét.

²⁵ Nké, ǎ Óburúkpâbí mú mu Otu Kyítá, wo nké a/sét mě a/fu, me nré kyifát ké bushú ḿbú bantûesé, nang ké banet ḿbé Bábyílon ba-kú ba-bâ ekoo oshê.

²⁶ Ne Óburúkpâbí o-raa kâng ne me o/fu,

²⁷ me n-chi i Osówo Óburúkpâbí mú kángkáng banet. Chwǒm kyi*fí ńkyí kyida mě ekpógê*.

²⁸ Me n-kú m-bâ eyip oshê mún n-kye Otu Nébúkanéza mú Bábyílon ne basúja emen. Mbé ba/chi ba-koo kámú

²⁹ ba-fé okwâ ké mǔ. Ba/chi ba-shí kámú cibicibi ne byise ḿbyí banet ḿbé mbe ba-chi i kafâ ka-sa mě ké burwan ḿbú mbe ba-shí i kyíbóng-byise ba-kyâ Bâl, ne byifen ḿbyí mbe ba-chi i ké bato ba-kyâ esówo ekíri.

³⁰ Kyi-fím ké kiimkpet kyikû-dyikpen ebe, banet ḿbé Ézerel ne ḿbé Júda baa/chi kafâ ka-sa mě ké byěm ḿbyí baa/chi.

³¹ Banet ḿbé oshê mún baa/chi kafâ ka-sa mě kyi-fím ké nkéré mú ba/bi kámú. Mm/bángê n/fu, m-bên n kámú,

³² ké bubwô ḿbú kángkáng byibî ḿbyí banet ḿbé Júda ne Jerúsélem baa/chi, cibicibi ne batu ebe ne banet-ashí ebe ne banchi kyifen ejí ne bamkpábé ebe ḿbé badasét byiraa ejí.

³³ Mbé ba/bírî mě esim, ne nang ké mu n-tángê e kámbé n-nye ng n-fâ, mbé ba*fí ba-fwôo ng atông ba-kwâa*.

³⁴ Mbé mbe ba-yip ng ne banunut-barím-bakye ba-tî ng ké kafâ-kiǐtí-kyise-kyifen ejí echi, ńkyí ba/bi ba/fu, banet bakû mě efé, ne baa/bên kánkyí.

³⁵ Ba/bi byikit-kyifen echi ba-kye Bâl ké owo mú Hyínom, ba-kûyip bwǎn ebe ba-chi i byifen ba-kyâ osówo mú mbe ba-kó ng Mólok. Me n*da/sét kámbé n/fu, bachi ńkyín* ne me m/mû n*da/kabe n/fu, ba-chi i dyizong-chwǒm ándyi* ba-chi banet ḿbé Júda ba-chi kyibî*.

Óburúkpâbí o/ryí Banet Emen Ocím

³⁶ Osówo Óburúkpâbí mú Ézerel o/raa ne me o/fu, Jeryimáya, banet mbe ba-raa ng ba/fu, byití ne esong ne byirwóm byi/chi byi-chi oshê mún o-róng ké abwô nyí otu mú Bábyílon. Kántîk, fwôo atông a-jwo chwǒm kyikíri ńkyí mu m-bâ esét.

³⁷ Me mu m-bâ ekpî banet ḿbén ké kángkáng eshê nyí me m/mû m/pwó kámbé byiryibyiryi ké busa-dyityém ejí, ne n/chi m-bwa ne mbé esim ké kyikit ńkyín ba-kyú, chwǒm kii*ta kámbé*.

³⁸ Mbé kâng ba/chi ba-kyú banet ejí, ne me to n/chi n-kyú Osówo ebe.

³⁹ N/chi n-sét kámbé chwǒm kyibónge ńkyí badachi ké dyikpen ebe, n/fu, bakye mě ofê mú odawaa ne banyá, ké kanong ńké ebe ne ńké bwǎn ebe.

⁴⁰ Me n/chi n-ryí ocím n-sem byiko ejí, mú ne banyá ne mbé. Mm*mîng kámbé byěm ḿbyí byinong echi* ne n/chi n-chi kámbé ba-kû mě eshî ne atyém ebe, eringe nyí mbé baa*bírî mě to esim*.

⁴¹ Kyi/chi kyi-kû mě enyîn kámbé byěm ḿbyí byinong echi, ne n/chi n-chi kámbé ba-waa ké esí ńnyín ne banyá.

⁴² Wǎ eringe nyí nn/kye banet ḿbén busông ḿbún, éné to nké n/chi n-kye kámbé byěm ḿbyí byinong ḿbyí nn/ryí kámbé ocím.

⁴³ Banet mbe ba-raa ng ba/fu, esí ńnyín e/chi e-firi wǎ kyikim-dyikán ńkyí nang chwǒm kyi*fí kyi-kyú u ké nkyí* ne ba/chi ba-yip kányí ba-kye banet ḿbé Bábyílon. Nké banet ba/chi ba-chîré byifát ké esí ńnyín.

⁴⁴ Banet ba/chi ba-ré kámbyí, ne ba/chi ba-chi banwet ba-fé azîn ba-cít kámbé, ba-kó bantûesé. Ńkyín kyi/chi kyi-chi ké esí nyí Běnjámin, ké eshê nyí e/fárâng ne Jerúsélem, ne ké eshê nyí Júda, ne ké eshê nyí nyi ké ecím-eku, ne ké byikû-eku, ne ké kyicê ńkyí Júda ńkyí busyísen. Me n/chi m-bâ ne banet ḿbén ké esí ebe. Me Óburúkpâbí nké n/raa.